༢༠༡༢ ཟླ་ ༤ ཚེས་ ༡༠ རེས་གཟའ་མིག་དམར།
༄༅། །འདི་གར་ཐེ་ཝན་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༠ ཟླ་ ༤ ཚེས་ ༡༠ ཉིན་བཏང་གནས་ནང་འཁོད་དོན། ཐེ་ཝན་སྨན་པའི་མཐུན་ཚོགས་ནས་གདན་ཞུ་གནང་དོན་བཞིན་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་ཕྱི་ཚེས་ ༩ ནས་ཉིན་གྲངས་ལྔའི་རིང་ཐེ་ཝན་གྱི་ས་གནས་ཁག་གསུམ་ནང་འཕྲོད་བསྟེན་ལས་ཁུངས་དང་སྨན་ཁང་སོགས་ལ་གཟིགས་སྐོར་དང་། འབྲེལ་ཡོད་སྨན་པ་ཁག་གཅིག་དང་མཇལ་མོལ་ཞུས་ཏེ་འབྱུང་འགྱུར་མཉམ་འབྲེལ་གནང་ཕྱོགས་སོགས་ཆེད་ཐེ་ཝན་དུ་གཟིགས་སྐོར་ཕེབས་འདུག
དེ་ཡང་བཀའ་བློན་མཆོག་ཐེ་ཝན་དུ་ཕེབས་པའི་ཉིན་དང་པོར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་དུ་ཕེབས་ཏེ་དོན་གཅོད་ནས་ལས་དོན་སྙིང་བསྡུས་ངོ་སྤྲོད་ཞུས་རྗེས་དོན་གཅོད་ཁང་གི་མཆོད་ཁང་ནང་ཆུ་ཚོད་གཉིས་ཙམ་རིང་ཐེ་ཝན་དུ་གནས་སྡོད་བོད་མི་སེར་སྐྱ་མི་མང་དང་མཇལ་འཛོམས་ཀྱི་བཞུགས་མོལ་ལྷན་ཚོགས་ཤིག་ཚོགས་ཡོད། ལྷན་ཚོགས་ཐོག་དོན་གཅོད་ཟླ་བ་ཚེ་རིང་ལགས་ཀྱིས་བཀའ་བློན་མཆོག་ཐེ་ཝན་ནང་ཕེབས་དོན་སྐོར་ངོ་སྤྲོད་གནང་བ་དང་། ཐེ་ཝན་གནས་སྡོད་བོད་རིགས་ཚོགས་པའི་ཚོགས་གཙོ་དགྲ་བཅོམ་པ་ལགས་ཀྱིས་ཐེ་ཝན་དུ་གནས་སྡོད་བོད་མི་རྣམས་ཀྱི་ཚབ་ཞུས་ཏེ་བཀའ་བློན་མཆོག་ཐེ་ཝན་ནང་ཕེབས་པར་གུས་བསུའི་མཇལ་དར་ཕུལ་བ་དང་སྦྲགས་བོད་མིའི་གནས་སྟངས་དང་། ཐེ་ཝན་ནང་བོད་དོན་ལས་འགུལ་སྤེལ་བའི་ལས་བསྡོམས་སྙིང་བསྡུས་ངོ་སྤྲོད་དང་། དེ་བཞིན་བོད་རིགས་ཚོགས་པའི་སློབ་སྟོན་པ་བཀྲ་ཤིས་ཚེ་རིང་ལགས་ཀྱིས་བོད་དོན་ལས་འགུལ་སྐབས་གཞུང་འབྲེལ་མིན་པའི་ཚོགས་པ་ཁག་ལ་འབྲེལ་བ་གནང་སྟངས་སྐོར་སོགས་སྙན་སེང་ཞུས་འདུག བཀའ་བློན་མཆོག་གིས་བཀའ་ཤག་གི་སྲིད་བྱུས་དང་། ཕྱག་ལས་གནང་སྟངས། དེ་བཞིན་འཕྲོད་བསྟེན་ལས་ཁུངས་མ་ལག་དང་བཅས་པའི་ལས་དོན་ངོ་སྤྲོད་གནང་བ་མ་ཟད། བོད་མི་རྣམས་ཀྱིས་དྲི་བའི་ཁག་ལ་ཞིབ་ཕྲའི་ལན་འདེབས་བཅས་གནང་། བཀའ་ཁྲི་མཆོག་ཐེ་ཝན་དུ་གདན་ཞུ་གནང་མཁན་སྨན་པའི་མཐུན་ཚོགས་ཀྱི་ཚོགས་གཙོ་ནས་དགོང་དྲོའི་གསོལ་སྟོན་ཞིག་བཤམས་པའི་ཐོག་འཕྲོད་བསྟེན་དང་འབྲེལ་བའི་མི་སྣ་དང་སྨན་པའི་དགེ་རྒན་སོགས་མི་གྲངས་བཅུ་གསུམ་ཙམ་ཕེབས་ཡོད། ཚོགས་གཙོ་ནས་སྐབས་དོན་ཉིན་གྲངས་ལྔ་རིང་གི་ལས་རིམ་ཁག་ངོ་སྤྲོད་དང་། དེ་བཞིན་ཕན་ཚུན་བསམ་ཚུལ་བརྗེ་ལེན་སོགས་འཕྲོད་བསྟེན་དང་འབྲེལ་བའི་སྐོར་ལ་བཀའ་བསྡུར་ལྷུག་པོ་གནང་ཡོད་པ་བཅས།།