༢༠༡༢ ཟླ་ ༦ ཚེས་ ༡༦ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༡༦ ཉིན་༸གོང་ས་མཆོག་གིས་དབྱིན་ཡུལ་གྲོང་ཁྱེར་ལིཌ་སི་ (Leeds) ནང་དབྱིན་ཇིའི་ཡོག་ཤེར་རྒྱལ་སྤྱིའི་ཚོང་ལས་ལྷན་ཚོགས་ 
(Yorkshire International Business Convention) ཀྱི་ཚོགས་མི་རྣམས་ལ་བཀའ་སློབ་སྩལ་ཡོད། དེ་ཡང་ཁུལ་དེར་༸ཞབས་སོར་འཁོད་སྐབས་ཐོག་མར་སློབ་ཕྲུག་ཁག་གཅིག་གིས་༸གོང་ས་མཆོག་ལ་ཕེབས་བསུའི་བསྟོད་པའི་གླུ་དབྱངས་འབུལ་ལམ་ཞུས་ཏེ་ཕེབས་བསུ་ཞུས་ཡོད། དེ་རྗེས་ཞུགས་བྲལ་དུ་འཁོད་མཚམས་༸གོང་ས་མཆོག་གིས་བཀའ་སློབ་སྩལ་དོན། ཕྱི་ལོ་ ༡༩༦༠ །༡༩༧༠ ལོ་རབས་སྐབས་ཚོང་ལས་ནང་བཟང་སྤྱོད་སྐོར་ཧ་ལམ་ཤོད་ས་མེད་པ་ལྟ་བུ་རེད། འོན་ཀྱང་ཕྱི་ལོ་ ༡༩༨༠།༡༩༩༠ ལོ་རབས་ནས་བཟུང་གནས་སྟངས་དེར་འགྱུར་བ་ཕྱིན་ཏེ་དེང་སྐབས་ཚོང་ལས་ནང་དུ་བཟང་སྤྱོད་དང་འབྲེལ་བ་ཆགས་ཡོད།
གང་ཡིན་བརྗོད་ན་དེང་སྐབས་རྒྱལ་སྤྱིའི་དཔལ་འབྱོར་གྱི་དཀའ་ངལ་དེ་དག་རྒྱུ་རྐྱེན་གཙོ་བོ་ནི་མིའི་འདོད་རྔམས་དང་མིག་རྒྱང་ཐུང་ངུའི་སྲིད་བྱུས་དེར་ཐུག་ཡོད་སྐོར་ངོས་ཀྱི་གྲོགས་པོ་ཞིག་གིས་བརྗོད་བྱུང། དེ་བཞིན་དབུལ་ཕྱུག་དབར་གྱི་ཁྱད་པར་ཧ་ཅང་ཇེ་ཆེར་འགྲོ་བཞིན་པ་དེ་བཟང་སྤྱོད་ཐོག་ནས་མ་འགྲིག་པ་ཞིག་ཡི་པ་མ་ཟད། ཆབ་སྲིད་ཀྱི་གནས་སྟངས་ཐོག་ནས་ཀྱང་མ་འགྲིག་པ་ཞིག་ཆགས་ཡོད། གལ་ཏེ་དབུལ་པོ་ཚོའི་གནས་སྟངས་ཡར་རྒྱས་གཏོང་མ་ཐུབ་པར་དེ་མུར་ལུས་ཚེ་འཛམ་གླིང་ནང་རྙོག་གྲ་དང་འཚེ་བའི་བྱ་སྤྱོད་ཤུགས་ཆེ་རུ་འགྲོ་ངེས་ཡིན།
ཚོང་ལས་ནང་བཟང་སྤྱོད་གལ་ཆེན་པོ་ཆགས་ཡོད། གང་ཡིན་བརྗོད་ན་རྒྱལ་སྤྱིའི་ཁྲོམ་རྭ་ལྟ་བུའི་ནང་རྒྱལ་ཁབ་མང་པོ་ཕན་ཚུན་ཚོང་འབྲེལ་བྱེད་སྐབས་སུའང་ལས་ཀ་བྱེད་མཁན་ཚང་མ་འགྲོ་བ་མི་ཞིག་ཡིན་པར་བརྟེན། འགྲོ་བ་མིའི་རིན་ཐང་དེ་རང་བཞིན་གྱི་གལ་ཆེན་པོ་ཆགས་ཡོང་གི་ཡོད། འགྲོ་བ་མིའི་རིན་ཐང་དེ་དག་གུས་བརྩི་དང་ཡིད་ཆེས་བསྐྲུན་རྒྱུར་ཧ་ཅང་ཕན་ཐོགས་ཡོད། ཡིད་ཆེས་ཡོད་ན་ཕྱི་གསལ་ནང་གསལ་ཐོག་ནས་ལས་ཀ་བྱེད་ཐུབ། ཕྱི་གསལ་ནང་གསལ་བྱེད་མཁན་གྱི་ཚོང་ལས་སྡེ་ཚོགས་སུ་འདྲ་ཞིག་ཡིན་རུང་གཏམ་སྙན་གྲགས་ཡོང་རྒྱུ་ཡིན། གཏམ་སྙན་གྲགས་ཚང་མར་འདོད་ཀྱི་ཡོད། གལ་ཏེ་ཚོང་པ་ཚོས་དྲང་པོ་དྲང་ཤག་ཐོག་ནས་ཚོང་གི་ལས་དོན་གཉེར་བ་ཡིན་ཚེ་རང་ཉིད་ལ་གདེང་སྤོབས་དང་ཡིད་ཆེས་སླེབས་ཐུབ། རིན་ཐང་དེ་དག་བློ་སྟོབས་ཡོང་རྒྱུའི་གཞི་མ་ལྟ་བུ་ཆགས་ཡོད། དེ་ལས་ལྡོག་སྟེ་གལ་ཏེ་གཞན་ལ་གཡོ་སྒྱུ་དང་སླུ་ཁྲིད་བྱས་ཚེ་རང་ཉིད་སེམས་ནང་གཞན་གྱིས་ཤེས་ཡོང་བསམ་པའི་དངངས་སྐྲག་དང་དོགས་གཞི་ཡོང་རྒྱུ་ཡིན། དེར་བརྟེན་སེམས་ཁྲལ་བཟོ་རྒྱུ་རེད། ང་ཚོ་མཐར་འཆི་ཁར་ནོར་ལོང་སྤྱོད་དང་གཉེན་ཉེ་དུ་ཚང་མ་བཞག་ནས་འགྲོ་དགོས་པར་བརྟེན་སྐབས་དེར་ཕན་ཐོགས་གང་ཡང་མེད། ཅེས་སོགས་ཀྱི་བཀའ་སློབ་སྩལ་རྗེས་དྲི་བ་རྣམས་ལ་བཀའ་ལན་ཡང་སྩལ་ཡོད་པ་བཅས།།
