༢༠༡༢ ཟླ་ ༤ ཚེས་ ༧ རེས་གཟའ་སྤེན་པ།
༄༅། །ཆེས་མཐོའི་སྨན་པའི་ལྷན་ཚོགས་ཀྱི་ཚོགས་ཆེན་ཐེངས་བཅུ་བདུན་པ་ཉིན་གྲངས་ལྔའི་རིང་ཚོགས་ཏེ་ཕྱི་ལོ་ ༢༠༡༢ ཟླ་ ༤ ཚེས་ ༦ ཉིན་རྡ་ས་བོད་ཀྱི་གསོལ་མགྲོན་ཁང་དུ་མཇུག་སྒྲིལ་གནང་འདུག
དེ་ཉིན་ཕྱི་དྲོ་ཆུ་ཚོད་ ༤ པའི་ཐོག་ཆེས་མཐོའི་སྨན་པའི་ལྷན་ཚོགས་ཀྱི་ཚོགས་གཙོ་ཚེ་རིང་ཐག་གཅོད་ལགས་ཀྱིས་གཙོས་སྐུའི་བླ་ཞབས་པ་རྟ་མགྲིན་ལགས། ཚོགས་གཞོན་དང་། དྲུང་ཆེ། ཚོགས་མི་རྣམ་པ་ལྷན་འཛོམས་ཐོག་ཚོགས་གཙོས་གསུང་བཤད་གནང་དོན། དེང་སྐབས་འཛམ་གླིང་ནང་བོད་ཀྱི་གསོ་རིག་སྙན་གྲགས་ཧ་ཅང་རྒྱས་པའི་དུས་འདིར་ཚོང་ལས་སོགས་ཀྱིས་བོད་ཀྱི་གསོ་རིག་བསྟན་པ་སྤྱིར་གོད་ཆག་མི་འབྱུང་སླད། ཆེས་མཐོའི་སྨན་པའི་ལྷན་ཚོགས་ནས་ད་ལྟ་བར་འབད་བརྩོན་གང་ཐུབ་ཞུས་ཏེ་དེབ་སྐྱེལ་ཞུས་པའི་སློབ་གཉེར་ཁང་གསུམ་ཡོད། དེ་བཞིན་བོད་སྨན་ཚད་ལྡན་དགོས་པར་བརྟེན། སྒེར་གྱི་སྨན་སྦྱོར་ཁང་ཁག་ཀྱང་ཕྱི་ལོ་ ༢༠༡༢ ཟླ་ ༧ ཚེས་ ༡༥ ནང་དེབ་སྐྱེལ་ངེས་པར་དུ་ཞུ་དགོས། དེ་ལྟར་མ་བྱུང་ན་གྲོས་ཚོགས་སུ་སྙན་སེང་ཞུ་རྒྱུ་ཡིན་སྐོར་སོགས་ཀྱི་གསུང་བཤད་གནང་ཡོད།
དེ་བཞིན་སྐུའི་བླ་ཞབས་རྟ་མགྲིན་ལགས་ཀྱིས་ང་ཚོས་སོ་སོའི་རིག་གཞུང་ལ་བརྩི་མཐོང་བྱེད་དགོས་པ་མ་ཟད། ཕྱི་རྒྱལ་འགའ་ཤས་ཀྱིས་བོད་ཀྱི་གསོ་རིག་གཞུང་ལུགས་ལག་ལེན་སྦྱོར་བ་ཆ་རྒྱུས་མེད་པའི་ཐོག་བཙོ་སྦྱངས་ཐད་འགྲེལ་བཤད་ལོག་པ་བརྒྱབ་པ་དང་། བོད་ནང་གསོ་རིག་བོད་སྨན་བཟོ་གྲྭ་ ༧༠ ཡོད་པའི་ནང་ནས་ ༤༠ ཙམ་ཞིག་རྒྱ་མིས་འཛིན་སྐྱོང་བྱས་ནས་ཚོང་ལས་བྱེད་ཀྱི་ཡོད་པར་ཆེས་མཐོའི་སྨན་པའི་ལྷན་ཚོགས་ཙམ་མ་ཡིན་པར་གཞུང་སྒེར་སྤྱི་ཚོགས་ཧྲིལ་པོས་ཐུགས་སྣང་གནང་སྟེ་ཕྱར་གྲུ་མཉམ་འདེགས་དགོས་པའི་འབོད་སྐུལ་གནང་ཡོད།
ཆེས་མཐོའི་སྨན་པའི་ལྷན་ཚོགས་ནི་བཙན་བྱོལ་བོད་མིའི་གྲོས་ཚོགས་ཀྱི་ཁྲིམས་ཡིག་གཏན་འབེབས་ཐོག་བོད་ཀྱི་གསོ་རིག་བསྟན་པ་མི་ཉམས་གོང་འཕེལ་སྲུང་སྐྱོབ་ཆེད། གསོ་རིག་མཐོ་སློབ་ངོས་འཛིན་གྱི་སློབ་གཞི་གཏན་འབེབས་དང་། ཤེས་ཡོན་གང་ལེགས་ཀྱི་སྨན་སྦྱོར་དང་སྨན་པ་ཚད་ལྡན་ཡོང་སླད་ཕྱི་ལོ་ ༢༠༠༤ ལོར་རང་སྐྱོང་གི་ངོ་བོའི་ཐོག་བཙུགས་པ་ཞིག་ཡིན་པ་དང། ད་ལྟའི་ཆར་རྒྱུན་ཞུགས་ཚོགས་མི་བཅུ་དང་། དེབ་སྐྱེལ་ཞུས་པའི་སྨན་པ་གྲངས་ ༤༠༠ ཡོད་པ་བཅས། །