༢༠༡༢ ཟླ་ ༦ ཚེས་ ༢༥རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཆོས་རིག་ལས་ཁུང་ནས་གོ་སྒྲིག་ཐོག་བོད་ཟླ་ ༥ ཚེས་ ༡༠ དང་སྟབས་བསྟུན་གྱིས་ཐེག་ཆེན་ཆོས་གླིང་གཙུག་ལག་ཁང་དུ་མཧཱ་གུ་རུའི་འབུམ་ཚོགས་འབུལ་ཤོམ་ཞུས་མུས་ལྟར་བོད་རྒྱལ་ལོ་ ༢༡༣༩ རབ་གནས་ཆུ་འབྲུག་ལོའི་བོད་ཟླ་ ༥ ཚེས་ ༦ ནས་ ༡༠ དང། ཕྱི་ལོ་ ༢༠༡༢ ཟླ་ ༦ ཚེས་ ༢༥ ནས་ ༢༩ བར་ཉིན་གྲངས་ལྔའི་རིང་༸རྒྱལ་བའི་སྐུ་ཕྱྭ་དང་། བོད་དོན་བདེན་མཐའ་གསལ་ཐབས་སུ་དམིགས་ཏེ་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་འབུལ་བཤམས་ཐོག་རྣམ་རྒྱལ་གྲྭ་ཚང་གི་དགེ་འདུན་འདུས་ཚོགས་ཀྱིས་གཙོས་བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པ་དང་། གློ་བུར་ལྷགས་པའི་དགེ་བཙུན་སྔགས་གསུམ། དེ་བཞིན་མི་མང་བཅས་ཁྱོན་མི་གྲངས་བརྒྱ་ཕྲག་བརྒལ་བ་རྣམས་ནས་བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་གནང་འགོ་ཚུགས་ཡོད། ཉིན་ལྔའི་རིང་གི་མཧཱ་གུ་རུའི་འབུམ་ཚོགས་སྨིན་སྒྲུབ་ཞུ་སྐབས་ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ་དང་། བཞེས་བག གུང་ཚིགས་དཀར་སྐྱོང་། དགེ་བཙུན་སྔགས་གསུམ་ལ་སྐུ་འགྱེད་བཅས་འབུལ་རྒྱུ་ཡིན་འདུག་མ་ཟད། སྔ་དྲོ་ཆུ་ཚོད་ ༦།༣༠ ནས་ ༡༢།༠༠ བར་ཆོས་ཐུན་གཅིག་དང་། ཉིན་རྒྱབ་ཆུ་ཚོད་ ༡།༣༠ ནས་ ༤།༣༠ ཆོས་ཐུན་གཅིག་འཚོགས་རྒྱུ་ཡིན་འདུག་པ་བཅས། །