༢༠༡༢ ཟླ་ ༥ ཚེས་ ༩ རེས་གཟའ་ལྷག་པ།
༄༅། །ཨ་རིའི་ཊུ་ནི་སི་མངའ་སྡེའི་མེམ་ཕི་སི (Memphis) གྲོང་ཁྱེར་གྱི་ཕི་ཛར་ས་ཁུལ་དུ་རྟེན་གཞི་བྱས་པའི་པདྨ་དཀར་པོ་སྒོམ་སྒྲུབ་སློབ་སྦྱོང་བསྟི་གནས་ཁང་ནས་མགྲོན་འབོད་ལྟར། བོད་མི་མང་སྤྱི་འཐུས་ཚོགས་གཞོན་མཆོག་གིས་ནང་ཆོས་ངོ་སྤྲོད་དང་འབྲེལ་ད་ལྟའི་ཆར་བོད་ནང་གི་བོད་མི་ཚོར་ཆོས་དད་རང་དབང་མེད་པ་དང་མ་ཟད། རྒྱ་ནག་གཞུང་ནས་བོད་མིར་དྲག་གནོན་བྱས་དང་བྱེད་མུས་ཡིན་སྐོར་བསྟི་གནས་ཁང་དེའི་སློབ་ཕྲུག་ཚོར་ངོ་སྤྲོད་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། སྤྱི་འཐུས་ཚོགས་གཞོན་མཆོག་གིས་སློབ་ཕྲུག་རྣམས་ལ་ད་ལྟའི་བོད་ནང་གི་ཛ་དྲག་གནས་སྟངས་ངོ་སྤྲོད་གནང་དོན། དེང་སྐབས་བོད་ནང་གི་བོད་མི་རྣམས་རྒྱ་ནག་གཞུང་གི་གདུག་རྩུབ་ཆེ་བའི་སྲིད་བྱུས་འོག་འགྲོ་བ་མིའི་ལྷན་སྐྱེས་རང་བཞིན་དུ་ཡོད་པའི་སྨྲ་བརྗོད་རང་དབང་དང་གསར་འགྱུར་རང་དབང་། དེ་བཞིན་ཆོས་བྱེད་རང་དབང་སོགས་གང་ཡང་མེད། ལྷག་པར་རྒྱ་ནག་གཞུང་ནས་བོད་མི་རྣམས་ལ་དྲག་པོའི་དམག་དཔུང་གིས་དབང་བསྒྱུར་བྱས་དང་བྱེད་མུས་ཡིན་མ་ཟད། བོད་མི་རིགས་རང་ཉིད་ཀྱི་ངོ་བོ་མཚོན་པའི་སྐད་ཡིག་ལ་ཡང་རྒྱ་ནག་གཞུང་གིས་དམ་བསྒྲགས་ཚད་མེད་བྱེད་བཞིན་ཡོད། གལ་ཏེ་བོད་མིས་རྒྱ་སྐད་མི་ཤེས་ན། སྤྱི་ཚོགས་ནང་ལས་ཀ་རག་ཐབས་དཀའ་བའི་གནས་སུ་གྱུར་ཡོད། བོད་མིའི་སྒྲིག་འཛུགས་ཀྱིས་དབུ་མའི་ལམ་གྱི་ལངས་ཕྱོགས་བཟུང་སྟེ་བོད་རྒྱ་གཉིས་ཀར་ཕན་པའི་བོད་ལ་མིང་དོན་མཚུངས་པའི་རང་སྲིད་རང་སྐྱོང་སྤྲོད་དགོས་པའི་དགོས་འདུན་འདོན་བཞིན་ཡོད། བོད་རྒྱ་སྐུ་ཚབ་དབར་འབྲེལ་མོ་ཐེངས་དགུ་ཙམ་གནང་ཡོད་ཀྱང་དོན་ལྡན་གྱི་ནུས་པ་ཐོན་པ་བྱུང་ཞིག་མེད། ཅེས་སོགས་གསུངས་ཡོད། དེ་ནས་པདྨ་དཀར་པོ་སྒོམ་སྒྲུབ་སློབ་སྦྱོང་བསྟི་གནས་ཁང་གི་འགན་འཛིན་མཆོག་གིས་སྤྱི་འཐུས་ཚོགས་གཞོན་མཆོག་གིས་གསུངས་དོན་ལ་རྒྱབ་སྐྱོར་གནང་བ་དང་ཆབས་ཅིག་གསུང་དོན། ཕྱི་ལོ་ ༢༠༠༩ ལོའི་ནང་གྲོང་ཁྱེར་དེའི་ནང་ཨ་རིའི་སྤྱི་དམངས་ཐོབ་ཐང་དང་འབྲེལ་བའི་འགྲེམས་སྟོན་གྱི་དུས་སྐབས་ཤིག་གི་ཐོག་༸གོང་ས་༸སྐྱབས་མགོན་ཆེན་པོ་མཆོག་གདན་ཞུས་ལྟར་༸ཞབས་སོར་འཁོད་པ་ནས་བཟུང་ཁུལ་དེའི་མི་མང་ལ་བོད་དོན་གོ་རྟོགས་ཀྱི་གོམ་པ་ཐོག་མ་དེ་ཆགས་ཡོད། དེང་སྐབས་དུས་རབ་ཉེར་གཅིག་ནང་དྲ་གནས་ཀྱི་བརྒྱུད་ལམ་ཁག་ལ་བརྟེན་ནས་རྒྱ་ནག་གཞུང་གི་གདུག་རྩུབ་ཀྱི་བྱ་སྤྱོད་དེ་དག་སྦས་གསང་བྱེད་ཐུབ་ཐབས་མེད་ཅེས་གསུངས་ཡོད་པ་བཅས། །
