༢༠༡༢ ཟླ་ ༦ ཚེས་ ༡༡ རེས་གཟའ་ཟླ་བ།
༄༅། །རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བཞི་པ་དེ་བཞིན་ཕྱི་ལོ་ ༢༠༡༢ ཟླ་ ༦ ཚེས་ ༩ རེས་གཟའ་སྤེན་པའི་སྔ་དྲོ་ཆུ་ཚོད་ ༩ ཐོག་བོད་ཀྱི་ཟློས་གར་ཚོགས་ཁང་དུ་དབུ་འཛུགས་གནང་ཡོད།
དེ་ཡང་ཚོགས་ཆེན་ཐོག་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གིས་གསུང་བཤད་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་ཕྱག་སྔོན་དུ་བཏང་བའི་ཐོག་ནས་འདི་གར་ཕེབས་པའི་རྒྱ་གར་བོད་དོན་རྒྱབ་སྐྱོར་བ་རྣམས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། རྒྱ་གར་གཞུང་དམངས་གཉིས་ནས་ད་བར་བོད་དོན་ཐོག་རྒྱབ་སྐྱོར་གནང་དང་གནང་མུས་རེད། བོད་མིའི་མང་གཙོའི་འཕེལ་རིམ་ནང་དུ་གནད་འགག་ཅན་གྱི་དུས་ཚོད་འདིར་མི་དམངས་ནས་མང་གཙོའི་འགྲོ་ལུགས་ཐོག་ནས་འདེམས་ཐོན་བྱུང་བའི་འགོ་ཁྲིད་རྣམས་རྒྱ་གར་དུ་སྐྱེས་ཤིང་འཚར་ལོངས་བ་ཞིག་ཆགས་ཡོད། ཕྱོགས་གཅིག་ནས་བོད་མིའི་འཚེ་བ་མེད་པའི་ལས་འགུལ་དེ་བཞིན་དངོས་ཤུགས་བརྒྱུད་གསུམ་ནས་རྒྱ་གར་ནང་འཛུགས་སྐྲུན་བྱུང་བའི་བོད་མིའི་ལས་འགུལ་ཞིག་རེད་ཅེས་བརྗོད་ན་མི་ཆོག་མེད། མང་གཙོའི་གོམ་སྟབས་གསར་པ་འདིའི་འོག་ལ་འགོ་ཁྲིད་རྣམས་ལ་རྒྱ་གར་ནང་སྐྱེས་ཤིང་འཚར་ལོངས་བྱུང་བ་ཞིག་ཆགས་ཡོད། མང་གཙོའི་འགྲོ་ལུགས་ཀྱང་རྒྱ་གར་གྱི་ལམ་ལུགས་ནས་དཔེ་བླངས་པ་ཞིག་ཡིན། རྒྱ་གར་རྒྱལ་ཁབ་འདི་ནི་བོད་དོན་ཐོག་རྒྱབ་སྐྱོར་སྲ་གཏན་གནང་མཁན་ཞིག་ཆགས་ཡོད་སྟབས། མི་ལོ་ལྔ་བཅུ་ལྷག་རིང་འགྱུར་མེད་ཐོག་རྒྱབ་སྐྱོར་གནང་བ་མ་ཟད། གནས་ཚང་གཡར་བ་སོགས་ང་ཚོར་ཧ་ཅང་བཀའ་དྲིན་ཆེན་པོ་ཡིན། དེར་བརྟེན་ང་ཚོས་ཁྱེད་རྣམས་ཀྱི་བཀའ་དྲིན་དུས་རྟག་ཏུ་དྲན་བཞིན་ཡོད་ལ་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་རྒྱ་གར་གྱི་ཕྱི་སྲིད་བློན་ཆེན་མཆོག་རྒྱ་ནག་ཏུ་བསྐྱོད་སྐབས། རྒྱ་ནག་གི་སྲིད་བློན་གཞོན་པ་ལི་ཁ་ཆང་གིས་རྒྱ་དཀར་ནག་གཉིས་ཀྱི་འབྲེལ་བ་དེ་དུས་རབས་ཉེར་གཅིག་གི་གནད་འགག་ཆེ་ཤོས་ཀྱི་འབྲེལ་ལམ་ཆགས་རྒྱུ་ཡིན་སྐོར་བརྗོད་འདུག གསུང་མོལ་དེ་ནས་ཨ་རིའི་སྲིད་འཛིན་ཨོ་བྷ་མ་མཆོག་གིས་ཀྱང་དེ་སྔ་རྒྱ་གར་གྱི་གྲོས་ཚོགས་ནང་ཨ་རི་དང་རྒྱ་གར་དབར་འབྲེལ་བ་དེ་བཞིན་དུས་རབས་ཉེར་གཅིག་གི་གནད་འགག་ཅན་ཞིག་ཆགས་རྒྱུ་རེད། ཅེས་གསུངས་ཡོད། ད་ལྟའི་དུས་འདིར་རྒྱ་གར་གྱིས་བོད་དོན་ལ་སྔར་ལྷག་རྒྱབ་སྐྱོར་གནང་རྒྱུའི་དུས་ཚོད་གནད་འགག་ཅན་ཞིག་ལ་སླེབས་འདུག རྒྱ་གར་གྱི་རྒྱལ་སྲུང་དང་ཁོར་ཡུག་ཐོག་ནས་བརྗོད་ན། བོད་དེ་གནད་འགག་ཅན་ཞིག་ཆགས་ཡོད། བོད་ནང་བོད་མི་ ༣༨ ནས་བོད་ཀྱི་བདེན་དོན་ཆེད་རང་ལུས་མེར་སྲེག་གཏོང་སྐབས། མི་གཞན་སུ་གཅིག་ལ་གནོད་འཚེ་བྱས་མེད་པ་དེ་ནི་འཚེ་བ་མེད་པའི་ལྟ་སྤྱོད་ཆགས་ཡོད། དེ་བཞིན་རྒྱ་གར་བོད་དོན་ལ་རྒྱབ་སྐྱོར་གནང་མཁན་སོགས་ཀྱིས་རྒྱབ་སྐྱོར་གནང་འབྲས་ལ་བརྟེན་ནས་ཉིན་ཞིག་ང་ཚོ་བོད་དུ་ཕྱིར་ལོག་ཐུབ་པའི་རེ་བ་བྱེད་བཞིན་ཡོད། ཅེས་སོགས་ཀྱི་གསུང་བཤད་གནང་ཡོད།
