༢༠༡༢ ཟླ་ ༤ ཚེས་ ༥ རེས་གཟའ་ཕུར་བུ།

༄༅།། ཤེས་རིག་ལས་ཁུངས་ནས་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་དང་མཐུན་པའི་གཞི་རིམ་འོག་མའི་དགེ་རྒན་འོས་སྦྱོང་ཞིག་ཕྱི་ལོ་ ༢༠༡༢ ཟླ ༧ ཚེས་ ༡ ནས་ ༢༠༡༣ ཟླ་ ༡༢ ཚེས་ ༣༡ བར་དྷ་རམ་ས་ལའི་ཉེ་འདབས་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་གོ་སྒྲིག་ཞུ་རྒྱུ་ཡིན་ན། འོས་སྦྱོང་ནང་ཞུགས་བློ་ཡོད་རིགས་ནས་ཕྱི་ལོ་ ༢༠༡༢ ཟླ་ ༦ ཚེས་ ༥ འགྱངས་མེད་གཤམ་གསལ་ཁ་བྱང་ཐོག་དགོས་ངེས་ཡིག་ཆ་ཁག་དང་བཅས་སྙན་ཞུ་འབུལ་དགོས་ཤིང༌། དུས་བཀག་རྗེས་སུ་འཚང་སྙན་འབྱོར་རིགས་རང་བཞིན་གྱིས་རྩིས་མེད་གཏོང་རྒྱུ་ཡིན།

དགོས་ངེས་ཆ་རྐྱེན།

• ཉུང་མཐའི་ཤེས་ཚད་ཉེ་བའི་གཙུག་ལག་རབ་འབྱམས་པ་ (B.A/B.Sc/B.Com) ཡང་ན་གཞི་རིམ་སློབ་གྲྭའི་འཛིན་རིམ་བཅུ་གཉིས་ཐོན་རྗེས་ཤེས་རིག་ལས་ཁུངས་ནས་ངོས་འཛིན་ཡོད་པའི་མཐོ་རིམ་རིག་གནས་རབ་འབྱམས་པའི་ལག་འཁྱེར་ཕྱོགས་བསྡོམས་བརྒྱ་ཆ་ ༥༠ ཡན་ལོན་པའི་ངོ་བཤུས།
• གཞི་རིམ་སློབ་གྲྭའི་འཛིན་རིམ་བཅུ་པ་དང་བཅུ་གཉིས་བཅས་ཀྱི་སློབ་ཐོན་ལག་འཁྱེར་དང་བརྒྱ་ཆའི་ཨང་ཤོག་གི་ངོ་བཤུས།
• གཟུགས་ཐང་ལས་འཕེར་ཡིན་པའི་སྨན་པའི་ངོས་སྦྱོར་ངོ་མ།
• འབུལ་འབབ་གཙང་འབུལ་ཟིན་པའི་དཔྱ་ཁྲལ་ལག་དེབ་ཀྱི་ཤོག་གྲངས་དང་པོ་དང་མཐའ་མའི་ངོ་བཤུས།
• གནས་ཡུལ་རྒྱལ་ཁབ་ཏུ་ཁྲིམས་མཐུན་གནས་སྡོད་ཆོག་པའི་ལག་འཁྱེར། (R.C.) ཤོག་གྲངས་དང་པོ་དང་མཐའ་མའི་ངོ་བཤུས།
• ཕྱི་ལོ་ ༢༠༡༢ ཟླ་ ༧ ཚེས་ ༡ ལ་རང་ལོ་ཉི་ཤུ་རྩ་བདུན་ལས་མ་བརྒལ་བ་དགོས་རྒྱུ།༼དེ་ལས་ཉིན་ཤས་བརྒལ་ཀྱང་མི་འཚུད།༽
  1. ཐུགས་སྣང་དགོས་པ།འོས་སྦྱོང་ནང་སློབ་མ་ ༢༠ ལ་གོ་སྐབས་གནང་རྒྱུ་ལགས་ཀྱང་འཛུལ་ཞུགས་གནང་མཁན་སློབ་མ་ཉུང་མཐར་ ༡༠ མ་ལོན་ཚེ་འོས་སྦྱོང་འཛུགས་རྒྱུ་མིན།
  2. འོས་སྦྱོང་རིང་སློབ་ཡོན་དང་སྡོད་ཁང༌། ལྟོ་དོད་བཅས་ཤེས་རིག་ལས་ཁུངས་ནས་གནང་རྒྱུ།
  3. ལམ་གྲོན་དོ་བདག་རང་ངོས་ནས་གཏང་དགོས་རྒྱུ།
  4. འབྲེལ་བ་ཞུ་བདེ་ཆེད་དོ་བདག་སོ་སོའི་ཁ་བྱང་དང་ཁ་པར་ཨང༌། ཨི་མེལ་གྱི་ཁ་བྱང་བཅས་ངེས་འཁོད་དགོས་རྒྱུ།
  5. དགོས་ངེས་ཡིག་ཆ་ཚང་རིགས་རྣམས་རྡ་ས་ཤེས་རིག་ལས་ཁུངས་སུ་ ༢༠༡༢ ཟླ་ ༦ ཚེས་ ༢༦ སྔ་དྲོ་ཆུ་ཚོད་ ༡༠ ཐོག་ངག་རྒྱུགས་ཀྱི་ལམ་ནས་འདེམས་སྒྲུག་གནང་རྒྱུ་ཡིན་ན་དེ་སྐབས་ཡིག་ཆ་ངོ་མ་ཁག་མཉམ་འཁྱེར་གྱིས་ངོ་བཅར་དགོས་རྒྱུ།

  གོང་གསལ་ལག་འཁྱེར་དང་ཡིག་ཆ་ཁག་གི་ངོ་བཤུས་སྟེང་དབུས་བོད་མིའི་སྒྲིག་འཛུགས་ཀྱི་འགན་འཛིན་ལས་བྱེད་ཟུང་དྲུང་ཡན་ནམ་ས་གནས་འགོ་འཛིན། ཡང་ན་བོད་མིའི་སློབ་གྲྭ་གང་རུང་གི་སློབ་སྤྱི་བཅས་སུ་རུང་ནས་ངོ་བཤུས་ཡིག་ཆ་ཁག་ངོ་བཤུས་འཁྲུལ་མེད་ཡིན་པའི་དག་མཆན་མཚན་རྟགས་ངེས་ཞུ་དགོས་པ་བཅས་ཀྱི་གསལ་བསྒྲགས་སུ། དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ནས། ཕྱི་ལོ་ ༢༠༡༢ ཟླ་ ༤ ཚེས་ ༣ ལ།།

  Secretary
  Department of Education
  Central Tibetan Administration
  Gangchen Kyishong
  Dharamsala – 176215
  Distt. Kangra,
  H.P. India Fax: 01892 – 223481 Tel: 01892 – 222572/ 222721
  Email: [email protected] website: www.tcewf.org