༢༠༡༢ ཟླ་ ༦ ཚེས་ ༢༠་ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༠ ཉིན་བོད་ནང་གི་ཕྱི་དྲོའི་ཆུ་ཚོད་ ༣།༣༠ ཐོག་རང་ལོ་ ༢༢ ཡིན་པའི་ངག་དབང་ནོར་འཕེལ་ལགས་དང་། རང་ལོ་ ༢༤ ཡིན་པའི་བསྟན་འཛིན་མཁས་གྲུབ་ལགས་གཉིས་ཀྱིས་ཁམས་ཡུལ་ཤུལ་རྫ་སྟོད་གྲོང་རྡལ་དུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་པའི་གནས་ཚུལ་ཐོན་འདུག གནས་ཚུལ་ཐོན་གསལ་ལྟར་ན། ངག་དབང་ནོར་འཕེལ་ལགས་ནི་་ཨ་མདོ་རྔ་བ་རྫོང་ནས་ཡིན་པ་དང། ཕ་་མིང་ལ་ལྷག་པ་དོན་འགྲུབ་དངམ་མིང་ལ་ཚེ་རིང་དབྱངས་ཅན་ཡིན་འདུག
གཞན་ཡང་བསྟན་འཛིན་མཁས་གྲུབ་ལགས་ནི། ཁམས་ཡུལ་ཤུལ་ཁུལ་ཁྲི་འདུ་རྫོང་ཉ་མཚོ་སྡེ་བའི་སྐམ་ཡུལ་རུ་ཁག་གསུམ་པ་ནས་ཡིན་ཞིང་། ཕ་མིང་ལ་ལེགས་གྲུབ་དང་མ་མིང་ལ་སྐྱིད་འཛོམས་ཞུ་ཡི་ཡོད། ཁོང་དེ་སྔོན་ཟིལ་དཀར་དགོན་གྱི་གྲྭ་བ་ཡིན་ལ་ཉིས་སྟོང་དྲུག་ལོར་སྐྱ་སར་བབས་འདུག ཁོང་གཉིས་ཀྱིས་རང་ལུས་མེར་སྲེག་མ་བཏང་སྔོན་དུ་ཞལ་ཆེམས་ཡི་གེ་གཅིག་བཞག་ཡོད་པའི་ནང་། ངེད་གཉིས་ལ་མཚོན་ན་བོད་ཀྱི་ཆོས་དང་རིག་གནས་སོགས་གང་ལ་ཡང་ནུས་པ་འདོན་མི་ཐུབ་ཅིང་། དཔལ་འབྱོར་གྱི་ཕྱོགས་ནས་བོད་མི་མང་ལ་ཕན་པའི་ལས་ཀ་ཅི་ཡང་བྱེད་མི་ཐུབ། དེའི་ཕྱིར་ངེད་གཉིས་ཀྱིས་རང་གི་ནུས་ཚོད་ཀྱིས་བོད་མི་རིགས་དང་ལྷག་པར་དུ་༸གོང་ས་མཆོག་སྐུ་ཚེ་ཁྲི་ཕྲག་ནས་ཁྲི་ཕྲག་ཏུ་
བརྟན་པ་དང་། གཞན་ཡང་ཁོང་མྱུར་དུ་བོད་ལ་ཞབས་སོར་ཐུབ་པའི་རམ་འདེགས་སུ་རང་ལུས་མེར་བསྲེགས་ཀྱི་ལས་གཞི་འདི་འདེམས་པ་ཡིན། ངེད་གཉིས་དང་འདྲ་བའི་བོད་ཀྱི་གཞོན་སྐྱེས་ཚོར་ཞུ་སྙིང་། ང་ཚོའི་བོད་ནང་ཁུལ་ནས་རྒྱག་རེས་རྒྱག་རྒྱུ་དང་། ནང་རྩོད་བྱེད་རྒྱུའི་བྱ་སྤྱོད་རིགས་ནམ་ཡང་མ་བྱེད་པའི་དམ་བཅའ་དང་། ཚང་མས་རྡོག་རྩ་གཅིག་སྒྲིལ་གྱིས་བོད་མི་རིགས་ཀྱི་ལ་རྒྱ་འཛིན་ཐུབ་རྒྱུའི་རེ་བ་དང་ཡིད་ཆེས་ཡོད་ཅེས་འཁོད་འདུག་པ་བཅས། །
