༢༠༡༢ ཟླ་ ༦ ཚེས་ ༢༥ རེས་གཟའ་ཟླ་བ།
སྐུ་པར་ཇེ་རེ་མི་ར་སེལ་ནས།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༢༣ ཉིན་༸གོང་ས་མཆོག་སི་ཀོ་ཊ་ལན་ཌིའི་གྲོང་ཁྱེར་ཌུན་ཌེ་ནས་གྲོང་ཁྱེར་ཨིན་ཝར་ནེ་སིར་ Inverness ཆིབས་སྒྱུར་བསྐྱངས་ཡོད། ཁུལ་དེའི་གནའ་བོའི་ཁར་བྷེ་ལེར་ཁེ་སེལ་ (Blair Castle) ཞེས་པ་དེར་ཉིན་གུང་ལྗགས་སྨིན་གྲུབ་བསྟུན། རྒྱལ་སྤྱིའི་གསར་ཤོག་འབྲེལ་མཐུད་ཚན་པ་ International Network of Street Papers ཞེས་པའི་གསར་འགོད་པའི་ཆེད་དོན་དྲི་བར་བཀའ་ལན་སྩལ།
སྐུ་པར་ཇེ་རེ་མི་ར་སེལ་ནས།
ཚན་པ་དེའི་གསར་ཤོག་དེ་བཞིན་རྒྱལ་ཁབ་ ༤༠ ནང་སྐད་ཡིག་ ༢༤ ནང་འདོན་སྤེལ་བྱེད་བཞིན་ཡོད།
གས་འགོད་པའི་དྲི་བར་བཀའ་ལན་སྩོལ་བཞིན་པ། སྐུ་པར་ཇེ་རེ་མི་ར་སེལ་ནས།
སྐབས་དེར་༸གོང་ས་མཆོག་གིས་དེང་སྐབས་མི་མང་པོ་ཞིག་ལ་འཕྲད་བཞིན་པའི་དཀའ་ངལ་ཆེ་ཤོས་ནི་རང་ཉིད་ལ་སྡོད་ཁང་མེད་པའི་དཀའ་ངལ་དེ་ཡིན་པ་དང། དཀའ་ངལ་དེ་ནི་གཞི་རྩའི་དཀའ་ངལ་ལྟ་བུ་ཞིག་ཆགས་ཡོད་པར་བརྟེན། ཁོང་ཚོར་གང་ཐུབ་རོགས་རམ་བྱེད་རྒྱུ་ནི་ང་ཚོ་འགྲོ་བ་མི་རིགས་གཅིག་པ་ཞིག་ཡིན་པའི་ཆ་ནས་འགན་ཞིག་ཆགས་ཡོད་སྐོར་སོགས་ཀྱི་བཀའ་སློབ་སྩལ་བ་དང་སྦྲགས། བོད་དོན་སྐོར་གྱི་དྲི་བར་བཀའ་ལན་སྩལ་དོན། རྒྱ་ནག་གཅིག་བསྡུས་དབང་འཛིན་པའི་གཞུང་དེ་དྲག་ཤུགས་དང་གདུག་རྩུབ། འཇིགས་སྣང་། ཕན་ཚུན་ཡིད་ཆེས་མེད་པ་སོགས་ཀྱི་ཁོར་ཡུག་འོག་གནས་ཡོད། དེར་བརྟེན་ཁོང་ཚོས་བདེན་པ་དང་དངོས་ཡོད་གནས་ཚུལ་རྣམས་སྦས་ཐབས་བྱེད་བཞིན་ཡོད།
རྒྱ་ནག་མི་དམངས་དུང་ཕྱུར་བཅུ་གསུམ་ཡོད་པ་རྣམས་ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཆ་ཚང་ཡོད། རྒྱ་ནག་མི་དམངས་ཚོས་དངོས་ཡོད་གནས་ཚུལ་ཤེས་པའི་ཐོག་ནས་བདེན་རྫུན་དབྱེ་འབྱེད་བྱ་རྒྱུའི་རྣམ་དཔྱོད་ལྡན་ཡོད། དེར་བརྟེན་རྒྱ༌ནག་སྲིད་གཞུང་གིས་རྒྱ་ནག་མི་དམངས་ཀྱི་འགྲོ་བསྐྱོད་རང་དབང་སོགས་ལ་དམ་བསྒྲགས་བྱེད་རྒྱུ་དེ་བཟང་སྤྱོད་དང་ཡོངས་སུ་བརྒལ་བ་ཞིག་ཆགས་ཡོད། བྱེད་སྟངས་དེ་ནི་མིག་རྒྱང་ཐུང་ངུའི་བྱེད་སྟངས་ཤིག་ཡིན་པར་བརྟེན་འགྱུར་བ་གཏོང་དགོས།
