པར་ལེན་སྐུ་སྒེར་ཡིག་ཚང།

༢༠༡༢ ཟླ་ ༥ ཚེས་ ༢༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༥ ཚེས་ ༢༢ ཉིན་༸གོང་ས་མཆོག་གིས་ཨི་ཊཱ་ལིའི་ཊེ་རེས་ཊིའི་ས་ཁུལ་གྱི་གྲོང་ཁྱེར་ཨུ་ཌིན་དུ་ཀླད་ཁམས་དང་སེམས་ཁམས་རིག་པའི་ཚན་རིག་པ་སྐུ་ཞབས་ཕ་རན་ཀོ་ཕེབ་རོ་(Franco Fabbro) ལགས་དང་དེ་བཞིན་ལྟ་གྲུབ་སྨྲ་བ་སྐུ་ཞབས་ཝི་ཏོ་མན་ཁུ་སོ་ (Vito Mancuso) མཆོག་བཅས་དང་ལྷན་འཚེ་བའི་ལས་ལ་བྱམས་བརྩེ་དང་འཚེ་བ་མེད་པའི་ལམ་ནས་བསྙེན་པོ་བསྟེན་ཕྱོགས། ཞེས་པའི་བརྗོད་གཞིའི་ཐོག་བགྲོ་གླེང་མཛད་སྐབས་བཀའ་སློབ་སྩལ་དོན། འཚེ་བ་ཡིན་མིན་དེ་གཙོ་ནང་གི་ཀུན་སློང་ལ་ལྟ་དགོས། གཞན་བསླུ་བྲིད་དང་གནོད་སེམས་ཀྱི་ཀུན་སློང་འཆང་བཞིན་དུ་ངག་ནས་ཚིག་སྙན་པོ་དང་རྣམ་འགྱུར་ཡག་པོ་ཇི་འདྲ་ཞིག་བསྟན་ཡང་འཚེ་བའི་ལས་ཆགས་ཡོད། དེ་ལས་ལྡོག་སྟེ་སྨན་པས་ནད་པར་གཤག་བཅོས་སྐབས་ནད་པའི་ལུས་ནས་ཤ་གཅོད་འབྲེག་བྱེད་བཞིན་ཡོད་ཀྱང་ཕན་སེམས་ཀྱིས་ཀུན་ནས་བླངས་པར་བརྟེན་འཚེ་བའི་ལས་ཆགས་མེད་ཅེས་བཀའ་སློབ་སྩལ། སྤྱིར་༸གོང་ས་མཆོག་གིས་ལོ་ངོ་ ༤༠ ཙམ་རིང་ཀླད་པའི་རྣམ་གཞག་ཐོག་ཐུགས་སྣང་ཧ་ཅང་མཛད་ཡོད་པ་མ་ཟད། འདས་པའི་ལོ་ངོ་ ༣༠ ཙམ་གྱི་རིང་ཚན་རིག་པ་དང་དངོས་སུ་མཉམ་རུབ་མཛད་ཡོད་པ་དཔེར་ན། ཉེ་ལམ་མགོན་པོ་གང་ཉིད་མཆོག་གིས་དགའ་སྐྱོའི་གནས་སྐབས་ཀྱི་ཚོར་བ་གཉིས་སྤྱིར་ལྡོག་ཕྱོགས་ཡིན་ནའང་མིག་ནས་མཆི་མ་ཐོན་པ་དེར་མི་འདྲ་བའི་ཁྱད་གང་ཡང་མེད་པ་སོགས་ཀྱི་རྣམ་གཞག་ཐད། ཚན་རིག་པས་བརྟག་དཔྱད་ཀྱི་ལམ་ནས་ཡིད་དབང་གཉིས་ཀྱི་ཤེས་པར་ཡུལ་མྱོང་ཚུལ་ལ་ཁྱད་པར་ཇི་ཡོད་ཤེས་ཐབས་དགོས་པའི་ལམ་སྟོན་མཛད་ཡོད་པ་མ་ཟད། ཆོས་ཉམས་ལེན་པ་ཁག་གཅིག་སྨན་པས་འཆི་ཚར་བར་ངོས་འཛིན་བྱས་རྗེས་སུའང་རྣམ་ཤེས་ཕྲ་མོ་མ་འགག་བར་ལུས་ཀྱི་མདངས་མ་ཉམས་པར་ཐུན་མཚམས་ལ་བཞུགས་རྒྱུའི་གནད་དོན་དེར་ཚན་རིག་པས་དཔྱད་པ་བྱ་དགོས་པའི་ལམ་སྟོན་མཛད་ཡོད། ཕྱི་ཚེས་ ༢༣ ཉིན་༸གོང་ས་མཆོག་གིས་ཨུ་ཌེན་དང་ཊེ་རེས་ཊིའི་ས་ཁུལ་གྱི་གཙུག་ལག་སློབ་གྲྭའི་སློབ་ཕྲུག་རྣམས་ལ་ཚན་རིག་ནང་པའི་གྲུབ་དོན་ཐོག་ནས་བློ་སྦྱོང་ཐབས། ཞེས་པའི་བརྗོད་གཞིའི་ཐོག་བཀའ་སློབ་སྩལ་རྗེས་བྷེལ་ཇམ་ (Belgium) དུ་རྟེན་གཞི་བྱས་པའི་ཡོན་ཏན་གླིང་ཆོས་ཚོགས་སུ་ཆིབས་ཞལ་བསྒྱུར་རྒྱུ་ཡིན་འདུག་པ་བཅས།།