༢༠༡༢ ཟླ་ ༥ ཚེས་ ༢༩ རེས་གཟའ་མིག་དམར།
༄༅། །འདི་གར་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༡༢ ཟླ་ ༥ ཚེས་ ༢༨ བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༥ ཚེས་ ༢༥ ཉིན་འཕྲོད་བསྟེན་བཀའ་བློན་མཆོག་པོ་ལེན་ཌེའི་རྒྱལ་ས་ཝར་སོར་ཕེབས་འབྱོར་གནང་ཡོད། ཕྱི་ཚེས་ ༢༦ ཉིན་པོ་ལེན་ཌེ་ཆེས་མཐོའི་སྨན་པའི་མཐོ་སློབ་ཁང་གི་སློབ་ཟུར་བ་རྣམས་དང་ལྷན་དུ་རྒྱལ་སྤྱིའི་བགྲོ་གླེང་ཚོགས་འདུར་ལྷན་ཞུགས་གནང་བ་མ་ཟད། ལྷན་ཚོགས་སུ་དབུས་བོད་མིའི་སྒྲིག་འཛུགས་ཀྱི་གནས་སྟངས་དང༌། དེ་བཞིན་བཙན་བྱོལ་བོད་མིའི་གཞི་རིམ་གྱི་འཕྲོད་བསྟེན་ལྟ་རྟོག་དང་གནས་སྟངས་སོགས་ཀྱི་ཐད་གསུང་བཤད་གནང་ཡོད།
དེ་རྗེས་མཐོ་སློབ་ཀྱི་རིགས་བདག་མར་ཀ་(Chancellor) Professsor, Dr. Marek Krawczyk)མཆོག་དང་མཐོ་སློབ་ཞལ་ངོ་(Dean)སྐུ་ཞབས་ཇར་ཇི་(Professor Dr.Jerzy A Polanski)རྣམ་གཉིས་མཆོག
བཀའ་བློན་མཆོག དེ་བཞིན་སློབ་ཟུར་རྣམས་ལ་རྒྱལ་སྤྱིའི་ནང་པོ་ལིཤ་སྨན་པའི་མཐོ་སློབ་ཀྱི་མཚན་མཐོང་གོང་འཕེལ་ཆེད་ཁྱད་དུ་འཕགས་པའི་ཕྱག་ལས་གནང་བར་སྙན་གྲགས་ཅན་གྱི་པོ་ལིཤ་སྨན་པ་སྐུ་ཞབས་ཊ་ཡེ་ཊུ་སི་(Doctor, Tytus Chalubinski)མཚན་ཐོག་ཆེ་བསྟོད་ཀྱི་གཟེངས་རྟགས་ཕུལ་འདུག
ཕྱི་ཚེས་ ༢༧ སྔ་དྲོ་ཆུ་ཚོད་ ༨།༣༥ ཐོག་པོ་ལིཤ་གཟུགས་འཕྲིན་བརྒྱུད་ལམ་(TVN 24)པའི་གསར་འགོད་པ་དང་ཐུག་འཕྲད་གནང་སྟེ་དྲི་བ་དྲིས་ལན་སྐབས་བཀའ་བློན་མཆོག་གིས་ད་ལྟའི་བོད་ནང་གི་གནས་སྟངས་དང༌། ༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་འགན་དབང་མི་མང་ནས་འོས་འདེམས་བྱས་པའི་བཀའ་བློན་ཁྲི་པར་རྩིས་སྤྲོད་མཛད་པའི་སྐོར་སོགས་ལན་འདེབས་གནང། དེ་རྗེས་ཕྱི་དྲོ་ཆུ་ཚོད་ ༤།༠༠ ཐོག་པོ་ལེན་ཌེར་གནས་འཁོད་བོད་རིགས་མི་མང་རྣམས་ལ་བཀའ་བློན་མཆོག་གིས་དབུས་བོད་མིའི་སྒྲིག་འཛུགས་བཀའ་ཤག་སྐབས་ ༡༤ པའི་ལྟ་གྲུབ་གསུམ་དང༌། དེ་བཞིན་འཕྲོད་བསྟེན་ལས་ཁུངས་ཀྱི་ལས་གཞིའི་ཐོག་གསུང་བཤད་གྲུབ་མཚམས་མང་ཚོགས་ཀྱི་དྲི་བ་ཁག་ལ་ལན་འདེབས་གནང༌། ཕྱི་ཚེས་ ༢༨ ཉིན་བཀའ་བློན་མཆོག་པོ་ལེན་ཌེ་གཞུང་གི་གནད་ཡོད་མི་སྣ་ཁག་དང་ལྷན་དུ་མཇལ་འཕྲད་གྲུབ་རྗེས་(Civitus)མཐོ་སློབ་ཏུ་སློབ་ཕྲུག་ཚོར་བཙན་བྱོལ་བོད་མིའི་འཕྲོད་བསྟེན་སྐོར་ཞིབ་ཕྲའི་གསུང་བཤད་གནང་རྒྱུ་ཡིན་འདུག་པ་བཅས། །
