༢༠༡༢ ཟླ་ ༦ ཚེས་ ༥ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༣ ཉིན་གྱི་ཕྱེད་ཡོལ་ཆུ་ཚོད་ ༢།༡༥ ཐོག་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་རྡ་སྟེང་བོད་ཁྱིམ་ཚོགས་ཁང་དུ་བོད་རིགས་མཐོ་སློབ་གཞོན་སྐྱེས་རྣམས་ལ་བཙན་བྱོལ་བོད་མིའི་མང་གཙོའི་འཕེལ་རིམ་དང་གྲོས་ཚོགས་ཀྱི་ལས་དོན་གནང་ཕྱོགས་སྐོར་གསུང་བཤད་གནང་དོན། དེ་རིང་འདི་གར་༸གོང་ས་མཆོག་གི་བཀའ་ཆོས་ཞུ་བར་བཅར་མཁན་སློབ་ཕྲུག་རྣམས་ལ་ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ང་ཚོས་མང་གཙོའི་དུས་ཆེན་སྲུང་བརྩི་ཞུས་དང་ཞུ་མུས་ཡིན་པ་དེ་བཞིན་ཕྱི་ལོ་ ༡༩༦༠ ཟླ་ ༢ ཚེས་ ༣ ཉིན་བོད་མི་གང་ཡོད་པ་དེ་དག་རྡོ་རྗེ་གདན་དུ་འཛོམས་ཏེ་༸གོང་ས་ལ་མཆོག་ལ་བརྟན་བཞུགས་བསྟར་འབུལ་ཞུས་རྗེས་མགོན་པོ་གང་ཉིད་མཆོག་གི་བཀའ་སློབ་ལམ་སྟོན་ཕེབས་པ་གཞིར་བཟུང་ང་ཚོས་སྒྲུབ་ཀྱི་ཡིན་ཞེས་མནའ་གན་མཐུ་མོ་ཆེ་བཞག་འདུག དེའི་སྐབས་སུ་༸གོང་ས་མཆོག་གིས་མང་ཚོགས་ལ་དངོས་སུ་ང་ཚོའི་ཆབ་སྲིད་ཀྱི་ལམ་ལུགས་དེ་མང་གཙོའི་ལམ་ལུགས་ཐོག་འགྲོ་དགོས་ཀྱི་འདུག་ཅེས་བཀའ་སློབ་དང་པོ་དེ་ཕེབས་ཡོད། དེའི་གོང་ཕྱི་ལོ་ ༡༩༥༩ ཟླ་ ༡༡ ནང་སྐབས་དེའི་བཀའ་བློན་རྣམ་པ་ཚོ་དང་ལས་བྱེད་ཚོར་འཛམ་གླིང་ནང་འགྱུར་བ་མང་དག་ཅིག་འགྲོ་བཞིན་ཡོད་པར་བརྟེན། ང་ཚོའི་འགྲོ་ལུགས་འགྲོ་སྟངས་ཡིན་རུང་འགྱུར་བ་གཏང་སྟེ། མང་གཙོ་ཚད་ལྡན་གྱི་ལམ་ལུགས་ཤིག་ཏུ་འགྲོ་དགོས་ཀྱི་རེད། ཅེས་བཀའ་སློབ་སྩལ་ཡོད། ༸གོང་ས་མཆོག་གིས་ཐུགས་རེ་མཛད་པ་བཞིན་ང་ཚོའི་མང་གཙོའི་འཕེལ་རིམ་ནང་གོམ་པ་བརྒྱབ་ཐུབ་ཡོད་དམ་ཞེ་ན། དེའི་སྐབས་ལ་ཐུབ་མེད། ༸གོང་ས་མཆོག་གིས་ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་མོར་སྤྱི་འཐུས་སྐབས་དང་པོས་དམ་ཕུལ་རྗེས་ཕྱི་ལོ་ ༡༩༦༡ ནང་མ་འོངས་བོད་པའི་རྩ་ཁྲིམས་སྙིང་དོན་ཞེས་པ་བཏོན་གནང་ཡོད། དེ་གཞི་ལ་བཞག་སྟེ་སླར་ཡང་མ་འོངས་བོད་ཀྱི་རྩ་ཁྲིམས་ཞེས་རྒྱས་པའི་ཡིག་ཆ་ཞིག་ཕྱི་ལོ་ ༡༩༦༣ གསུམ་བཅུའི་དུས་དྲན་གྱི་ཉིན་མོར་གསལ་བསྒྲགས་བསྐྱངས་པ་རེད། ངས་ནམ་རྒྱུན་ནས་མང་གཙོའི་འཕེལ་རིམ་འགྲེལ་བཤད་རྒྱག་སྐབས། ལེའུ་གསུམ་དུ་ཕྱེ་གི་ཡོད། དང་པོ། ཕྱི་ལོ་ ༡༩༦༠ ནས་ ༡༩༩༠ བར་བཀའ་བློན་བསྐོ་གཞག་༸གོང་ས་མཆོག་གིས་མཛད་ཀྱི་ཡོད། ཕྱི་ལོ་ ༡༩༦༠ ནས་ ༦༩ བར་བཀའ་བློན་རྣམ་པ་དང་སྤྱི་འཐུས་རྣམ་པ། དྲུང་ཆེ་རྣམ་པ་སོགས་ཀྱིས་ཆེས་མཐོའི་རྒྱུན་ལས་ཞེས་པ་ཞིག་ཟླ་བ་དྲུག་གི་ནང་རེ་རེ་ཚོགས་ཏེ་གནས་ཚུལ་ཐག་གཅོད་གནང་གི་ཡོད། ཕྱི་ལོ་ ༡༩༦༩ ལོར་༸གོང་ས་མཆོག་གིས་བཀའ་སློབ་ཕེབས་ཏེ་ལོ་འཁོར་ལས་སྡོམ་ཚོགས་ཆེན་ཞེས་པ་ཞིག་ཚོགས་འགོ་ཚུགས་པ་རེད། མདོར་ན། ཕྱི་ལོ་  ༡༩༦༠ ནས་ ༡༩༩༠ དང་། ༡༩༩༡ ནས་ ༢༠༠༡། ༢༠༡༡ བཅས་སོ་སོར་༸གོང་ས་༸སྐྱབས་མགོན་ཆེན་པོ་མཆོག་གིས་མང་གཙོའི་འཕེལ་རིམ་གྱི་གོམ་སྟབས་ཆེན་པོ་སྐྱོན་གནང་མཛད་ཡོད། ཅེས་སོགས་ཀྱི་གསུང་བཤད་གནང་རྗེས་སློབ་ཕྲུག་གི་དྲི་བ་ཁག་ལ་ལན་འདེབས་ཀྱང་གནང་ཡོད་པ་བཅས། །