༢༠༡༢ ཟླ་ ༦ ཚེས་ ༡༢ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༨ ཉིན་ཨ་རིའི་རྒྱལ་ས་ཝ་ཤིང་ཊོན་ནང་རྟེན་གཞི་བྱས་པའི་གྲོས་ཚོགས་ཀྱི་ཚོགས་ཁང་ཞིག་གི་ནང་དུ་ལོ་གན་ཐེབས་རྩ་ཁང་གི་གོ་སྒྲིག་འོག་བོད་ནང་ངལ་རྩོལ་བསྒྱུར་བཀོད་སྐོར་ལ་ཚོགས་འདུ་ཚོགས་སྐབས་ཨ་རིའི་གྲོས་ཚོགས་འཐུས་མི་ཁག་གཅིག་གིས་ཨ་རིའི་གཞུང་ཕྱོགས་ནས་བོད་དང་རྒྱ་ནག་གི་འགྲོ་བ་མིའི་ཐོབ་ཐང་ཐོག་ཁ་ཁུ་སིམ་པོའི་ཐོག་མ་བཞུགས་པར་སྙིང་སྟོབས་ཆེན་པོའི་སྒོ་ནས་གླེང་མོལ་གནང་དགོས་སྐོར་བརྗོད་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། བོད་ནང་ངལ་རྩོལ་བསྒྱུར་བཀོད་སྐོར་ལ་ཚོགས་འདུ་ཚོགས་ཡོད། སྐབས་དེར་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་(Frank Wolf )ཕེ་རན་ཝུ་ཕྷ་ལགས་ཀྱིས་གསུང་བཤད་གནང་དོན། ཨ་རིའི་གཞུང་གིས་ད་ལྟ་དང་སྐབས་སྔ་མའི་གཞུང་འཛིན་གཉིས་ནས་བོད་ཀྱི་གནད་དོན་ཐོག་རྒྱབ་སྐྱོར་ཡག་པོ་གནང་ཐུབ་མེད་པ་རེད། ལྷག་པར་དེ་སྔ་པེ་ཅིང་དུ་བཅའ་བཞུགས་ཨ་རིའི་གཞུང་ཚབ་པས་བོད་དོན་ཆེད་སྐད་ཆ་ཚིག་གཅིག་ཀྱང་བཤད་མེད། དེར་བརྟེན་ཨ་རིའི་མི་མང་དང་གྲོས་ཚོགས་གཉིས་ནས་ཤུགས་སྣོན་བརྒྱབ་སྟེ་མ་འོངས་པར་ཨ་རིའི་སྲིད་འཛིན་དང་གྲོས་ཚོགས་ཀྱི་འཐུས་མི་འོས་འདེམས་བྱེད་སྐབས། བོད་ཀྱི་གནད་དོན་དེ་བཞིན་གལ་འགངས་ཆེ་བའི་གནད་དོན་ལ་བསྒྱུར་ཐབས་བྱེད་དགོས་ཞེས་གསུངས་ཡོད། དེ་བཞིན་གྲོས་ཚོགས་ཀྱི་འཐུས་མི་སྐུ་ཞབས་(Chris Smith)ཆ་རི་སེ་སིམ་ཐ་ལགས་ཀྱིས་གསུང་བཤད་གནང་དོན། ཨ་རིའི་གཞུང་ཕྱོགས་ནས་ད་བར་འགྲོ་བ་མིའི་ཐོབ་ཐང་གནད་དོན་ཐོག་རྒྱ་ནག་གི་དཔོན་རིགས་ཆེ་ཁག་དང་མ་ཡིན་པར་དཔོན་རིགས་དཀྱུས་མ་ཁོ་ནར་གླེང་མོལ་བྱས་པའི་དབང་གིས་ཨ་རི་དང་རྒྱ་ནག་གི་འགྲོ་བ་མིའི་ཐོབ་ཐང་ལ་གྲུབ་འབྲས་དེ་ཙམ་ཐོན་མེད། ངའི་རེ་བར་ཨ་རིའི་གཞུང་ཕྱོགས་ནས་མ་འོངས་པར་རྒྱ་ནག་དང་ལྷན་འབྲེལ་བའི་གནད་དོན་ལ་བསྙད་འདོགས་བྱས་ནས་བོད་ཀྱི་གནད་དོན་ཐོག་ཁ་ཁུ་སིམ་པོའི་ཐོག་སྡོད་རྒྱུ་མེད་པའི་རེ་འདུན་ཞུ་བཞིན་ཡོད་ཅེས་གསུངས་འདུག་པ་བཅས། །