༢༠༡༢ ཟླ་ ༦ ཚེས་ ༣༠ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༨ ཉིན་གྱི་ཕྱེད་ཡོལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༝ཨི་ཊ་ལིའི་གྲོང་ཁྱེར་མི་ལ་ནོའི་ནང་དུ་བོད་མི་དང་སོག་རིགས་རྣམས་ལ་མཇལ་ཁ་དང་བཀའ་སློབ་སྩལ་ཡོད།
དེ་ཡང་ཐོག་མར་མགོན་པོ་གང་ཉིད་མཆོག་གིས་བོད་མི་བོད་མི་ཚོར་བཀའ་སློབ་ཕེབས་དོན། དེ་རིང་འདི་གར་ངོས་རང་ཁྱེད་རང་ཚོ་དང་ཁྱུག་ཙམ་ཐུག་རྒྱུ་བྱུང་བར་བརྟེན་ཧ་ཅང་དགའ་པོ་བྱུང། ཁྱེད་རང་ཚོ་ཚང་མར་འཚམས་འདྲི་ཡོད། ང་ཚོའི་དེ་སྔའི་གཞུང་གི་འགྲོ་སྟངས་དེར་ཁྲིམས་ཀྱི་བརྡར་ཤ་གཅོད་ས་ལྟ་བུ་ཟུར་དུ་མེད་པ་དང་། དབང་ཆ་ཡོངས་རྫོགས་མི་ཉུང་ཤས་ཤིག་གི་ལག་པར་ཡོད་སྟབས། དེའི་དཀའ་ངལ་ཡོད་པ་ཞིག་ངོས་རང་ཆུང་དུས་ནས་མཐོང་གི་ཡོད། སྐབས་དེ་དུས་ནས་ལམ་ལུགས་དེར་བསྒྱུར་བཅོས་གཏོང་དགོས་ཀྱི་རེད་སྙམ་གྱི་ཡོད། ཕྱི་ལོ་ ༡༩༥༡ ལོར་ངོས་ཀྱིས་བོད་མིའི་ཆོས་སྲིད་གཉིས་ཀྱི་འགན་ཁུར་བླངས་པ་ཡིན། ཕྱི་ལོ་ ༡༩༥༢ ལོར་ངག་ཕོད་ཀྱིས་འགོ་ཁྲིད་དེ་ལེགས་བཅོས་ཚོགས་ཆུང་བཙུགས་ཏེ། ཁྲལ་དང་འུ་ལག་རྒྱུག་རྒྱུ་དེ་དག་བསྒྱུར་བཅོས་གཏོང་རྒྱུ་འགོ་འཛུགས་བྱས་པ་རེད། ངག་ཕོད་ལ་གསར་བརྗེའི་བསམ་བློ་ཡག་པོ་ཡོད། དུས་དེ་ནས་བཟུང་གང་ཙམ་ཞིག་ལག་བསྟར་བྱས་ཡོད། རྒྱ་ཆེན་པོ་ཞིག་ལག་བསྟར་བྱེད་ཐུབ་མེད། གང་ལ་ཞེ་ན། རྒྱ་མི་གུང་ཁྲན་གྱི་ལས་ཁུངས་ནས་དེ་དུས་བོད་པས་འགོ་ཁྲིད་ནས་བཅོས་བསྒྱུར་བཏང་བ་ཡིན་ན། བོད་པར་རན་པའི་བཅོས་བསྒྱུར་ཞིག་འགྲོ་གི་རེད། རྒྱ་མི་ཁོ་རང་ཚོས་རྒྱ་ནག་ནང་གི་བཅོས་བསྒྱུར་ལྟ་བུ་ཞིག་གཏོང་འདོད་བྱེད་ཀྱི་ཡོད་པ་དེར་འགན་རྐྱེན་ཆགས་ཀྱི་རེད་བསམས་ཏེ་ཁོ་ཚོས་མོས་པ་བྱས་མེད། དེར་བརྟེན་ང་ཚོར་ལག་བསྟར་འདོད་པ་ཁེངས་པ་ཞིག་གཏོང་རྒྱུ་བྱུང་མེད། སྤྱིར་བཏང་བོད་པའི་སྤྱི་ཚོགས་ཀྱི་ལམ་ལུགས་ལ་ཞན་ཆ་ཡོད་པ་ང་ཚོ་བོད་མིར་ངེས་ཤེས་རྙེད་དེ་བོད་པ་རང་ཉིད་ནས་རང་ཁུལ་གྱིས་བོད་ཀྱི་ལམ་ལུགས་ལ་བཅོས་བསྒྱུར་གཏོང་རྒྱུའི་འདུན་པ་ཡོད། འོན་ཀྱང་རྒྱ་ནག་གུང་ཁྲན་ཏང་གིས་འགོག་རྐྱེན་བཟོས་པ་མ་ཟད། བོད་ནང་གདུག་རྩུབ་ཅན་གྱིས་སྲིད་བྱུས་རིམ་བཞིན་ལག་བསྟར་བྱས་པར་བརྟེན། ལི་ཐང་ཁུལ་ནས་བྱས་ཏེ་རིམ་བཞིན་འུ་ཐུག་ནས་ངོ་རྒོལ་བྱ་རྒྱུ་འགོ་ཚུགས་པ་རེད། གནས་སྟངས་དེ་འདྲ་ཞིག་གི་སྐབས་དེར་ཕྱི་ལོ་ ༡༩༥༦ ལོར་ངོས་རང་རྒྱ་གར་དུ་སླེབས་པ་རེད། ཕྱི་ལོ་ ༡༩༥༧ ལོ་འགོར་བོད་དུ་ལོག་པ་ཡིན། གནས་སྟངས་ཛ་དྲག་ཏུ་དང་རྒྱ་མི་གུང་ཁྲན་གདུག་རྩུབ་བྱེད་ཤུགས་རིམ་བཞིན་ཆེ་རུ་ཕྱིན་ཡང་དེ་འདྲ་བྱས་ནས་བསྡད་པ་རེད། དེ་ནས་ཕྱི་ལོ་ ༡༩༥༩ ལོར་གནས་ཚུལ་ཐབས་སྐྱོ་བོ་ཆགས་ཡོད་པ་མ་ཟད། ཐབས་ཤེས་བྱ་རྒྱུའི་གོ་སྐབས་ཡོངས་སུ་རྫོགས་ཏེ་སོ་སོའི་སྲོག་འགོ་ཐོན་མི་ཐོན་མཚམས་སུ་སླེབས་སྐབས། མཐར་ནོར་གླིང་དུ་སྡོད་ཐབས་མེད་སྟབས་བྲོས་བྱོལ་དུ་འགྲོ་རྒྱུའི་ཐག་གཅོད་བྱས་ཏེ་ཕྱི་ལོ་ ༡༩༥༩ ཕྱི་ཟླ་ ༣ ཚེས་ ༡༧ ཉིན་གྱི་དགོང་དྲོ་ལྷ་སའི་ཆུ་ཚོད་ ༡༠ པའི་ཐོག་ནོར་གླིང་ནས་རྒྱ་གར་དུ་བྲོས་བྱོལ་དུ་ཡོང་བ་རེད། རྒྱ་གར་དུ་བཙན་བྱོལ་ལ་སླེབས་མ་ཐག་འཛིན་སྐྱོང་བཀའ་ཤག་གིས་འཛིན་སྐྱོང་བྱེད་ཕྱོགས་ལ་བཅོས་སྒྲིག་དང་འབྲེལ་མུ་མཐུད་མང་གཙོའི་ལམ་དུ་བསྐྱོད་རྒྱུའི་ཆེད་འབད་བརྩོན་བྱས་པ་ཡིན། དེ་ནས་ཕལ་ཆེར་ ༡༩༦༠ ལོ་འགོར་ཡིན་པ་ཡོད། རྒྱ་གར་རྡོ་རྗེ་གདན་དུ་ང་ཚོས་ཚོགས་ཏེ་སྐབས་དེར་སྦག་ས་ནས་དགེ་འདུན་པ་ཡང་མང་དག་ཅིག་སླེབས་ཡོད། དེ་བཞིན་གདན་སའི་མཁན་པོ་ཡང་གང་ཙམ་ཞིག་ཡོད། སྤྱི་འཐུས་བསྐོ་རྒྱུ་དེ་ནས་འགོ་ཚུགས་པ་རེད། ང་ཚོའི་མང་གཙོའི་ལས་འགུལ་སྐབས་དེ་དུས་ནས་འགོ་བཙུགས་པ་རེད། དེ་ནས་ཕྱི་ལོ་ ༢༠༠༡ ལོར་བཀའ་བློན་ཁྲི་པ་ངོས་ཀྱིས་བསྐོ་གཞག་བྱེད་མི་དགོས་པར་མི་དམངས་ཀྱིས་འོས་འདེམས་བྱས་ནས་བཀའ་བློན་ཁྲི་བསྐོ་རྒྱུ་བྱུང་བ་རེད། དུས་དེ་ནས་བཟུང་ངོས་རང་གི་གནས་སྟངས་ཕྱེད་རྒན་ཡོལ་བྱས་ནས་བསྡད་པ་ཡིན། དེ་བཞིན་འོས་བསྡུ་བྱས་པའི་བཀའ་བློན་དེས་ལོ་ལྔ་ཐེངས་གཉིས་བྱས་རྗེས་ཕྱི་ལོ་ ༢༠༡༡ ལ་སླེབས་སྐབས། མི་མང་ནས་མང་གཙོའི་ཐོག་ལ་དོ་སྣང་ཡག་པོ་ཡོད་སྟབས། ངོས་རང་ཕྱེད་རྒན་ཡོལ་གྱི་གནས་སྟངས་དེ་ནས་རྒན་ཡོལ་ཆ་ཚང་བྱས་ན་རན་པོ་ཡོད་པ་མཐོང་ནས་ངོས་ཀྱིས་ཐག་གཅོད་བྱས་ཏེ། ཕྱི་ལོ་ ༢༠༡༡ ཟླ་ ༣ ནང་ངོས་ཀྱིས་ཡོངས་བསྒྲགས་ཐོག་བརྗོད་ནས་རིམ་བཞིན་དེ་ལྟ་བྱེད་དགོས་པའི་རྒྱུ་མཚན་རྣམས་གསལ་བཤད་བྱས་པ་ཡིན། འགོ་སྟོད་ཕྲན་བུ་གཡང་གཟར་པོ་ལྟ་བུ་བྱུང་སྟེ་༸རྒྱལ་བ་རིན་པོ་ཆེས་དགོངས་པ་ཞུས་ཏེ་འགན་མི་ཁྱེར་བའི་མཐོང་ཚུལ་ལྟ་བུ་ཡང་བྱུང་འདུག བློ་ཕམ་ཕྲན་བུ་ཡོང་གི་རེད། འོན་ཀྱང་རྗེས་ལ་མང་ཆེ་བས་དེར་གནད་འགག་དང་དགོས་པ་རྒྱུ་མཚན་འདུག་ཅེས་མོས་མཐུན་བྱས་ཏེ་གཏན་འབེབས་བྱས་པ་རེད། ངོས་ཀྱིས་ཆབ་སྲིད་ཀྱི་འགན་དབང་དེ་མི་མང་ནས་འོས་འདེམས་བྱས་པའི་འགོ་ཁྲིད་ཚོར་དགའ་ཞིང་སྤྲོ་ཞིང་ཐོག་ནས་རྩིས་སྤྲོད་བྱས་པ་ཡིན། འོན་ཀྱང་ངོས་རང་བོད་མི་ཞིག་ཡིན་པའི་ཆ་ནས་བོད་མིའི་མགྲིན་ཚབ་མཚོན་པའི་ལས་དོན་མུ་མཐུད་བྱ་རྒྱུ་ཡིན། དེར་བརྟེན་ཁྱེད་རང་ཚོས་སེམས་ཁྲལ་མ་བྱས་པར་བློ་བདེ་པོ་བྱས་ནས་སྡོད་ཅེས་སོགས་ཀྱི་བཀའ་སློབ་དང་སོག་རིག་རྣམས་ལ་རང་གི་ཕ་མེས་ནས་བོད་བརྒྱུད་ནང་བསྟན་ལ་གཞི་བཅོལ་ནས་ཡོད་པའི་རིན་ཐང་ཤེས་པའི་སྒོ་ནས་བདག་གཅེས་དགོས་རྒྱུ་ཧ་ཅང་གལ་ཆེ་ཡིན་སྐོར་སོགས་ཀྱི་བཀའ་སློབ་སྩལ་ཡོད་པ་བཅས། །