༢༠༡༢ ཟླ་ ༥ ཚེས་ ༣༡ རེས་གཟའ་ཕུར་བུ།
༄༅། །འདི་གར་ཕྱི་ལོ་ ༢༠༡༢ ཟླ་ ༥ ཚེས་ ༣༡ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན། དགུང་ལོ་ ༤༠ ལྷག་སོན་པའི་དགེ་འདུན་པ་ཚེ་རིང་རྒྱལ་མཚན་ལགས་ནི་ཡབ་སངས་རྡོར་དང་ཡུམ་ཚེ་མོ་གཉིས་སུ་བྲག་འགོ་ནོར་པ་ཞེས་པའི་འབྲོག་སྡེ་རུ་འཁྲུངས། ནར་སོན་པ་དང་བྲག་འགོ་དགོན་པའི་ཆོས་སྒོར་ཞུགས་ཏེ་འདོན་ཆོག་སོགས་ལ་སྦྱངས་པ་གནང། ཕྱི་ལོ་ ༢༠༡༢ ཟླ ༢ ཚེས ༩ ཉིན་རྒྱ་དམག་གིས་འཛིན་བཟུང་བྱས་ཏེ་མི་སྤྱོད་ལས་འདས་པའི་རྡུང་རྡེ
ག་ཚད་མེད་བཏང་བར་བརྟེན། ཐོག་མའི་འཆར་མནར་གཅོད་དྲག་པོས་སྒལ་ཚིགས་ཕུད་ཡོད་པའི་གནས་ཚུལ་ཁ་གསལ་གོ་ཡོད་ཀྱང་། བྲག་འགོ་དགོན་པ་དང་ཉེ་སྤུན་ཚོས་རྫོང་གི་ཉེན་རྟོག་ལས་ཁུངས་ལ་ཁོང་གི་ཤི་གསོན་ཅི་ཡིན་ཐེངས་མང་དྲིས་ཀྱང་ཤེས་རྟོགས་མེད་ཚུལ་ཟེར་བ་ཙམ་ལས་གནས་ཚུལ་ཁ་གསལ་གང་ཡང་བཤད་མི་འདུག འདི་ལོའི་ཟླ ༢ ཚེས ༩ ཉིན་རྒྱ་དམག་གི་མེ་མདའི་འོག་འདས་གྲོངས་སུ་གྱུར་བའི་དགེ་འདུན་པ་ཡེ་ཤེས་རིག་གསལ་དང་ཡེ་ཤེས་བསམ་འགྲུབ་གཉིས་ཀྱི་ཨ་མ་སངས་ལྷ་དང་། དེ་བཞིན་རྨས་སྐྱོན་ཕོག་པའི་སློབ་ཕྲུག་ལོ་ཆུང་ལྔ་དང་ལྷན་དུ་ཚེ་རིང་རྒྱལ་མཚན་ཡང་དཀར་མཛེས་རྫོང་སྨན་ཁང་དུ་སྨན་བཅོས་བྱེད་སར་ཁྲིད་ཡོད་མོད། རྡུང་རྡེག་གི་གནོད་སྐྱོན་ཚབས་ཆེན་ཕོག་ཟིན་པའི་དགེ་འདུན་པ་ཚེ་རིང་རྒྱལ་མཚན་ལགས་བཅོས་ཐབས་མེད་པར་ཉིན་དེ་རང་ལ་འདས་གྲོངས་སུ་གྱུར་འདུག འོན་ཀྱང་རྒྱ་དམར་གཞུང་གིས་ཁོང་གི་སྐུ་ཕུང་ནང་མིར་རྩིས་སྤྲོད་བྱེད་རྒྱུ་ཕར་ཞོག་ཐ་ན་ཁོང་འདས་གྲོངས་སུ་གྱུར་བ་ཉེ་ཆར་མ་གཏོགས་ཁས་ལེན་བྱས་མེད། ནང་མི་སྤུན་མཆེད་ཚོས་ཁོང་གི་སྐུ་པར་ཞིག་གསེར་རྟ་བླ་རུང་ཆོས་སྒར་དུ་བསྐྱལ་ཏེ་མཆོད་འབུལ་བྱས་པ་མ་ཟད། ད་ལྟའི་ཆར་རྒྱ་གཞུང་གི་དམ་བསྒྲགས་བྱེད་མིན་ལ་མ་ལྟོས་པར་བྲག་འགོ་ཡུལ་མི་དང་དགོན་སྡེ་ཁག་གིས་རྒྱའི་ལག་ཏུ་སྐུ་སྲོག་ཤོར་བའི་དགེ་འདུན་པ་ཚེ་རིང་རྒྱལ་མཚན་ལགས་དང་། ཡོན་ཏན་ལགས། དགེ་འདུན་པ་ཡེ་ཤེས་རིག་གསལ་ལགས། ཡེ་ཤེས་བསམ་འགྲུབ་ལགས། ལོ་བརྒྱ་ཚང་གི་བུ། མགོན་པོ་རིག་འཛིན་བཅས་ཀྱི་ཆེད་དུ་བསྔོ་སྨོན་དང་མཆོད་འབུལ་བྱེད་བཞིན་ཡོད་འདུག་པ་བཅས། །
