༢༠༡༢ ཟླ་ ༤ ཚེས་ ༣ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༢ ཉིན་ཤེས་རིག་ལས་ཁུངས་ཀྱི་རྒན་དྲུང་བསོད་ནམས་ཆོས་སྒྲོན་ཨ་རིའི་ཁལ་ལི་ཕོར་ནི་ཡའི་མཐོ་སློབ་ཞིག་ཏུ་རིག་འཚོ་མ་ཟིན་པའི་མི་ཞིག་ནས་གང་བྱུང་མེ་མདའ་འཕངས་པའི་དོན་རྐྱེན་འོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་བཀའ་ཤག་ཏུ་སྙན་གསན་བྱུང་བར་བློ་ཕམ་དང་བཅས་དམ་པ་དེ་ཉིད་ཀྱིས་ཚེ་རབས་ནས་ཚེ་རབས་བར་བསགས་པའི་སྡིག་སྒྲིབ་བྱང་ཞིང་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་ཐོབ་ཕྱིར་སྨོན་ལམ་གསུང་འདོན་དང་མྱ་ངན་གུས་འདུད་མཚོན་བྱེད་དབུས་ལས་ཁུངས་ཁག་སྒོ་བརྒྱབ་ཡོད།
དེ་ཡང་གོང་ཚེས་ཉིན་ཕྱི་ཡོལ་ཆུ་ཚོད་ ༣།༣༠ ཐོག་ལས་བྱེད་གསོལ་ཚང་ཡང་སྟེང་ཚོགས་ཁང་དུ་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་སྲི་ཞུའི་ལས་བྱེད་རྣམ་ཚང་འཛོམས་ཐོག་བཀའ་དྲུང་གཡུ་ཐོག་ཀརྨ་དགེ་ལེགས་ལགས་ཀྱིས་དམ་པ་དེའི་ལོ་རྒྱུས་སྒྲོགས་སྦྱང་གནང་དོན། རྒན་དྲུང་བསོད་ནམས་ཆོས་སྒྲོན་ལགས་ཀྱི་ལོ་རྒྱུས་སྙིང་བསྡུས་ནི། ཕྱི་ལོ་ ༡༩༧༨ ཟླ་ ༨ ཚེས་ ༢༥ ཉིན་སྒང་ཏོག་ཏུ་སྐྱེས་ཤིང་། ཕྱི་ལོ་ ༡༩༩༠ ལོར་རྒྱ་གར་ལྷོ་ཕྱོགས་སྦེལ་ཀོབ་བོད་ཁྱིམ་སློབ་གྲྭ་ནས་འཛིན་རིམ་བཅུ་གཉིས་ཐོན། དེ་རྗེས་ལྡི་ལི་མཐོ་སློབ་ནས་ཕྱི་ལོ་ ༢༠༠༢ ལོར་སློབ་ཐོན་གནང་། ཕྱི་ལོ་ ༢༠༠༥ ཟླ་ ༩ ཚེས་ ༧ ནས་གཞུང་ཞབས་གསར་བསྐོའི་ཐོག་བཀའ་དྲུང་ཡིག་ཚང་གི་ཚོད་ལྟའི་གཞོན་དྲུང་དང་། ཕྱི་ཟླ་ ༡༡ ཚེས་ ༡ ནས་ཚོད་ལྟའི་ཐོག་ནང་སྲིད་ལས་ཁུངས་ཀྱི་གཞོན་དྲུང་། ཕྱི་ལོ་ ༢༠༠༦ ཟླ་ ༤ ཚེས་ ༢༦ ཉིན་ལས་བྱེད་ངོ་མར་བསྐོ་གཞག་དང་སྦྲགས་ནང་སྲིད་ལས་ཁུངས་རང་འཇགས། ཕྱི་ལོ་ ༢༠༠༨ ཟླ་ ༦ ཚེས་ ༣ ནས་རྒན་དྲུང་དུ་གནས་སྤར་དང་། ཕྱི་ཟླ་ ༦ ཚེས་ ༡༧ ནས་ཤེས་རིག་ལས་ཁུངས་ཀྱི་རྒན་དྲུང་དུ་གནས་སྤོས་བྱུང་སྟེ་སློབ་ཡོན་སྡེ་ཚན་དུ་ཕྱི་ལོ་ ༢༠༡༠ ཕྱི་ཟླ་ ༦ ཚེས་ ༦ ཉིན་ཕོགས་མེད་གུང་གསེང་མ་ཕེབས་བར་དུ་ཕྱག་ལས་གནང་ཡོད་པ་བཅས། །