༢༠༡༢ ཟླ་ ༦ ཚེས་ ༧ རེས་གཟའ་ཕུར་བུ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༢ ཟླ་ ༦ ཚེས་ ༦ ཉིན་བཏང་གནས་ནང་འཁོད་དོན། བོད་ནང་གི་གནས་སྟངས་ཛ་དྲག་དང་དམ་བསྒྲགས་ཇེ་ཆེར་འགྲོ་བཞིན་ཡོད་པར་བརྟེན། གཞིས་བཞུགས་བོད་མི་རྣམས་ཀྱིས་བོད་སྤྱི་དོན་ཆེད་རང་སྲོག་བློས་གཏོང་གནང་དང་གནང་མུས་ཡིན་སྟབས། ཉེ་དུས་ཕྱི་ཟླ་ ༥ ཚེས་ ༢༧ ཉིན་བོད་ཀྱི་རྒྱལ་ས་ལྷ་སའི་གཙུག་ལག་ཁང་གི་མདུན་ཐང་དུ་ཕ་ཡུལ་མདོ་སྨད་བླ་བྲང་རྫོང་ཁོངས་ནས་ཡིན་པའི་རྡོ་རྗེ་ཚེ་བརྟན་ལགས་དང་། མདོ་སྨད་རྔ་པ་ནས་ཡིན་པའི་དར་རྒྱས་ལགས་རྣམ་གཉིས་ཀྱིས་རང་ལུས་མེར་སྲེག་བཏང་བ་དང་། ཡང་ཕྱི་ཟླ་ ༥ ཚེས་ ༣༠ ཉིན་རྔ་བ་ནས་ཡིན་པའི་བུད་མེད་རི་ཀྱོ་ལགས་ཀྱིས་ནང་མི་བུ་ཕྲུག་བཞག་ནས་རང་ལུས་མེར་སྲེག་བཏང་སྟེ། རྡོ་རྗེ་ཚེ་བརྟན་ལགས་དང་རི་ཀྱོ་ལགས་གཉིས་འདས་གྲོངས་གྱུར་ཡོད། དར་རྒྱས་ལགས་རྒྱ་དམག་གིས་བཙན་འཁྲིད་བྱས་ནས་ད་ལྟ་འདས་གསོན་གནས་སྟངས་ཅི་ཡིན་ཤེས་རྟོགས་མེད་པར་གྱུར་ཡོད། དེར་བརྟེན་ང་ཚོས་རྒྱལ་གཅེས་དཔའ་བོ་དཔའ་མོ་དེ་དག་གི་ཞུམ་པ་མེད་པའི་སྙིང་སྟོབས་ལ་རྗེས་དྲན་དང་། འདས་གྲོངས་སུ་འགྱུར་བའི་དཔའ་བོ་དང་དཔའ་མོ་ཁོང་རྣམ་པའི་བདུན་ཚིགས་དང་པོ་སྲུང་བརྩི་ཞུ་ཆེད་ཕྱི་ཟླ་ ༦ ཚེས་ ༥ རེས་གཟའ་མིག་དམར་དགོང་དྲོ་ཐེ་ཝན་རང་དབང་ཐང་ཆེན་གྱི་མདུན་ཐང་དུ་ཐེ་ཝན་ནང་གནས་སྡོད་ཆོས་ལུགས་རིས་མེད་ཀྱི་དགེ་འདུན་པ་རྣམས་དང་། ཐེ་ཝན་དུ་གནས་སྡོད་བོད་རིགས་ཚོགས་པ། ས་གནས་གཞོན་ནུའི་ཚོགས་མི། ཐེ་ཝན་སློབ་ཕྲུག་བོད་དོན་རྒྱབ་སྐྱོར་ཚོགས་པ་སོགས་ཁྱོན་མི་གྲངས་ལྔ་བཅུ་ཙམ་མཉམ་འཛོམས་ཀྱིས་བདུན་ཚིགས་དང་པོའི་མཆོད་འབུལ་སྨོན་ལམ་གསུང་འདོན་གནང་ཡོད།
དེ་ཡང་ཐོག་མར་དོན་གཅོད་ལས་ཁུངས་ཀྱི་དྲུང་ཆེ་བསོད་ནམས་རྡོ་རྗེ་ལགས་ཀྱིས་མཆོད་འབུལ་སྨོན་ལམ་གོ་སྒྲིག་ཞུ་དགོས་པའི་རྒྱུ་མཚན་ངོ་སྤྲོད་གནང་གྲུབ་མཚམས་ཆུ་ཚོད་གཉིས་རིང་༸རྒྱལ་བའི་ཞབས་བརྟན་གསོལ་འདེབས་དང་། དེ་བཞིན་བཟང་སྤྱོད། སྤྱོད་འཇུག་སྨོན་ལམ། ཡིག་དྲུག་སོགས་གྲངས་གསོག་གྲུབ་གནང་ཡོད། དེ་རྗེས་ཐེ་ཝན་དུ་གནས་སྡོད་བོད་རིགས་ཚོགས་པའི་ཚོགས་གཙོ་དགྲ་བཅོམ་པ་ལགས་ཀྱིས་ཐུགས་རྗེ་ཆེ་ཞུས་ཏེ་སྨོན་ལམ་མཇུག་སྒྲིལ་གནང་ཡོད་པ་བཅས། །