༢༠༡༢ ཟླ་ ༤ ཚེས་ ༢ རེེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༢ ཉིན་རྡ་ས་གངས་སྐྱིད་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་བཙན་བྱོལ་བོད་མིའི་སྨན་བཅོས་བལྟ་སྐྱོང་ལས་གཞི་འགོ་འཛུགས་ཀྱི་གསར་འགོད་གསལ་བསྒྲགས་སྤེལ་བ།
དེ་ཉིན་སྔ་དྲོ་ཆུ་ཚོད་ ༡༡།༣༠ ཐོག་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་། དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས། ལས་གཞིའི་འགན་འཛིན་དྲུང་འཕར་ཚེ་རྒྱལ་ལགས། གསར་འགོད་རྣམ་པ་བཅས་ལྷན་འཛོམས་ཐོག་འཕྲོད་བསྟེན་བཀའ་བློན་མཆོག་གིས་བཙན་བྱོལ་བོད་མིའི་སྨན་བཅོས་བལྟ་སྐྱོང་ལས་གཞི་འགོ་འཛུགས་ཀྱི་གསར་འགོད་གསལ་བསྒྲགས་སྒྲོགས་སྦྱང་གནང་དོན། ༼འཛམ་གླིང་ཡུལ་གྲུ་ཕལ་མོ་ཆེ་བའི་ནང་མི་མང་ལ་འཕྲོད་བསྟེན་ཉེན་སྲུང་ངམ། འཕྲོད་བསྟེན་ཐོག་ཛ་དྲག་དཀའ་ངལ་སྲུང་སྐྱོབ་མཐུན་རྐྱེན་འདང་ངེས་ཤིག་མེད་པའི་གནས་སྟངས་ལ་རྒྱལ་སྤྱིའི་ནང་དོ་སྣང་སེམས་འཚབ་དགོས་པའི་གལ་ཆེའི་གནད་དོན་ཞིག་ཆགས་ཡོད།  བཙན་བྱོལ་བོད་མིའི་སྤྱི་ཚོགས་ནང་ཁྱིམ་ཚང་རེ་རེའི་ཡོང་འབབ་ཀྱི་བརྒྱ་ཆ་ ༡༤ ཙམ་སྨན་བཅོས་ཁོ་ནའི་ཆེད་གཏོང་དགོས་ཆགས་ཀྱི་ཡོད་པ་མ་ཟད། ནད་གཞི་ཚབས་ཆེ་ཕོག་སྟེ་སྨན་ཁང་དུ་ཉལ་སྡོད་སྨན་བཅོས་བྱ་དགོས་བྱུང་སྐབས་དེ་དག་གི་སྨན་གྲོན་གཏོང་དམིགས་མེད་པའི་སེམས་ངལ་ནི་དེ་བས་ཀྱང་ཆེ་བ་ཞིག་འབྱུང་གི་ཡོད་པ་སྨོས་མ་དགོས། དེས་ན་ད་ལྟའི་གནས་སྐབས་ཀྱི་སྨན་བཅོས་གཙོ་བོར་བཟུང་བའི་ལམ་ལུགས་འདིར་བསྒྱུར་བཅོས་གཏོང་དགོས་དུས་ལ་སླེབས་པར་གཟིགས་ཏེ་བོད་མིའི་དྭང་བླངས་འཕྲོད་བསྟེན་ཚོགས་པའི་འགན་འཁུར་འོག་བོད་མི་ཡོངས་ལ་རིམ་པ་གཉིས་པ་དང་གསུམ་པའི་སྨན་བཅོས་མཐུན་འགྱུར་སྤྲོད་ཆེད་༼བཙན་བྱོལ་བོད་མིའི་སྨན་བཅོས་བལྟ་སྐྱོང་ལས་གཞི།༽ ཞེས་པའི་ཉེན་སྲུང་ལྟ་བུའི་ལས་གཞི་འདི་གསར་འཛུགས་ཞུས། ལས་གཞི་འདིས་བོད་མིའི་སྤྱི་ཚོགས་ནང་ཆེས་ཉམ་ཐག་རིགས་ལ་སྨན་བཅོས་ཀྱི་འགྲོ་གྲོན་ཆ་ཚང་མཁོ་སྤྲོད་ཐུབ་པ་བྱ་རྒྱུ་མ་ཟད། གཞན་རྣམས་ལའང་ཚད་མཐོའི་མཐུན་འགྱུར་སྦྱོར་རྒྱུའི་ལས་གཞི་ཁྱད་པར་བ་ཞིག་ལ་ངོས་འཛིན་ཞུ་ཆོག