༢༠༡༢ ཟླ་ ༥ ཚེས་ ༡༧ རེས་གཟའ་ཕུར་བུ།
༄༅། །རྒྱ་གར་ལྷོ་ཕྱོགས་བདེ་སྐྱིད་སླར་གསོའི་གཞིས་འགོ་འཕོ་འགྱུར་གྱི་མི་མང་ཚོགས་འདུ་སྐོང་ཚོགས་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༥ ཚེས་ ༡༥ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་དང་སྤྲོད་དཔང་བྷེང་ལོར་ལྷོ་སྤྱི་བཀྲིས་ཕུན་ཚོགས་ལགས་དབུ་བཞུགས་ཐོག་སྦེལ་ཀོབ་བདེ་སྐྱིད་སླར་གསོའི་སྐབས་ ༡༡ པའི་ས་གནས་འཛིན་ཕུན་ཚོགས་ཚེ་རིང་ལགས་དང་སྐབས་ ༡༢ པའི་ས་གནས་འགོ་འཛིན་གསར་པ་བྱམས་པ་ཕུན་ཚོགས་ལགས་གཉིས་གཞིས་འགོ་འཕོ་འགྱུར་གྱི་ཚོགས་འདུ་ཞིག་བདེ་སྐྱིད་སླར་གསོའི་མི་མང་ཚོགས་ཁང་ནང་ཚོགས་ཡོད། ཚོགས་འདུའི་ཐོག་ལྷོ་སྤྱི་བཀྲ་ཤིས་ཕུན་ཚོགས་ལགས་ཀྱིས་གསུང་བཤད་གནང་དོན། བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་ལམ་སྟོན་གཞིར་བཟུང་སྦེལ་ཀོབ་བདེ་སྐྱིད་སླར་གསོའི་ས་གནས་འགོ་འཛིན་གསར་རྙིང་འཕོ་འགྱུར་གྱི་གཞིས་ཆགས་ལས་ཁུངས་འདིའི་ཡིག་ཆ་སོགས་རྩིས་སྤྲོད་རྩིས་ལེན་ཁམས་གཙང་གནང་ཟིན་ཡོད། དེ་བཞིན་དེ་རིང་འདི་གར་རྒན་གཞོན་མང་དག་ཅིག་ཕེབས་འདུག དེར་བརྟེན་ང་ཚོའི་སྒྲིག་འཛུགས་དང་གཞིས་ཆགས་གང་ཞིག་ཡིན་རུང་མི་རབས་རྒན་གཞོན་བརྗེ་པོ་བརྒྱབ་ནས་འགྲོ་བའི་སྐབས་འདིར་རྒན་པའི་བྱས་རྗེས་རྣམས་གཞོན་སྐྱེས་ཚོས་ཤེས་དགོས་པ་མ་ཟད། རྒན་པ་ཚོས་ཀྱང་གཞོན་སྐྱེས་ཚོར་ལམ་སྟོན་གནང་དགོས་ཀྱི་ཡོད། བརྒྱུད་རིམ་དེ་དག་ཁྲོད་ནས་ང་ཚོས་རྒྱལ་ཁབ་དང་གཞིས་ཆགས་གང་ཞིག་ཡིན་རུང་འཛིན་སྐྱོང་བྱེད་དགོས་ཀྱི་ཡོད། ད་ལྟའི་ས་གནས་འགོ་འཛིན་གསར་པར་ཆ་བཞག་ན། མི་རབས་གསར་པ་ཞིག་གིས་ས་གནས་འགོ་འཛིན་གནང་རྒྱུ་ཆགས་ཡོད་ཅེས་སོགས་ཀྱི་གསུང་བཤད་གནང་ཡོད་པ་བཅས། །