༢༠༡༢ ཟླ་ ༦ ཚེས་ ༡ རེས་གཟའ་པ་སངས།
༄༅། །འདི་གར་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༡༢ ཟླ་ ༦ ཚེས་ ༡ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༥ ཚེས་ ༢༨ ཉིན་རྒྱབ་འཕྲོད་བསྟེན་བཀའ་བློན་མཆོག་གིས་པོ་ལི་ཤི་རླུང་འཕྲིན་ (TOK FM) ལས་རིམ་ཐོག་ད་ལྟའི་བོད་ནང་གི་གནས་སྟངས་སྐོར་གསུངས་པ་མ་ཟད། ཕྱི་ཚེས་ ༢༩ ཉིན་པོ་ལན་ཌིའི་གྲོས་ཚོགས་ཀྱི་ཚོགས་མི་མེ་ཌམ་བྷི་ཊ་བྷུབ་ལེ་ཝི་ཛི་ (Madam Beata Bublewicz) མཆོག་དང། པོ་ལི་ཤིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མཆོག་གི་ལྷན་པོ་ལི་ཤི་གྲོས་ཚོགས་ཀྱི་ཚོགས་ཁང་ཞིག་ཏུ་མཇལ་འཕྲད་གནང་བ་དང་ཆབས་གཅིག་ད་ལྟའི་བོད་ནང་གི་ཛ་དྲག་གི་གནས་སྟངས་སྐོར་ཁོང་རྣམ་པར་གསལ་བཤད་གནང་ཡོད། ཕྱོགས་མཚུངས་ཕྱི་ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༦།༥༠ ཐོག་པོ་ལི་ཤི་བརྙན་འཕྲིན་བརྒྱུད་ལམ་ (TVP 1) དུ་བརྙན་འཕྲིན་གྱི་ལས་རིམ་གཙོ་སྐྱོང་བས་ཆེད་དོན་དྲི་བར་ལན་འདེབས་གནང་ཡོད། དེ་བཞིན་ཉིན་རྒྱབ་པོ་ལེན་ཌིའི་གསར་ཤོག་ (Gazeta Wyborcza) ག་ཛི་ཊ་ཝེ་བྷོར་ཛའི་གསར་འགོད་པའི་དྲི་བར་ལན་འདེབས་དང་གསལ་བཤད་གནང་ཡོད། དེ་རྗེས་པོ་ལན་ཌིའི་རྒྱལ་ས་ཝར་སོའི་ནང་རྟེན་གཞི་བྱས་པའི་ཧེལ་སེང་ཀི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཐེབས་རྩ་ཁང་Helsinki Foundation of Human Rights in Warsaw གི་ཚོགས་གཙོ་མཆོག་དང་ལྷན་མཇལ་འཕྲད་གནང་རྒྱུ་ཡིན་འདུག་པ་བཅས།།-