ལས་གཞི་འདི་བཞིན་འདི་ལོའི་ཕྱི་ཟླ་ ༤ ཚེས་ ༡ ནས་དངོས་སུ་འགོ་འཛུགས་ཞུས་པར་གསར་འགོད་གསལ་བསྒྲགས་འདི་སྤེལ་བཞིན་ཡོད། ལས་གཞི་འདི་ནི་སྨན་བཅོས་ཉེན་སྲུང་གི་མཐུན་རྐྱེན་བསྐྲུན་རྒྱུའི་ངོ་བོའི་ཐོག་བཙན་བྱོལ་བོད་མིའི་སྤྱི་ཚོགས་ཀྱི་འཕྲོད་བསྟེན་སྲུང་སྐྱོབ་དང༌། གོང་མཐོར་གཏོང་ཐབས་ཀྱི་ལས་གཞི་གལ་གནད་ཆེ་བ་ཞིག་ཡིན། ལས་གཞི་འདིའི་ནང་ཞུགས་མིན་ལ་མ་བལྟོས་པར་འཕྲོད་བསྟེན་ལས་ཁུངས་ནས་གནང་བཞིན་པའི་ཛ་དྲག་སྨན་བཅོས་ཀྱི་མཐུན་འགྱུར་ཕྱི་ལོ་ ༢༠༡༢ ཟླ་ ༣ ཚེས་ ༣༡ ནས་གནང་རྒྱུ་མཚམས་འཇོག་ཞུས་པ་ཡིན། རླབས་ཆེན་གྱི་ལས་གཞི་འདིའི་ནང་མཉམ་ཞུགས་གནང་མཁན་གྱི་རང་རིགས་ཚང་མར་ཐུགས་རྗེ་ཆེ་ཞུ་དང་ཆབས་ཅིག་ད་དུང་མཉམ་ཞུགས་གནང་རྒྱུ་ལུས་པ་རྣམས་ནས་སྤྱི་ཚོགས་དང་ལྷག་དོན་སོ་སོའི་འཕྲོད་བསྟེན་གལ་ཆེར་དགོངས་ཏེ་མཉམ་ཞུགས་གནང་རོགས་ཞེས་འབོད་སྐུལ་ཞུ་རྒྱུ་ཡིན། ལྷག་པར་དགོན་སྡེ་ཁག་དང་སློབ་གྲྭ་ཁག ཚོགས་སྐྱིད་ལ་སོགས་པ་རྣམས་ནས་སྤྱི་ཚོགས་ཀྱི་འཕྲོད་བསྟེན་ལ་དམིགས་བསལ་ཐུགས་འགན་བཞེས་ཏེ་དགེ་བཙུན་དང་སློབ་ཕྲུག ལས་བྱེད་ཇི་ཡོད་ལས་གཞི་འདིའི་ནང་མཉམ་ཞུགས་ཡོང་བའི་འབོད་སྐུལ་ཞུ་རྒྱུ་བཅས་ཀྱི་གསར་འགོད་གསལ་བསྒྲགས་སུ།༽ ཞེས་གསར་འགོད་གསལ་བསྒྲགས་སྒྲོགས་སྦྱང་གནང་རྗེས་འབྲེལ་ཡོད་ལས་གཞིའི་འགན་འཛིན་དྲུང་འཕར་ཚེ་རྒྱལ་དང་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་ཀྱིས་བཙན་བྱོལ་བོད་མིའི་འཕྲོད་བསྟེན་ལས་ཁུངས་ཀྱིས་སྨན་བཅོས་བལྟ་སྐྱོང་ལས་གཞི་དེ་བཙན་བྱོལ་བོད་མི་ཉམ་ཐག་ཙམ་དུ་མ་ཟད་། བོད་མི་ཁྱོན་ཡོངས་ལ་སྨན་བཅོས་བལྟ་སྐྱོང་གི་ཉེན་སྲུང་ཚད་ལྡན་ཞིག་ཐོབ་ཆེད། སྤྱི་ཚོགས་བདེ་དོན་ཞབས་ཞུ་ཁོ་ནའི་ཐོག་འཛིན་སྐྱོང་འགྲོ་གྲོན་སོགས་ནར་གཏོང་ཡིན་པ་ལས་ཁེ་ལས་སོགས་མིན་པའི་དྲི་བ་ཁག་ལ་ལན་འདེབས་གནང་སྟེ་གནང་ཡོད་པ་བཅས། །