༢༠༡༢ ཟླ་ ༦ ཚེས་ ༡༦ རེས་གཟའ་སྤེན་པ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༢ ཟླ་ ༦ ཚེས་ ༡༥ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༦ ཚེས་ ༡༥ ཉིན་གནས་ཚུལ་འབྱོར་དོན། དེ་སྔོན་ཕྱི་ཟླ་ ༤ ནང་འཛིན་བཟུང་བྱས་པའི་ཨ་འདུས་སྡེ་བ་ཁག་གི་མི་མང་ཕལ་ཆེ་བ་ད་ཆ་རྒྱ་ནག་གཞུང་གིས་གློད་གྲོལ་བཏང་ཡོད་ཀྱང་། རྒྱལ་སྡེ་སྡེ་བའི་ཕུལ་བསྟན་ཚང་གི་ཕུལ་བསྟན། རང་ལོ་ ༤༠ ཡིན་པ་ཁོང་ལ་ཉེ་སྔོན་ཟླ་བ་འདིའི་ཕྱི་ཚེས་ ༢ ཉིན་རྔ་པ་རྫོང་མི་མང་ཁྲིམས་ཁང་ཟེར་བས་ལོ་ ༣ གྱི་བཙོན་འཇུག་ཁྲིམས་ཐག་བཅད་ཡོད་ཀྱང་། དུས་ཚོད་ངེས་ཅན་ནང་བསྐྱར་དུ་ཁྲིམས་བཤེར་བྱེད་དགོས་པའི་ཞུ་གཏུག་བྱས་ན་དེ་ལྟར་ཡོང་ཆོག་ཚུལ་གྱི་རྣམ་འགྱུར་བསྟན་ཡོད་ཅིང་། དེང་སྐབས་ད་རུང་རྔ་པར་བཙོན་འཇུག་བྱས་ཡོད་པ་ལས་མི་འགྱང་བར་ས་གནས་གཞན་དུ་བསྐྱལ་རྒྱུ་ཡིན་འདུག ཁོང་ལ་ཁྱིམ་དུ་བཟའ་ཟླ་དང་བུ་ཕྲུག་ ༤ ཡོད་འདུག དེ་བཞིན་གོང་ཚེས་ཉིན་ཨ་འདུས་རྒྱལ་སྡེ་སྡེ་བའི་མཚམས་ཚང་གི་འགྱུར་ཁོ། རང་ལོ་ ༣༧ ཡིན་པ་ཁོང་ལའང་ལོ་ ༢ བཙོན་འཇུག་ཁྲིམས་ཐག་བཅད་ཡོད་འདུག་ལ། ཁོང་གཉིས་ཀར་རྒྱལ་ཁབ་ཀྱིས་རོགས་རམ་བྱས་པའི་ཁང་པ་མི་དགོས་ཚུལ་བཤད་ཅིང་ལྡེ་མིག་སྤྲོད་སྐབས་མ་བླངས་པའི་ཉེས་འཛུགས་བྱས་ཏེ་ཁྲིམས་ཐག་བཅད་པ་ཞིག་ཡིན་འདུག དེ་མིན་ཨ་འདུས་འཕེ་ཁེའི་སེང་གེ་ཚང་གི་པདྨ་ལ་ཐག་གཅོད་གང་ཡང་མ་བྱས་པར་མུ་མཐུད་རྔ་པ་རྫོང་དུ་བཀག་ཉར་བྱས་ཡོད་འདུག གཞན་ཡང་རྔ་པ་ཀིརྟི་དགོན་པའི་གྲྭ་བློ་བཟང་ཕུན་ཚོགས། རང་ལོ་ ༢༩ ཡིན་པ་ཁོང་ལ་ཉེ་སྔོན་རྔ་པ་རང་སྐྱོང་ཁུལ་གྱི་ལྟེ་གནས་འབར་ཁམས་ནས་ལོ་ ༨ ཀྱི་བཙོན་འཇུག་ཁྲིམས་ཐག་དང་། ལོ་བཞིའི་ཆབ་སྲིད་ཁེ་དབང་འཕྲོག་པའི་ཐག་གཅོད་བྱས་ཏེ་མི་འགྱང་བར་ས་གནས་གཞན་གྱི་བཙོན་ཁང་དུ་བསྐྱལ་རྒྱུ་ཡིན་འདུག
ཁོང་ལོ་སྔོན་མའི་ཕྱི་ཟླ་ ༡༠ ཚེས་ ༡༧ ཉིན་འཛིན་བཟུང་བྱས་པ་ནས་ད་བར་གར་སོང་ཆ་མེད་གྱི་གནས་སྟངས་འོག་བཀག་ཉར་བྱས་ཤིང་། ཁྲིམས་ཐག་གཅོད་སྐབས་ནག་ཉེས་ཅི་ཞིག་བཙུགས་ཡོད་མེད་ཤེས་རྟོགས་མ་བྱུང་བ་བཅས། དེ་སྔོན་ཕྱི་ཟླ་ ༥ ཚེས་ ༢༧ ཉིན་ལྷ་ས་ནས་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་གནང་མཁན་རྔ་པའི་དར་རྒྱས་ཀྱི་ཕ་ལོ་དེ་ཉེ་སྔོན་བུ་དར་རྒྱས་ལ་ཐུག་འཕྲད་ཆེད་ལྷ་སར་ཕྱིན་ཡོད་ཀྱང་དར་རྒྱས་ཀྱི་ད་ལྟའི་ཤི་གསོན་གྱི་གནས་སྟངས་ཕར་ཞོགས། དེང་སྐབས་དར་རྒྱས་ལྷ་ས་ན་ཡོད་མེད་ཙམ་ཡང་ཤེས་རྟོགས་མ་ཐུབ་པར་ཕྱིར་སླེབས་ཡོད་འདུག