༢༠༡༢ ཟླ་ ༦ ཚེས་ ༦ རེས་གཟའ་ལྷགཔ།
༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་དབྱིན་ཡུལ་དུ་ཆིབས་སྒྱུར་བསྐྱང་གཏན་འཁེལ་འདུག
དེ་ཡང་མགོན་པོ་གང་ཉིད་མཆོག་གིས་ཕྱི་ལོ་ ༢༠༡༢ ཟླ་ ༦ ཚེས་ ༡༦ ཉིན་དབྱིན་ཡུལ་མན་ཅེ་སི་ ཊར་གཞོན་སྐྱེས་ཚོས་འགན་ཁུར་བླངས་ཏེ་རང་ཉིད་ལ་བསྒྱུར་བཅོས་དགོས་ཞེས་པའི་བརྗོད་གཞིའི་ཐོག་བཀའ་སློབ་དང་། ཕྱི་ཚེས་ ༡༧ ཉིན་གྱི་སྔ་དྲོ་དབྱིན་ཡུལ་མན་ཅེ་སི་ཊའི་རྩེད་རྭར་གསུང་ཆོས་སྩལ་རྒྱུ་ཡིན་འདུག
ཕྱི་ཚེས་ ༡༩ ཉིན་དབྱིན་ཡུལ་མན་ཅེ་སི་ཊར་རོ་ཡལ་ཨལ་སྦཊ་ཚོམས་ཆེན་དུ་དོན་དམ་གྱི་འགྱུར་བ་ནང་སེམས་ལས་བྱུང་ཞེས་པའི་བརྗོད་གཞིའི་ཐོག་མི་མང་ལ་བཀའ་སློབ་དང་། ཕྱི་ཚེས་ ༢༢ ཉིན་སི་ཀོ་ཊ་ལན་ཌ་ཨི་ཌན་སྦག་ལེག་ཅར་ཚུགས་ནས་ལོ་ཉི་ཤུ་འཁོར་བའི་དུས་དྲན་གྱི་ཆ་ཤས་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ལུགས་ཀྱི་རྒྱ་ལས་བརྒལ་བའི་འཛམ་གླིང་ཀུན་ལ་སྨན་པའི་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག
ཕྱི་ཚེས་ ༢༢ ཉིན་སི་ཀོ་ཊ་ལནཌ་ཌུན་རྡི་ས་གནས་ཀྱི་ཀེ་ཡར་ཊ་ཚོམས་ཆེན་དུ་ནང་སེམས་ཀྱི་ཤེས་ཡོན་ཞེས་པའི་བརྗོད་གཞིའི་ཐོག་བཀའ་སློབ་དང་། ཕྱི་ཚེས་ ༢༣ ཉིན་སི་ཀོཊ་ལནཌ་ཨིན་ཝར་ནེ་སི་ས་གནས་ཀྱི་ཨི་ཌན་ཀོཊ་ཚོམས་ཆེན་དུ་རང་ཉིད་བཅོས་དགོས་ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག
ཕྱི་ཚེས་ ༢༧ ཉིན་གྱི་སྔ་དྲོ་ཨི་ཊ་ལི་དགེ་འཕེལ་གླིང་བོད་ཀྱི་སློབ་གཉེར་ཁང་ནས་ཇི་ལྟར་གསོལ་འདེབས་ཞུས་དོན་ལྟར། ཁུལ་དེའི་མི་ལ་ནོ་མདུན་སར་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་བཀའ་ཁྲིད་དང། ཕྱི་ཚེས་ ༢༨ ཉིན་གྱི་སྔ་དྲོ་སྤྱན་རས་གཟིགས་ཀྱི་བཀའ་དབང་སྩལ་རྒྱུ། ཕྱི་ཚེས་ ༢༨ ཉིན་རྒྱབ་ཨི་ཊ་ལི་དགེ་འཕེལ་གླིང་བོད་ཀྱི་སློབ་གཉེར་ཁང་གིས་གོ་སྒྲིག་དང་གསོལ་འདེབས་ཞུས་དོན་ལྟར། ཁུལ་དེའི་མི་མང་ལ་ཆོས་ལུགས་ཀྱི་རྒྱ་ལས་བརྒལ་བའི་བདེ་སྐྱིད་ཅེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག་པ་བཅས། །