༢༠༡༢ ཟླ་ ༥ ཚེས་ ༢༩ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༥ ཚེས་ ༢༦ ཉིན་གྱི་ཕྱེད་ཡོལ་ཨོ་སི་ཊོ་རི་ཡའི་སྤྱི་མཐུན་རྒྱལ་ཁབ་ཀྱི་མངའ་ཁོངས་མངའ་སྡེ་བཞིའི་ནང་གནས་སྡོད་བོད་རིགས་རྣམས་ལ་ཧེལ་ཌེན་མགྲོན་ཁང་གི་ཚོགས་ཁང་ནང་ཁྱོན་མི་གྲངས་ ༣༠༠ བརྒལ་བར་བཀའ་ཁྲི་བློ་བཟང་སེང་གེ་མཆོག་གིས་གསུང་བཤད་གནང་དོན། དེ་རིང་འདི་གར་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་བོ་བྱུང་། སྒྲིག་འཛུགས་དང་ཚོགས་པ་སོགས་ནས་གོ་སྒྲིག་བྱེད་མིན་ལ་མ་ལྟོས་པར་མི་མང་རང་ངོས་ནས་འགན་འཁྱེར་ཏེ་ད་རེས་ཝི་ནར་ཚོགས་པ་བཞིན་ས་ཁུལ་གཞན་ནང་ཚོགས་ཐུབ་ན་ཧ་ཅང་ཡག་པོ་འདུག ལས་འགུལ་གང་ཞིག་སྤེལ་ཡང་དམིགས་ཡུལ་བཟུང་རྒྱུ་གལ་འགངས་ཆེན་པོ་ཆགས་ཡོད། ཐེངས་འདིའི་ལས་འགུལ་འདི་བོད་ནང་བརྡ་ལན་གང་ཞིག་ཐེབས་ཀྱི་ཡོད་པ་རེད་དམ། ཞེ་ན། བོད་ནང་ཛ་དྲག་གི་གནས་ཚུལ་ཡོད་པ་མ་ཟད། རང་ལུས་མེར་སྲེག་གཏོང་མཁན་ཁོང་རྣམ་པའི་འབོད་སྒྲ་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་དགོས་པ་དང་། བོད་མིར་རང་དབང་དགོས་པ་བརྗོད་མཁན་ཚོར་ཡུ་རོབ་ནས་ཡིན་ཡང་ད་ཐེངས་མི་འབོར་ཁྱོན་ཆེ་འདུ་འཛོམས་ཀྱིས་རྒྱབ་སྐྱོར་དང་གདུང་སེམས་མཉམ་སྐྱེ་ཡོད་པའི་རྣམ་པ་ཧ་ཅང་གསལ་སྟོན་བྱས་ཡོད། བོད་ཀྱི་གནད་དོན་ཐོག་ད་ལྟ་ཡིན་ཡང་རྒྱལ་སྤྱིའི་ཐོག་ནས་རྒྱབ་སྐྱོར་ཤུགས་ཆེ་ཡོད་པ་དེ་གསལ་སྟོན་ཐུབ་པ་རེད་བསམས་ཀྱི་ཡོད། དེ་བཞིན་རྒྱལ་ཁབ་སོ་སོའི་གྲོས་ཚོགས་ནང་མི་མང་བཅར་ནས་གྲོས་ཚོགས་ཀྱི་འཐུས་མིར་བོད་ཀྱི་གནད་དོན་ཤེས་པ་བཟོ་རྒྱུ་ཧ་ཅང་གལ་ཆེན་པོ་རེད། གྲོས་ཚོགས་ནང་ལ་བོད་དོན་སྐོར་གྲོས་ཆོད་འཇོག་ཐུབ་པ་དེ་འདྲ་བྱུང་ན་ང་ཚོར་དགོས་རྒྱུ་དེ་རེད། དེར་བརྟེན་སྤྱི་མཐུན་ཚོགས་པ་དང་བོད་དོན་རྒྱབ་སྐྱོར་ཚོགས་པ་རྣམས་མཉམ་འབྲེལ་ཐོག་ནས་ལས་ཀ་བྱ་རྒྱུ་དེ་གལ་འགངས་ཆེན་པོ་ཆགས་ཡོད། གང་ལ་ཞེ་ན། གྲོས་ཚོགས་ཀྱི་འཐུས་མི་རྣམས་ནི་མི་མང་གི་རང་དབང་ལྡན་པའི་མགྲིན་ཚབ་པ་ཞིག་ཡིན་སྟབས། རྒྱལ་ཁབ་སོ་སོའི་གྲོས་ཚོགས་ཀྱི་འཐུས་མི་རྣམས་ལ་འབྲེལ་བ་ཞུས་ཏེ་གྲོས་ཚོགས་ནང་བོད་དོན་གླེང་སློང་དང་ཆབས་ཅིག་བོད་ནང་མུ་མཐུད་དཀའ་ངལ་ཡོད་པའི་གནས་ཚུལ་ཤེས་རྟོགས་ཐུབ་པ་བཟོ་རྒྱུ་ནི་ང་ཚོ་ཚང་མའི་ལས་འགན་ཡིན་པས། ཚང་མས་འབད་བརྩོན་གང་མང་གནང་རོགས་ཞུ་རྒྱུ་ཡིན་ཞེས་གསུང་བཤད་གནང་ཡོད་པ་བཅས། །
