༢༠༡༢ ཟླ་ ༤ ཚེས་ ༡༣ རེས་གཟའ་པ་སངས།
༄༅། །འདི་གར་ཐེ་ཝན་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༢ ཕྱི་ཟླ་ ༤ ཚེས་ ༡༢ ཉིན་བཏང་གནས་ནང་འཁོད་དོན། ཕྱི་ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་ཐེ་ཝན་རྒྱལ་ས་ཐེ་པེ་གྲོང་ཁྱེར་གྱི་འཕྲོད་བསྟེན་ལས་ཁུངས་ཀྱི་འབྲེལ་ཡོད་དཔོན་རིགས་ཁག་གཅིག་དང་མཇལ་མོལ་གནང་ཡོད། དེ་ཡང་བཀའ་བློན་མཆོག་སྔ་དྲོ་ཐེ་པེ་གྲོང་ཁྱེར་སྨན་ཁང་དུ་གཟིགས་སྐོར་དང་སྨན་ལས་དོ་དམ་འགན་འཛིན་སྐུ་ཞབས་ཞུའུ་ལགས་སོགས་དང་མཇལ་འཕྲད་གནང་སྟེ་ཐེ་ཝན་དང་བཙན་བྱོལ་བོད་མིའི་སྤྱི་ཚོགས་ཀྱི་འཕྲོད་བསྟེན་ལས་གཞིའི་སྐོར་ཕན་ཚུན་ཉམས་མྱོང་བརྗེ་སྤེལ་གནང་ཡོད་པ་མ་ཟད། ཕྱི་དྲོ་ཐེ་ཝན་འཕྲོད་བསྟེན་ལྷན་ཁང་གི་འགོས་ནད་དོ་དམ་སྡེ་ཚན་གྱི་འགན་འཛིན་གཞོན་པ་སྐུ་ཞབས་ཀྲའུ་ལགས་སོགས་མཇལ་འཕྲད་གནང་སྐབས། ཁོང་གིས་ཐེ་ཝན་ནང་གློ་ནད་རིགས་སྔོན་འགོག་བྱེད་སྟངས་སྐོར་སོགས་ངོ་སྤྲོད་གནང་བར། བཀའ་བློན་མཆོག་གིས་རྒྱ་གར་ནང་གི་གློ་ནད་སྔོན་འགོག་སྐོར་ངོ་སྤྲོད་དང་དེ་བཞིན་སྔོན་འགོག་བྱེད་ཐབས་སྐོར་ལ་བཀའ་འདྲི་གནང་ཡོད། དེ་རྗེས་ཐེ་ཝན་འཕྲོད་བསྟེན་བློན་ཆེན་སྐུ་ཞབས་ཆིའུ་ཝིན་ཏཱ་མཆོག་དང་།
འཕྲོད་བསྟེན་བློན་ཆེན་ཟུར་པ། གཞན་ཡང་ཐེ་ཝན་འཕྲོད་བསྟེན་རྒྱལ་སྤྱིའི་མཉམ་འབྲེལ་སྡེ་ཚན་གྱི་འགན་འཛིན་བཅས་མཇལ་འཕྲད་གནང་ཞིང་། བཀའ་བློན་མཆོག་གིས་བཙན་བྱོལ་བོད་མིའི་འཕྲོད་བསྟེན་སྐོར་ངོ་སྤྲོད་གནང་སྟེ་འབྱུང་འགྱུར་བཙན་བྱོལ་བོད་མིའི་འཕྲོད་བསྟེན་གྱི་སྨན་པ་ཐེ་ཝན་ནང་འཕྲོད་བསྟེན་དང་འབྲེལ་བའི་སྦྱོང་བརྡར་སྤྲོད་ཐབས་ཡོང་བའི་སྐོར་སོགས་ཕན་ཚུན་བཀའ་མོལ་ཞིབ་ཕྲ་གནང་འདུག་པ་བཅས།
