༢༠༡༢ ཟླ་ ༦ ཚེས་ ༨ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༨ ཉིན་འདི་གར་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་བཏང་གནས་ནང་འཁོད་དོན། སྔ་འགྱུར་བསྟན་པའི་སྲོག་ཤིང་༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་སྔ་འགྱུར་རྙིང་མའི་ཆོས་བརྒྱུད་ཡོངས་ཀྱིས་སྤྱི་མོས་ཀྱི་སྔ་འགྱུར་རྙིང་མའི་དབུ་འཛིན་ཁྲི་རབས་དྲུག་པར་ཇི་ལྟར་གསོལ་བ་བཏབ་པ་བཞིན་༸སྐྱབས་རྗེ་རིན་པོ་ཆེ་མཆོག་ནས་ཞལ་བཞེས་བཀའ་དྲིན་ལེགས་ཐོབ་བྱུང་བ་དང་། ཉེ་ཆར་ས་ག་ཟླ་བའི་ཚེས་ ༡༥ ཚེས་བཟང་དགེ་བའི་ཉིན་གྱི་སྔ་དྲོའི་ཆར་རྒྱལ་བསྟན་ཡོངས་རྫོགས་ཀྱི་མངའ་བདག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གསར་མཇལ་ཞུ་རྒྱུའི་བཀའ་དྲིན་བསྐྱངས་བར་ཐུགས་བརྩེ་ཆེན་པོས་ཞལ་མོལ་དང་རྟེན་གཙོ་ཐུབ་པའི་དབང་པོའི་སྐུ་བརྙན་གཅིག་དང་།
སློབ་དཔོན་རིན་པོ་ཆེའི་སྐུ་བརྙན་མཇལ་དར་མདུད་བཅས་གསོལ་སྩལ་གནང་བས་མངའ་གསོལ་གཟེངས་བསྟོད་ཀྱིས་བསྟན་འགྲོ་སྤྱི་བྱེར་སྨན་པ་དང་སྐུ་ཚེ་བསྐལ་བརྒྱར་བརྟན་པའི་ཐུགས་སྨོན་འཚམས་སྦྱོར་དང་བཅས་བཀྲ་ཤིས་པའི་རྟེན་འབྲེལ་སྔོན་སོང་ཐོག་བོད་ཚེས་ ༡༧ ཉིན་སྔ་འགྱུར་རྙིང་མའི་གདན་ས་ཆེན་པོ་དྲུག་གི་ཡ་གྱལ་ཐུབ་བསྟན་རྡོ་རྗེ་བྲག་ཨེ་ཝམ་ལྕོག་སྒར་ཆོས་འཁོར་རྣམ་རྒྱལ་གླིང་དུ་མཛད་སྒོ་དངོས་གཞིར་སྔ་དྲོ་ཆུ་ཚོད་ ༩ ཐོག་མཁྱེན་བརྩེ་ཡང་སྲིད་རིན་པོ་ཆེ་མཆོག་གིས་གཙོས་རྒྱ་བལ་འབྲུག་གསུམ་ནས་རིས་མེད་དགོས་སྡེ་ཁག་གི་སྐུ་ཚབ་བླ་སྤྲུལ་རྣམ་པ་དང༌། དཔལ་ལྡན་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང༌། དཔལ་ལྡན་ཆོས་རིག་དྲུང་ཆེ་ངག་དབང་ཆོས་གྲགས་ལགས།
ས་གནས་འཐུས་ཚོགས་ཀྱི་ཚོགས་གཙོ་དང་། གཞིས་འགོས་གཙོས་ཚོགས་པ་ཁག་གི་མཛད་གཙོ་རྣམ་པ་དང་སེར་སྐྱ་མི་མང་བཅས་ལྷན་འཛོམས་ཐོག་སྐྱབས་རྗེ་རིན་པོ་ཆེ་མཆོག་གཟིམ་ཆུང་ནས་འདུ་ཁང་དུ་གདན་ཞུས་ཀྱི་བཀྲིས་བརྩེགས་པ་དང་གནས་བརྟན་ཕྱག་མཆོད་གསུང་འདོན་གནང་གྲུབ་བསྟུན་རྟེན་འབྲེལ་གྱི་གསོལ་ཇ་འབྲས་སིལ་ཕུལ། དེ་རྗེས་མཁན་པོ་བསོད་ནམས་བཀྲ་ཤིས་ལགས་ཀྱིས་སྐྱབས་རྗེ་རིན་པོ་ཆེའི་མཛད་རྣམ་སྙིང་བསྡུས་ཤིག་སྒྲོག་སྦྱང་གནང་མཚམས་ཆོས་རིག་དྲུང་ཆེ་ངག་དབང་ཆོས་གྲགས་ལགས་ཀྱིས་སྐྱབས་ཐོ་སྙན་སྒྲོན་ཞུས་རྗེས་མཎྜལ་རྟེན་གསུམ་འདེགས་འབུལ་གྱི་བླ་སྤྲུལ་ཁག་དང་མཛད་གཙོ་རྣམ་པ། དེ་བཞིན་སེར་སྐྱ་མི་མང་ལ་མཇལ་ཁ་གནང་རྗེས་མི་མང་ནས་དགའ་སྤྲོའི་གཞས་སྣ་འཁྲབ་སྟོན་སོགས་ཞུས་རྗེས་དགོན་པའི་གཉེར་པ་དབུ་ཟུར་ཡར་འཕེལ་ལགས་ཀྱིས་ཐུགས་རྗེ་ཆེ་ཞུས་ཏེ་མཛད་སྟོན་གྲོལ་བ་བཅས་སུ།།
