༢༠༡༢ ཟླ་ ༥ ཚེས་ ༢༤ རེས་གཟའ་ཕུར་བུ།
༄༅། །འདི་གའི་ཆེད་གཉེར་གསར་འགོད་པ་སྒྲུབ་བརྒྱུད་ཉི་མ་ལགས་ཀྱིས་རྡོ་སྦི་དཔལ་རབ་གླིང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༥ ཚེས་ ༢༣ ཉིན་བཀའ་ཁྲི་བློ་བཟང་སེང་གེ་མཆོག་གིས་ཧི་མཱ་ཅལ་མངའ་སྡེའི་ནང་རྟེན་གཞི་བྱས་པའི་བོད་མིའི་གཞིས་ཆགས་སྦིར་ཅོན་ཏ་ར་ཁུལ་གྱི་གཞིས་ལས་ཁག་གསུམ་དང༌། བོད་ཁྱིམ་སློབ་གྲྭ་ཁག དེ་བཞིན་མན་ཌི་གཞིས་ལས་ཁང་ཁྱབ་ཁོངས་ཁ་འཐོར་གཞིས་ཆགས་མཚོ་པདྨ་དང་སྤོན་ཌོ་བཀྲིས་གླིང༌། ཀུ་ལུ་གཞིས་ལས་ཁང་གི་ཁྱབ་ཁོངས་མ་ན་ལི་དང་རྡོ་སྦི་དཔལ་རབ་གླིང༌། ཀུ་ལུ་བཅས་སུ་གཞུང་འབྲེལ་འཚམས་གཟིགས་མཇུག་སྒྲིལ་གནང་ཡོད།
དེ་ཉིན་སྔ་དྲོ་ཆུ་ཚོད་ ༩ ཐོག་བཀའ་ཁྲི་མཆོག་གིས་རྡོ་སྦི་དཔལ་རབ་གླིང་གི་གཞིས་མི་རྣམས་ལ་གསུང་བཤད་གནང་རྗེས་དྭགས་པོ་བཤད་སྒྲུབ་གླིང་དགོན་དུ་གནས་གཟིགས་གྲུབ་མཚམས་ཀུ་ལུ་གཞིས་ཆགས་ཀྱི་གཞིས་མི་རྣམས་ལ་གསུང་བཤད་གནང་དོན། དེ་རིང་གཞིས་མི་རྣམས་དང་མཇལ་རྒྱུ་བྱུང་བར་ཧ་ཅང་དགའ་པོ་བྱུང་། འཚམས་འདྲིའི་བཀྲིས་བདེ་ལེགས་ཞུ་གི་ཡོད། ཉེ་ཆར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭའི་སྐོར་གསར་འགྱུར་བརྒྱུད་ལམ་ཁག་ནང་ཐོན་པ་བརྟེན། རྒྱ་ཆེའི་མང་ཚོགས་ལ་དོགས་འདྲོག་དང་ཐུགས་འཚབ་ཡོང་རྒྱུ་གདོན་མི་ཟ་ཡང་། སྤྱིར་བཏང་རྒྱ་གར་དབུས་གཞུང་དང་མངའ་སྡེའི་གཞུང། ཡང་སྒོས་ང་ཚོ་དང་འབྲེལ་ཡོད་ཚན་པ་ཁག་ནས་སྐུ་ཕྱྭའི་སྲུང་སྐྱོབ་ཐད་དོ་འཁུར་ཆེན་པོ་ཞུ་བཞིན་ཡོད་པས་སེམས་འཁྲལ་གནང་མི་དགོས་ཞུ་རྒྱུ་ཡིན། བཀའ་ཤག་གི་ཤེས་ཡོན་གལ་ཆེར་འཛིན་བཞིན་ཡོད་པར་བརྟེན། ཁྱེད་རྣམས་ནས་ཕྲུ་གུའི་ཤེས་ཡོན་ཐད་དོ་སྣང་གང་ལེགས་གནང་དགོས། ང་ཚོའི་ཤེས་ཡོན་སྲིད་བྱུས་འདི་རྗེས་ལུས་ཐེབས་པ་ཞིག་མིན། དེར་བརྟེན་ཕྲུ་གུ་ཆུང་དུས་ནས་སོ་སོའི་མ་སྐད་ཐོག་ཤེས་ཡོན་སློབ་ཁྲིད་བྱེད་རྒྱུ་བྱུང་བ་ཡིན་ན། སློབ་སྦྱོང་གི་གྲུབ་འབྲས་ཡག་པོ་ཐོན་བཞིན་ཡོད་པ་གསུངས་བ་མ་གཏོགས་དབྱིན་ཡིག་སློབ་ཀྱི་མིན། བོད་ཡིག་སློབ་ཀྱི་ཡིན་ཞེས་པའི་སྐད་ཆ་མིན་པས།ཕ་མ་ཚོས་གོ་ནོར་མ་ཐེབས་པ་གནང་དགོས། དེ་བཞིན་གཞིས་ཆགས་ཁག་ཏུ་ས་ཁང་དང་ཕྲུ་གུའི་སློབ་ཡོན་སྐོར་སོགས་བདེ་སྡུག་མ་དག་ཅིག་ཤོད་མཁན་བྱུང་། སྤྱི་ཡོངས་ཐོག་ཞིབ་འཇུག་གིས་འགྲུབ་མ་གྲུབ་ཁག་ཁག་རེད། དཀའ་ངལ་སེལ་ཆེད་ང་ཚོས་འབད་བརྩོན་མཐའ་གཅིག་ཏུ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་རྗེས་བྷུན་ཊར་ཤེས་རིག་ཀྱི་དགེ་འོས་མཐོ་སློབ་འཛུགས་འཆར་གྱི་སློབ་གྲྭར་འཚམས་གཟིགས་གནང་རྗེས་ཐེངས་འདིའི་ཧི་མ་ཅལ་ཁུལ་གྱི་བོད་མིའི་གཞིས་ཆགས་སོགས་ཀྱི་འཚམས་གཟིགས་མཇུག་སྒྲིལ་གནང་ཡོད།
སྤྱིར་བཏང་བཀའ་ཁྲི་མཆོག་གིས་གཞི་ཆགས་ཁག་ཏུ་འཚམས་གཟིགས་ཕེབས་དགོས་དོན་ནི། མི་མང་གི་གནས་སྟངས་མང་ཙམ་མཁྱེན་རྟོགས་ཀྱིས་འབྱུང་འགྱུར་དཀའ་ངལ་དེ་དག་སེལ་ཐབསདང་། བཀའ་ཤག་གི་ལས་དོན་གནང་ཕྱོགས་མི་མང་ནས་ཤེས་རྟོགས་ཡོང་ཆེད་ཡིན་འདུག་པ་བཅས། །