༢༠༡༢ ཟླ་ ༦ ཚེས་ ༡༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༡༤ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་གོ་སྒྲིག་ཐོག་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་དང་འབྲེལ་མཐུད་པ་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༨ དབུ་འབྱེད་མཛད་སྒོར་ཕྱི་དྲིལ་བཀའ་བློན་མཆོག་གིས་གསུང་བཤད་གནང་དོན། དེ་རིང་འདི་གར་ཕེབས་པའི་ས་གནས་འགོ་འཛིན་དང་འབྲེལ་མཐུད་རྣམ་པ་ཚང་མར་འཚམས་འདྲི་ཞུ་རྒྱུ་ཡིན། ངས་དེ་རིང་འདིར་དོན་ཚན་གཉིས་ཐོག་ཤོད་འདོད་བྱུང། དང་པོ། ང་ཚོ་ཕྱི་འབྲེལ་དང་འབྲེལ་བའི་རྒྱལ་སྤྱིའི་ཐོག་ལ་ང་ཚོའི་སྒྲིག་འཛུགས་ཀྱི་ངོས་ནས་ངོ་བོ་གང་འདྲ་ཞིག་ཟིན་གྱི་ཡོད་མེད་སྐོར་ལ་སྙིང་བསྡུས་ཤིག་ཞུ་རྒྱུ་ཡིན། རྣམ་པ་ཚོས་ཤེས་གསལ་རེད། ང་ཚོས་རྒྱལ་སྤྱིའི་ཐོག་ནས་འབྲེལ་བ་བྱེད་སའི་བརྒྱུད་ལམ་གཙོ་བོ་སྐུ་ཚབ་དོན་གཅོད་རྣམ་པ་ཚོ་ཆགས་ཡོད། དོན་གཅོད་རྣམ་པས་ལས་འགན་ཁག་ལྔའི་ཐོག་འགན་ཁུར་ལེན་བཞིན་ཡོད། ལས་འགན་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་ཕྱི་རྒྱལ་ཡུལ་གྲུ་ཁག་སོགས་ལ་ཆིབས་སྒྱུར་བསྐྱངས་སྐབས་ཆིབས་སྒྱུར་གྲ་སྒྲིག་ཞུ་བཞིན་ཡོད། དེ་བཞིན་ཆབ་སྲིད་ཀྱི་ལས་འགན་སྒྲུབ་བཞིན་ཡོད། དེ་ཡང་སོ་སོའི་ཁྱབ་ཁོངས་གཞུང་དང་གྲོས་ཚོགས། བོད་དོན་རྒྱབ་སྐྱོར་ཚོགས་པ། ས་གནས་རྒྱ་རིགས་ཚོར་འབྲེལ་བ་གནང་གི་ཡོད། སྤྱི་ཚོགས་དང་རིག་གཞུང་ཐོག་གི་ལས་འགན། ས་གནས་ཀྱི་བོད་རིགས་སྤྱི་མཐུན་ཚོགས་པ་སོགས་ལ་འབྲེལ་བ་གནང་བཞིན་ཡོད།
དོན་ཚན་གཉིས་པ། ང་རང་ཕྱི་རྒྱལ་གྱི་ཡུལ་གྲུ་ཁག་ཏུ་འགྲོ་སྐབས། ས་གནས་སུ་ཡོད་པའི་བོད་མི་ཚོར་གང་ཐུབ་ཀྱི་ཐུག་འཕྲད་བྱས་ཏེ་ཁོང་རྣམ་པ་ཚོར་བོད་དོན་རྒྱབ་སྐྱོར་ཚོགས་པར་འབྲེལ་ལམ་ཡག་པོ་བཟུང་ནས་ལས་འགུལ་མཉམ་རུབ་ཐོག་སྤེལ་དགོས་པའི་འབོད་སྐུལ་ཞུས་དང་ཞུ་མུས་ཡིན། ང་ཚོས་ཆབ་སྲིད་ཀྱི་ལས་འགུལ་སྤེལ་སྐབས་བོད་པ་གཅིག་པུ་མ་ཡིན་པར་ས་གནས་ཀྱི་ཡུལ་མི་ཚོས་མཉམ་བཞུགས་བྱ་རྒྱུ་དེ་ཆབ་སྲིད་ཀྱི་ངོ་བོའི་ཐོག་ནས་ཧ་ཅང་གལ་ཆེན་པོ་ཆགས་ཀྱི་ཡོད། ང་ཚོ་བོད་མི་བཙན་བྱོལ་དུ་ཡོད་ཁོངས་ནས་བོད་མི་མང་ཤོས་རྒྱ་གར་དུ་གནས་ཡོད། དེར་བརྟེན་ང་ཚོས་བོད་པའི་གཞིས་ཆགས་གནས་ཡུལ་རྒྱ་གར་གྱི་ཡུལ་མི་དང་འབྲེལ་བ་ཡག་པོ་འཛིན་རྒྱུ་གལ་ཆེན་པོ་ཆགས་ཡོད། ས་གནས་ས་གནས་ཀྱི་རྒྱ་གར་བོད་དོན་རྒྱབ་སྐྱོར་ཚོགས་པས་མཐུན་འགྱུར་བསྐྲུན་རོགས་ཞེས་རེ་འདུན་ཞུས་པ་ལྟར། ང་ཚོས་བརྒྱ་ཆ་བརྒྱ་ཐམ་པ་བསྐྲུན་མ་ཐུབ་ཀྱང་ང་ཚོའི་ངོས་ནས་ནང་ཁུལ་གོ་བསྡུར་གནང་སྟེ་གང་ཐག་གཅོད་བྱུང་བ་དེ་འགྲེལ་བཤད་རྒྱག་དགོས།
དེ་བཞིན་གསར་འགྱུར་བརྒྱུད་ལམ་ཁག་ནང་བོད་དོན་དང་འབྲེལ་བའི་གནད་དོན་བཀོད་ཡོད་ན་དེར་ང་ཚོས་དོ་སྣང་བྱ་རྒྱུ་གལ་ཆེན་པོ་ཆགས་ཡོད། བལ་ཡུལ་ནང་རྒྱ་མིའི་ལག་པ་བརྐྱངས་སྟབས། བལ་ཡུལ་ནང་གནས་སྡོད་བོད་མི་ཚོར་ཧ་ཅང་དཀའ་ངལ་འཕྲད་བཞིན་ཡོད། རྒྱ་གར་དང་རྒྱ་ནག་གཉིས་ནི་ཨེ་ཤི་ཡའི་ནང་གི་སྟོབས་ཆེན་རྒྱལ་ཁབ་གཉིས་ཡིན་སྟབས། རྒྱ་ནག་གིས་བལ་ཡུལ་དུ་ལག་པ་བརྐྱངས་པ་ལྟར། རྒྱ་གར་ནང་བརྐྱངས་ཐུབ་ཀྱི་མ་རེད། འོན་ཀྱང་རྒྱ་ནག་གཞུང་ནས་བོད་པ་གནས་སའི་ས་གནས་སྤྱི་དང་ཡང་སྒོས་རྒྱ་གར་དུ་ཡོད་པའི་བོད་མི་དང་རྒྱ་གར་གྱི་ཡུལ་མི་བར་དཀྲུག་ཤིང་རྒྱག་ཉེན་ཆེ་བས། ང་ཚོ་ཚང་མས་གཟབ་ནན་བྱེད་རྒྱུ་ཧ་ཅང་གལ་ཆེན་ཆགས་ཡོད། ཅེས་སོགས་ཀྱིས་གསུང་བཤད་གནང་ཡོད།