༢༠༡༢ ཟླ་ ༤ ཚེས་ ༩ རེས་གཟའ་ཟླ་བ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༣ ཚེས་ ༣༠ ཉིན་མདོ་སྨད་རྒྱལ་རོང་ཚོ་བདུན་ཀིརྟི་དགོན་པའི་དགེ་འདུན་པ་བསྟན་པ་དར་རྒྱས་ལགས་དང་འཆི་མེད་དཔལ་ལྡན་ལགས་ཀྱིས་རང་ལུས་མེར་སྲེག་བཏང་ནས་རྒྱ་ནག་གཞུང་ལ་ངོ་རྒོལ་སྐད་འབོད་གནང་ཡོད་པར་བརྟེན། དགེ་འདུན་པ་འཆི་མེད་དཔལ་ལྡན་ཟླ་བ་དེའི་ཕྱི་ཚེས་ ༣༡ ཉིན་འདས་གྲོངས་སུ་གྱུར་ཡོད་མོད། བསྟན་པ་དར་རྒྱས་ལགས་ད་བར་གསོན་ཙམ་གྱི་གནས་སྟངས་ལྷག་ཡོད་ནའང་། འདི་ཟླའི་ ཚེས་ ༧ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༩།༢༣ ཙམ་ལ་རྔ་པ་ཁུལ་གྱི་སྨན་ཁང་དུ་གཟི་བརྗིད་ལྡན་པའི་ངང་འདས་གྲོངས་སུ་གྱུར་འདུག ཁོང་གི་སྐུ་ཕུང་ནང་མི་དང་དགོན་པར་སྤྲོད་རྒྱུའི་རེ་འདུན་ཤུགས་ཆེ་ཞུས་ནའང་། རྒྱ་གཞུང་གིས་དང་ལེན་མ་བྱས་པར་ཉིན་རྒྱབ་ཆུ་ཚོད་ ༡ ཙམ་ལ་མེར་སྲེག་བཏང་སྟེ་ཕྱི་དྲོའི་དུས་ཚོད་ ༤ ཙམ་ལ་རུས་ཐལ་ཞིག་འབྲེལ་ཡོད་ལ་སྤྲད་པ་དེར་ཡང་མི་ཆོག་པ་མང་པོ་ཞིག་ལ་ཁས་ལེན་གྱིས་མཛུབ་ཐེལ་རྒྱག་དགོས་བྱུང་འདུག དེ་རྗེས་ཁོང་གི་རུས་ཐལ་ཚོ་བདུན་ཀིརྟི་དགོན་པའི་ནང་གདན་འདྲེན་ཞུས་སྐབས་ཀྱང་དྲག་ཆས་ཉེན་རྟོག་པ་སོགས་རླངས་འཁོར་ཆེ་བ་གསུམ་གྱིས་རྗེས་འདེད་བྱས་འདུག དགོན་པའི་གྲྭ་མང་གིས་ཁོང་གི་རྗེས་འཇུག་གི་ཆོ་ག་ཁག་སྒྲུབ་མུས་རེད་འདུག དེང་སྐབས་ཚོ་བདུན་ཀིརྟི་དགོན་པའི་ཐག་ཉེར་ཡོད་པའི་ཆུའི་ཕར་ཕྱོགས་སུ་དམག་མི་དང་དྲག་ཆས་ཉེན་རྟོག་པ་སོགས་འབོར་ཆེན་ཞིག་རྒྱུན་སྡོད་ཀྱིས་དམག་སྦྱོང་འདྲ་མིན་བྱེད་བཞིན་ཡོད་འདུག་པ་བཅས། །
དགེ་འདུན་པ་བསྟན་པ་དར་རྒྱས་ལགས་འདས་གྲོངས་སུ་གྱུར་བ།
གསར་གནས།
འབྲེལ་གནས།