ཞེས་སོགས་ཀྱི་བཀའ་སློབ་སྩལ་རྗེས་༸གོང་ས་མཆོག་གིས་ཨི་ཌན་ཀོ་ཊའི་ཚོགས་ཁང་ (Eden Court Theatre) ཞེས་པ་དེར་ཆིབས་སྒྱུར་བསྐྱངས་ཏེ་ཆོས་ལུགས་རིས་མེད་ཀྱི་དབུ་ཁྲིད་ཁག་གཅིག་དང་མཇལ་འཕྲད༌ཀྱིས་བཀའ་སློབ་སྩལ་དོན། ཐོག་མར་ངོས་ཀྱིས་ཆོས་གྲོགས་ཕོ་མོ་རྣམ་པ་ཚོར་འཚམས་འདྲི་ཞུ་རྒྱུ་ཡིན། ངོས་རང་གང་ཟག་ཁྱད་དུ་འཕགས་པ་དེ་འདྲ་ཞིག་གང་ཡང་མིན། ང་ཚོ་ཚང་མ་འགྲོ་བ་མི་ཡིན་པ་གཅིག་མཚུངས་ཤིག་ཆགས་ཡོད། ངོས་རང་ད་ཆ་ལོ་ ༧༧ བསླེབས་ཡོད། རང་ལོ་ ༡༦ སྐབས་རང་དབང་བརླག་སོང། དེ་ནས་ལོ་ངོ་ ༢༤ སྐབས་རྒྱལ་ཁབ་ཀྱང་ཤོར་བ་རེད། དེང་སྐབས་བོད་ནས་གནས་ཚུལ་ཐོན་པ་ཕལ་མོ་ཆེ་ཡིད་སྐྱོ་དགོས་པའི་གནས་ཚུལ་ཤ་སྟག་རེད། ངོས་ཀྱི་མི་ཚེའི་ནང་དཀའ་ངལ་དེ་འདྲ་ཞིག་ཡོད་ཀྱང་ངོས་རང་སེམས་མ་འཁྲུག་པར་ཞི་བདེའི་ངང་གནས་ཐུབ་ཡོད། དེ་འདྲ་ཞིག་བྱ་རྒྱུའི་ནུས་པ་དེ་ཁྱེད་ཚོ་ཚང་མར་ཡོད།
སྐུ་པར་སྐུ་སྒེར་ཡིག་ཚང་ཇེ་རེ་མི་ར་སེལ་ནས།
ངོས་ཀྱིས་སེམས་ནང་ཞི་བདེ་བསྐྲུན་ཐབས་སྐོར་གྱི་ཐབས་ལམ་ཕྲན་བུ་ཤེས་པ་དེ་གང་ཐུབ་ཀྱིས་མི་གཞན་ལ་བརྗེ་ལེན་བྱ་ཐབས་བྱེད་བཞིན་ཡོད། ཅེས་སོགས་ཀྱི་བཀའ་སློབ་སྩལ་བ་དང་སྦྲགས། གཞན་གྱི་བདེ་དོན་ལ་བསམ་བློ་བཏང་ཚེ་རང་ཉིད་ཀྱི་སེམས་ནང་གདེང་སྤོབས་གསར་པ་ཞིག་སྐྱེས་ཏེ་མི་གཞན་ལ་ཡིད་ཆེས་བློས་བཀལ་བྱེད་ཐུབ་པ་དང། རེ་དོགས་ཕྲན་བུ་ཉུང་དུ་ཕྱིན་ཏེ་སེམས་ནང་ཞི་བདེ་བག་ཕེབས་ཡོང་ཐུབ། ཅེས་སོགས་ཕྱི་དངོས་པོའི་ཐོན་སྐྱེད་ལས་ནང་སེམས་ཀྱི་རིན་ཐང་ཐོག་དོ་སྣང་སྤྲད་ན་སེམས་ཞི་བདེ་དང་བག་ཕེབས་བསྐྲུན་ཐུབ་སྐོར་སོགས་ཀྱི་བཀའ་སློབ་སྩལ་རྗེས་མང་ཚོགས་ཀྱི་དྲི་བར་བཀའ་ལན་སྩལ། སྐབས་དེར་ཚོགས་བཅར་བ་ཞིག་གིས་རྒྱ་གར་གྱི་མེས་པོ་དམ་པ་མ་ཧཱ་ཏ་མ་གྷན་དྷིའི་མཆོག་གི་བསླབ་བྱས་དེང་སྐབས་སུའང་གཞོན་སྐྱེས་མང་པོ་ཞིག་ལ་སེམས་འགུལ་ཐེབས་བཞིན་ཡོད་སྐོར་གྱི་དྲི་བ་ཞུས་པར་བཀའ་ལན་སྩལ་དོན། ངོས་ཀྱིས་དམ་པ་ཁོང་དང་དངོ་སུ་མཇལ་མྱོང་མེད། འོན་ཀྱང་སྐབས་རེ་རྨི་ལམ་ནང་དུ་མཇལ་གྱི་འདུག ངོས་ཀྱི་དམ་པ་ཁོང་ལ་གུས་བརྩི་ཧ་ཅང་ཞུ་བཞིན་ཡོད། གང་ཡིན་བརྗོད་ན། དམ་པ་ཁོང་ནི་དགོངས་པ་རྒྱ་ཆེན་པོ་བཞེས་ཐུབ་མཁན་ཞིག་ཡིན་པ་མ་ཟད། ཁ་ཞེ་གཉིས་མེད་ཀྱིས་སྐྱེས་ཆེན་དམ་པ་ཞིག་ཡིན། ཞེས་སོགས་ཀྱི་བཀའ་ལན་སྩལ་རྗེས་མི་ཚེའི་ནང་བདེ་སྡུག་གི་གནས་སྟངས་འཕྲད་སྐབས་བསམ་བློ་གཏོང་སྟངས་ཐལ་ཆ་མ་སོང་བར་སེམས་བབ་ལྷོད་ངང་ནས་ཐག་གཅོག་བྱས་ཏེ་རང་གི་རྣམ་དཔྱོད་ཐོག་ནས་དཀའ་ངལ་སེལ་ཐབས་དགོས་སྐོར་སོགས་བཀའ་སློབ་སྩལ་ཡོད་པ་བཅས།།
