༢༠༡༢ ཟླ་ ༤ ཚེས་ ༡༠ རེས་གཟའ་མིག་དམར།
༄༅། །འདི་གར་ཕྱི་ལོ་ ༢༠༡༢ ཟླ་ ༤ ཚེས་ ༩ ཁུངས་ལྡན་གནས་ཚུལ་འབྱོར་གསལ་ལྟར་ན། ཉེ་དུས་ལྷ་ས་གྲོང་ཁྱེར་སྤྱི་བདེ་ཚན་པས་ད་ལྟ་རང་ལོ་ ༢༠ ཙམ་ཡིན་པའི་ཕུར་བུ་རྣམ་རྒྱལ་ལགས་ཀྱིས་ཟླ་བའི་ནང་ནས་༸གོང་ས་མཆོག་གི་ཞལ་མཇལ་ཐོབ་ཐབས་གནང་ཡོད་པ་དེ་ཁྲིམས་འགལ་གྱིས་བྱ་སྤྱོད་ཡིན་པའི་ཉེས་འཛུགས་འོག་གློ་བུར་འཛིན་བཟུང་བྱས་པའི་གནས་ཚུལ་ཐོན་འདུག
གནས་ཚུལ་དེའི་འབྱུང་རྐྱེན་གཙོ་བོ་ནི། ཕུར་བུ་རྣམ་རྒྱལ་ལགས་ནང་མ་ཁང་ཞིག་ཏུ་ལས་ཀ་བྱེད་བཞིན་པའི་སྐབས། ཁོང་གིས་རོགས་པ་ཁག་གཅིག་ལ་དགོང་མོ་ཟླ་བ་ཤར་རྗེས་ནམ་མཁར་བལྟས་ཚེ་ཟླ་བའི་ནང་ནས་༸གོང་ས་མཆོག་མཇལ་གྱི་འདུག་ཅེས་བཤད་དེ་རོགས་པ་ཁག་གཅིག་ཁྲིད་ནས་ནང་མ་ཁང་གི་སྒོ་འགྲམ་ནས་ནམ་མཁར་བལྟས་ཏེ་ཟླ་བའི་ནང་ནས་༸གོང་ས་མཆོག་གི་ཞལ་མཇལ་ཡོང་ཐབས་གནང་བཞིན་པའི་སྐབས། ས་གནས་སྤྱི་བདེ་ཉེན་རྟོག་པས་ཤེས་རྟོགས་བྱུང་སྟེ་དེ་ནི་ཁྲིམས་འགལ་གྱི་བྱེད་སྟངས་ཤིག་རེད་ཅེས་བརྗོད་དེ་ཕུར་བུ་རྣམ་རྒྱལ་ལགས་ཟླ་བ་སྔོན་མའི་ནང་འཛིན་བཟུང་གིས་བཀག་ཉར་བྱས་ཡོད་འདུག
ཕུར་བུ་རྣམ་རྒྱལ་ལགས་ནི་འཕན་པོ་ལྷུན་གྲུབ་རྫོང་ཁོངས་སུ་སྐྱེས་པ་དང༌། དེང་སྐབས་ལྷ་སར་ནང་མ་ཁང་ཞིག་ཏུ་ལས་ཀ་བྱས་ཏེ་འཚོ་རྟེན་འཚོལ་བཞིན་ཡོད་འདུག རྒྱ་ནག་གཞུང་ནས་ཁོང་གིས་ནང་མ་ཁང་གི་སྒོ་འགྲམ་ནས་ནམ་མཁར་བལྟས་ཏེ་༸གོང་ས་མཆོག་གི་ཞལ་མཇལ་ཞུ་ཐབས་བྱས་པ་དེ་ནི་ཁྲིམས་འགལ་གྱི་བྱེད་སྟངས་ཤིག་རེད། ཅེས་བརྗོད་ནས་འཛིན་བཟུང་བཀག་ཉར་བྱས་ཏེ་ད་ལྟའི་ཆར་ས་གནས་གང་ཞིག་ཏུ་བཀག་ཉར་བྱས་ཡོད་མེད་ཀྱི་ཤེས་རྟོགས་མེད་པར་གྱུར་འདུག་པ་བཅས། །