༢༠༡༢ ཟླ་ ༥ ཚེས་ ༣༡ རེས་གཟའ་ཕུར་བུ།
༄༅། །བོད་བྱང་ཤར་ཁུལ་དུ་སླར་ཡང་བོད་པའི་བུད་མེད་གཅིག་གིས་རང་ལུས་མེར་བཏང་རྗེས་ཁུལ་དེར་རྒྱ་ནག་གཞུང་གིས་དམ་བསྒྲགས་ཧ་ཅང་ཤུགས་ཆེ་རུ་བཏང་བ་མ་ཟད། ལྷག་པར་དེང་སྐབས་བོད་ཀྱི་རྒྱལ་ས་ལྷ་སའི་ནང་དུའང་བོད་མི་བརྒྱ་ཕྲག་མང་པོ་ཞིག་དམ་བསྒྲགས་བཀག་ཉར་བྱེད་བཞིན་པའི་གནས་ཚུལ་ཐོན་པར་བོད་མིའི་སྒྲིག་འཛུགས་ལ་ཧ་ཅང་བློ་འཚབ་ཡོད། བོད་བྱང་ཤར་ཨ་མདོ་རྔ་པ་བར་མ་ནང་རྟེན་གཞི་བྱས་པའི་ཛམ་ཐང་ཇོ་ནང་དགོན་པའི་ཉེ་འཁྲིས་སུ་རང་ལོ་ ༣༦ ཡིན་པ་ཕྲུ་གུ་གསུམ་གྱི་ཨ་མ་རི་ཀྱོ་ལགས་ཀྱིས་ཕྱི་ཟླ་ ༥ ཚེས་ ༣༠ ཉིན་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་ཡོད།
སྐབས་དེར་ས་གནས་བོད་མི་ཁག་གཅིག་གིས་རི་ཀྱོ་ལགས་ཀྱི་སྐུ་ཕུང་ཛམ་ཐང་དགོན་པའི་ནང་འཁྱེར་ཏེ་ཛམ་ཐང་དགོན་པའི་དགེ་འདུན་པ་སྟོང་ཚོ་བརྒལ་བས་སྨོན་ལམ་གསུང་འདོན་གནང་ཡོད། གནས་ཚུལ་དེ་བྱུང་མ་ཐག་རྒྱ་ནག་ས་གནས་སྲིད་གཞུང་གིས་རི་སྐྱོ་ལགས་ཀྱི་སྐུ་ཕུང་འཕྲལ་མར་ཞུགས་འབུལ་མ་བྱས་ཚེ་བཙན་འཕྲོག་བྱ་རྒྱུ་ཡིན་པའི་འཇིགས་སྐུལ་བཏང་བར་བརྟེན་ཛམ་ཐང་དགོན་པའི་ཉེ་འདབས་སུ་ཉིན་དེའི་མཚན་མོའི་ཆུ་ཚོད་ ༡༡ ཙམ་ལ་སྐུ་ཕུང་ཞུགས་འབུལ་བྱེད་དགོས་ཐུག་ཡོད། སྐུ་ཕུང་ཞུགས་འབུལ་སྐབས་ཆར་པ་ཤུགས་ཆེ་བབ་མིན་ལ་མ་ལྟོས་པར་ཛམ་ཐང་དགོན་པའི་དགེ་འདུན་པ་གཙོ་བོར་གྱུར་བའི་ས་གནས་བོད་མི་བཅས་ཁྱོན་མི་གྲངས་ ༥༠༠༠ ལྷག་འདུ་འཛོམས་བྱུང་ཡོད།
རི་ཀྱོ་ལགས་ནི་ཛམ་ཐང་བར་མ་ཡུལ་ཚོའི་གཙང་སྡེ་ནས་ཡིན་ལ། འཚོ་གནས་འབྲོག་པ་ཡིན་འདུག ཁོ་མོ་ནམ་རྒྱུན་གྲོང་ཕན་ཚུན་ལ་མཐུན་ཐབས་ལ་འབད་པ་དང་། ཉམ་ཐག་ལ་རོགས་པ་བྱེད་པ། དགེ་སྤྱོར་ལ་འབད་པ་བྱེད་མཁན་ཞིག་ཡིན་འདུག་ལ། ཁོ་མོའི་ཕ་མིང་ལ་ཕྱུག་ལོ་དང་། མ་མིང་ལ་རིན་ལྷ། བཟའ་ཟླའི་མིང་ལ་སྣང་སྟོང་ཟེར་ཞིང་། ཁོང་གཉིས་ལ་ཕྲུ་གུ་གསུམ་ཡོད་འདུག
ལྷག་པར་བོད་ཀྱི་རྒྱལ་ས་ལྷ་སར་རེས་གཟའ་ཉི་མའི་ཉིན་བོད་མི་གཉིས་ཀྱིས་རང་ལུས་མེར་སྲེག་བཏང་རྗེས་རྒྱ་མིའི་ཉེན་རྟོག་མི་སྣ་དང་དམག་མིས་དམ་བསྒྲགས་ཤུགས་ཆེ་བྱེད་བཞིན་ཡོད་པ་མ་ཟད། བོད་མི་གྲངས་ ༦༠༠ ཙམ་བཀག་ཉར་བྱས་ཏེ་བོད་རང་སྐྱོང་ལྗོངས་ཀྱི་ཕྱི་ནས་འབྱོར་བའི་བོད་མི་རྣམས་ཕྱིར་འབུད་བྱེད་བཞིན་ཡོད་འདུག
ད་བར་བོད་མི་ ༣༨ གྱིས་བོད་ལ་རང་དབང་དགོས་པ་དང་༸གོང་ས་མཆོག་བོད་དུ་གདན་འདྲེན་ཞུ་དགོས་པའི་དགོས་འདུན་བཏོན་ཏེ་རང་ལུས་མེར་སྲེག་བཏང་ཡོད་པའི་ཁོངས་ནས་བོད་མི་ ༢༩ འདས་གྲོངས་སུ་གྱུར་ཡོད་པ་དང་། གཞན་རྣམས་ལ་རྨས་སྐྱོན་ཚབས་ཆེ་ཕོག་ཡོད་པའམ་ཡང་ན་ཕན་མེད་ཆགས་ཡོད་པ་མ་ཟད། རང་ལུས་མེར་སྲེག་གཏོང་མཁན་བོད་མི་ལྔ་ད་ལྟའི་ཆར་ས་གནས་གང་དུ་ཡོད་པ་དང་གནས་སྟངས་ཇི་ཡིན་ཤེས་རྟོག་གང་ཡང་ཐུབ་ཀྱི་མེད་པ་བཅས།།
