༢༠༡༢ ཟླ་ ༥ ཚེས་ ༢༣ རེས་གཟའ་ལྷག་པ།

པར་ལེན་སྐུ་སྒེར་ཡིག་ཚང།

༄༅། །༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༢ ཟླ་ ༥ ཚེས་ ༢༡ ཉིན་གྱི་ཕྱེད་ཡོལ་དུ་ཨོ་སི་ཊི་རི་ཡའི་གྲོང་ཁྱེར་སལ་སི་བྷག་ Salzburgཏུ་འཛམ་གླིང་ནང་ཆོས་ལུགས་ཕན་ཚུན་འབྲེལ་བ་དང་མཐུན་གཤིབ་གནང་ཕྱོགས། ཞེས་པའི་བརྗོད་གཞིའི་བགྲོ་གླེང་ཐོག་བཀའ་སློབ་སྩལ། སྐབས་དེར་ཡི་ཤུའི་རྣམ་དག་(Catholic)ཆོས་ལུགས་ཀྱི་དབུ་ཁྲིད་ལྕམ་སྐུ་ཌོ་རི་སི་མཆོག་དང། (Mrs. Doris Appel) ཡི་ཤུའི་བླ་ཆེན་སྐུ་ཞབས་ཨེ་ལོ་སི་ཀོ་ཐོ་ག་སར་(Archbishop Dr. Alois Kothgasser) མཆོག སྐུ་ཞབས་(Alois Kothgasser) མཆོག ཡི་ཤུའི་གྲུབ་མཐའ་གསར་མའི་ཆོས་ལུགས་(Protestant) ཀྱི་དབུ་ཁྲིད་སྐུ་ཞབས་མག་ལུ་ཨི་སི་མུ་ལར་ (Mag. Luise Mueller) མཆོག ཇིའུ་དབུ་ཁྲིད་སྐུ་ཞབས་ མག་ཤོ་ལོ་མོ་(Rabbi Mag. Schlomo Hofmeister)མཆོག དེ་བཞིན་ཁ་ཆེའི་བླ་མ་སྐུ་ཞབས་ཕའུཌ་ས་ནག་ (Dr. Fuat Sanac) མཆོག་བཅས་ལྷན་འཛོམས་ཐོག་བཀའ་སློབ་སྩལ་དོན། རྒྱ་གར་ནང་འཛམ་གླིང་གི་ཆོས་ལུགས་གྲགས་ཆེ་བ་དཔེར་ན། ཡི་ཤུ་དང་ཁ་ཆེ། ཇིའུ། ཛོ་ར་སོ་ཊིན་བཅས་དང་དེ་བཞིན་རྒྱ་གར་ནང་དར་བའི་ཧིན་སྡུ་དང་ནང་པ། གཅེར་བུ་བ། སིཀ་བཅས་ཕན་ཚུན་ཞི་བདེའི་ངང་འཚོ་གནས་བྱས་དང་བྱེད་མུས་ཡིན།
ཛོ་ར་སོ་ཊིན་ནམ་པར་སིའི་གྲངས་འབོར་ཧ་ཅང་ཉུང་བའི་སྤྱི་ཚོགས་ཤིག་ཡིན་ཡང། རྒྱ་གར་ནང་ཡར་རྒྱས་ཧ་ཅང་ཕྱིན་ཡོད། ཆོས་ལུགས་ཕན་ཚུན་ལྟ་གྲུབ་མི་འདྲ་ཡང་མི་བཟང་པོ་ཞིག་དང་བྱམས་བརྩེ་ལྡན་པ་ཞིག་བཟོ་རྒྱུར་ཕན་ཐོགས་བྱེད་ཐུབ། དེར་བརྟེན་ངོས་ཀྱིས་ཕྱི་ལོ་ ༡༩༧༥ ལོ་ནས་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུའི་ཆ་རྐྱེན་ལྟ་བུར་ངོས་འཛིན་བྱེད་བཞིན་པའི་ཐབས་ལམ་གསུམ་ཐོག་འབད་བརྩོན་བྱེད་བཞིན་ཡོད་པ་རྣམས་ནི། ཆོས་ལུགས་དབུ་ཁྲིད་དང་མཇལ་འཕྲད་ཀྱིས་གོ་བསྡུར་བྱ་རྒྱུ་དང། ཆོས་ལུགས་སོ་སོའི་ཉམས་ལེན་པའི་ཆོས་པ་ཁག་གཅིག་དང་མཇལ་ཏེ་ཉམས་མྱོང་བརྗེ་ལེན་བྱ་རྒྱུ། དེ་བཞིན་ཆོས་ལུགས་གཞན་གྱི་ལྷ་ཁང་ནང་ཕྱིན་ནས་ཆོས་པ་ཚོ་དང་ལྷན་སྨོན་ལམ་འདོན་རྒྱུ་བཅས་ཡིན་སྐོར་བཀའ་སློབ་སྩལ། ཕྱི་ཚེས་ ༢༢ ཉིན་༸གོང་ས་མཆོག་ཨི་ཊཱ་ལིའི་ཏ་རེས་ཏི་ཞེས་པ་དེར་(Trieste) ཆིབས་སྒྱུར་བསྐྱང་སྟེ་ཁུལ་དེའི་གྲོང་ཁྱེར་ཨུ་ཌེན་Udine. དུ་ཆོས་ལུགས་མཐུན་སྒྲིལ་དང་ཚན་རིག་དང་ནང་ཆོས་བགྲོ་གླེང་ལྷན་ཚོགས་སུ་ལྷན་ཞུགས་མཛད་རྒྱུ་ཡིན་འདུག་པ་བཅས།།