༢༠༡༢ ཟླ་ ༤ ཚེས་ ༢༦ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་མཛད་པའི་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༢༣ ཕེབས་པའི་འཁྲུངས་སྐར་ཀྱི་ཉིན་མོ་དང་སྟབས་བསྟུན་རྒྱལ་སྤྱིའི་བོད་དོན་ལས་འགུལ་ཁང་ (ICT) ནས་བོད་ཀྱི་རིག་གཞུང་རྩ་བརླག་འགྲོ་བཞིན་པའི་ཐོག་སྙན་ཐོ་ཞིག་འདོན་སྤེལ་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། སྙན་ཐོ་དེའི་ནང་འཁོད་དོན་གཙོ་བོ་ནི། བོད་ལ་རྒྱ་གཞུང་གི་དྲག་པོའི་སྲིད་བྱུས་ལག་བསྟར་བྱས་ནས་ལོ་ངོ་དྲུག་ཅུ་ལྷག་སོང་བའི་བརྒྱུད་རིམ་ཁྲོད་བོད་མིར་གཉའ་གནོན་དང་གདུག་རྩུབ་ཅན་གྱི་སྲིད་བྱུས་ལག་བསྟར་བྱས་ཏེ། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་རྩ་བརླག་བཏང་དང་གཏོང་མུས་ཡིན་པའི་མི་རིགས་ཤིག་གི་རིག་གཞུང་ཆག་འཇིགས་སོགས་ཀྱི་གནད་དོན་གཙོ་འདོན་གནང་ཡོད་པ་མ་ཟད། སྙན་ཐོ་དེ་བརྒྱུད་རྒྱལ་སྤྱིའི་བོད་དོན་ལས་འགུལ་ཁང་ནས་བོད་ནང་གི་ཛ་དྲག་གནས་སྟངས་ལ་གཞིགས་པའི་བོད་རྒྱ་འབྲེལ་མོལ་གནང་དགོས་སྐོར་དང་། རྒྱ་ནག་གཞུང་གི་སྲིད་བྱུས་ལ་བསྒྱུར་བ། དེ་བཞིན་རྒྱལ་སྤྱིའི་ཚོགས་སྡེ་ཁག་ནས་བོད་དོན་ཐོག་རྒྱབ་སྐྱོར་གྱི་ནུས་པ་ཤུགས་ཆེ་རུ་གཏོང་དགོས་རྒྱུ་གལ་ཆེ་ཆགས་ཡོད་སྐོར་སོགས་ཀྱང་འཁོད་འདུག་པ་བཅས། །
