༢༠༡༢ ཟླ་ ༦་ཚེས་ ༡༤ རེས་གཟའ་ཕུར་བུ།

༄༅། །ཕྱི་ལོ་ ༢༠༡༢ ཟླ་ ༦ ཚེས་ ༡༢ རེས་གཟའ་མིག་དམར་ཉིན་ཕ་རན་སིའི་གྲོང་ཁྱེར་སི་ཊར་སི་བྷག་ཏུ་ (Strasbourg ) ཡུ་རོབ་གྲོས་ཚོགས་ཀྱི་ཕྱི་འབྲེལ་དང་བདེ་འཇགས་ཆབ་སྲིད་སྐོར་གྱི་ལྷན་ཚོགས་སྐབས་སུ། ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་སྐུ་ཞབས་ཐོ་མ་སི་མན་ (Thomas Mann) མཆོག་དང་ཁི་རི་སི་ཊི་ན་ཨོ་ཇུ་ལན་ཌི་ (Kristiina Ojuland) མཆོག་གིས་ཡུ་རོབ་ནང་བོད་དོན་དམིགས་བསལ་འབྲེལ་མཐུད་པ་ཞིག་བསྐོ་གཞག་བྱེད་དགོས་པའི་དགོས་འདུན་ཤུགས་ཆེ་བཏོན་ཡོད་པ་མ་ཟད། གྲོས་ཚོགས་ཀྱི་འཐུས་མི་ལྕམ་སྐུ་ཨ་ན་གོམ་སི་ (Ana Gomes) མཆོག་གིས་རྒྱག་ནག་དེ་བཞིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་གཏན་འཇགས་ཚོགས་མི་ལྔའི་ཁོངས་སུ་ཡོད་པར་བརྟེན་བོད་མིའི་འགྲོ་བ་མིའི་ཐོབ་ཐང་ལ་བརྡལ་བཤིག་བཏང་བ་དེར་ངོས་ལེན་བྱ་ཐབས་བྲལ། བོད་མི་ཚོར་རང་གི་ཐུན་མིན་རིག་གཞུང་དང་ངོ་བོ་སྲུང་སྐྱོབ་དང་གཅེས་འཛིན་བྱ་རྒྱུའི་རང་དབང་དང་ཐོབ་ཐང་ཆ་ཚང་ཡོད། དེང་སྐབས་རྒྱ་ནག་གཞུང་གིས་བོད་ནང་ཡུལ་སྐོར་སྤྲོ་འཆམ་པ་དང་ཕྱི་རྒྱལ་གསར་འགོད་པ། དེ་བཞིན་ཕྱི་རྒྱལ་གཞུང་འབྲེལ་མི་སྣ་སུ་གཅིག་མ་བཏང་བར་བོད་དེ་འཛམ་གླིང་ཕྱི་ལ་སྒོ་བརྒྱབ་པའི་བྱ་སྤྱོད་དང། བོད་མིས་རང་ལུས་མེར་སྲེག་བཏང་བ་དང་རྒྱ་ནག་གཞུང་གིས་བོད་མི་མང་པོ་འཛིན་བཟུང་བྱས་པ། དེ་བཞིན་པཎ་ཆེན་རིན་པོ་ཆེ་གར་ཡོད་ཐོག་གསལ་བཤད་བྱ་རྒྱུ་སོགས་གནད་དོན་དེ་དག་ཐོག་འགན་ཁུར་གང་ཡང་དང་ལེན་མ་བྱས་པ་དེར་ང་ཚོས་རྩ་བ་ནས་ངོས་ལེན་བྱེད་ཐབས་བྲལ། ཞེས་གསུངས། ཕྱོགས་མཚུངས་གྲོས་ཚོགས་འཐུས་མི་ལྕམ་སྐུ་ཨི་ཝ་ལེ་ཆིན་བྷར་གར་ (Eva Lichtenberger) མཆོག་གིས་ལྗང་ཁུ་ཚོགས་པའི་ཚབ་ཞུས་ཏེ་བོད་ཀྱི་འབྲོག་པ་ཚོར་བཙན་དབང་འོག་གཏན་འཇགས་གཞིས་སྤོས་བྱེད་བཅུག་པའི་སྲིད་བྱུས་དེར་མཐའ་གཅིག་ཏུ་དགག་པ་བརྒྱབ་ཡོད་པ་བཅས།།