༢༠༡༢ ཟླ་ ༦ ཚེས་ ༡༦ རེས་གཟའ་སྤེན་པ།
༄༅། །ཉེ་ལམ་བོད་མདོ་སྨད་གཅན་ཚ་རྫོང་གི་གཅན་ཚ་ཐང་ཤང་ལོ་བ་སྡེ་བའི་རང་ལོ་ ༦༤ ཡིན་པ་བོད་མི་འབྲོག་པ་རྟ་མགྲིན་ཐར་ལགས་ཀྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བར་བོད་མིའི་སྒྲིག་འཛུགས་ལ་ཧ་ཅང་བློ་ཕམ་ཡོད། རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་དེ་ཕན་འབྲས་མེད་པར་བརྟེན་འཕྲལ་མར་མཚམས་འཇོག་ཐོག་བོད་མིས་རང་ལུས་མེར་སྲེག་བཏང་བའི་དོན་རྐྱེན་དེ་དགོག་ཐབས་བྱེད་དགོས་པ་བོད་མིའི་སྒྲིག་འཛུགས་ཀྱིས་དགོས་འདུན་ཤུགས་ཆེ་འདོན་རྒྱུ་ཡིན། རྟ་མགྲིན་ཐར་ལགས་ཀྱིས་ཕྱི་ཚེས་ ༡༥ ཉིན་བོད་ནང་གི་སྔ་དྲོ་ཆུ་ཚོད་ ༦།༣༠ ཐོག་རྫོང་དྲག་ཆས་ལས་ཁུངས་ཀྱི་སྒོ་མདུན་དུ་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་དེར་ཞི་རྒོལ་ཆེད་རང་ལུས་མེར་སྲེག་བཏང་ཡོད།
རྒྱ་གཞུང་གིས་རྟ་མགྲིན་ཐར་ལགས་ཀྱི་སྐུ་ཕུང་བཙན་ཁྱེར་བྱས་ཡོད་ཀྱང་རྗེས་སུ་སྐུ་ཕུང་ཁོང་གི་ནང་མིར་ཚུར་སྤྲད་ཡོད། ས་གནས་བོད་མི་སེར་སྐྱ་སྟོང་ཕྲག་མང་པོས་ཁོང་གི་ཞུགས་འབུལ་སྐབས་གདུང་སེམས་མཉམ་སྐྱེའི་རྣམ་པ་ཤུགས་ཆེ་བསྟན་ཡོད། རྟ་མགྲིན་ཐར་ལགས་ལ་ཟ་ཟླ་བུ་ཕྲུག་ཡོད་འདུག གནས་ཚུལ་ཐོན་པར་གཞིགས་ན་ལོ་ཤས་སྔོན་རྒྱ་ནག་གཞུང་གིས་འབྲོག་པ་གཞི་སྤོས་ཟེར་བའི་སྲིད་བྱུས་འོག་ཁོང་དང་ཁོང་གི་ནང་མི་ཚོར་གྲོང་གསེབ་ཁུལ་དུ་གནས་སྤོ་བྱེད་དགོས་པའི་བཙན་བཀའ་བཏང་འདུག
ད་ལྟའི་ཆར་གཅན་ཚའི་ཁུལ་དུ་རྒྱ་མིའི་དྲག་ཆས་ཉེན་རྟོག་དམག་མི་བརྒྱ་ཕྲག་མང་པོ་འགྲེམས་འཇོག་བྱས་ཏེ་བོད་མི་ཚོའི་འགྲོ་སྡུག་ལ་སྟངས་འཛིན་བྱེད་བཞིན་པར་བརྟེན་གནས་སྟངས་ཧ་ཅང་ཛ་དྲག་ཆགས་ཡོད། རྒྱ་ནག་གཞུང་གིས་བོད་ནང་ད་ལྟ་བོད་མིའི་དངོས་ཡོད་ཀྱི་དཀའ་ངལ་དེ་དག་ཞི་བའི་ལམ་ནས་སེལ་ཐབས་ཀྱིས་ཕུགས་བརྟན་འཕེར་བའི་ཐབས་ལམ་ལག་བསྟར་དགོས་ཞེས་འབོད་སྐུལ་ནན་བརྗོད་ཞུ་རྒྱུ་ཡིན། ཕྱི་ལོ་ ༢༠༠༩ ལོ་ནས་ད་བར་བོད་ཀྱི་ས་ཁུལ་འདྲ་མིན་ནས་བོད་མི་ ༣༩ རང་ལུས་མེར་སྲེག་བཏང་སྟེ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་དེར་ཞི་རྒོལ་བྱས་ཡོད། ཕྱི་ཟླ་ ༥ ནང་བོད་ཀྱི་རྒྱལ་ས་ལྷ་སའི་ཇོ་ཁང་མདུན་དུ་བོད་མི་གཉིས་ཀྱིས་རང་ལུས་མེར་བཏང་བ་མ་ཟད། བོད་བྱང་ཤར་ཛམ་ཐང་ཁུལ་དུ་རི་ཀྱོ་ལགས་ཀྱིས་རང་ལུས་མེར་སྲེག་བཏང་ཡོད།།
