༢༠༡༢ ཟླ་ ༤ ཚེས་ ༤ རེས་གཟའ་ལྷག་པ།

༄༅། །ཕྱི་དྲིལ་སྒྲ་བརྙན་ཚན་པའི་གསར་འགོད་པ་རྣམ་རྒྱལ་ཚེ་དབང་ལགས་ཀྱིས་ཉི་ཧོང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༤ ཚེས་ ༣ ཉིན་གྱི་བཀའ་བློན་ཁྲི་པ་མཆོག་གིས་བཙན་བྱོལ་བོད་མིའི་སྤྱི་ཚོགས་ནས་འདས་པའི་ལོ་ ༥༠ རིང་མང་གཙོ་འཕེལ་རྒྱས་ཡོང་ཐབས་དང་འཚེ་མེད་ཞི་བའི་ལྟ་གྲུབ་གོང་འཕེལ་ཆེད་འབད་བརྩོན་གནང་དང་གནང་མུས་ཡིན་པ་མ་ཟད།
འབྱུང་འགྱུར་ཡང་རྒྱལ་སྤྱིའི་ངོས་ནས་རྒྱབ་སྐྱོར་ཐོབ་མིན་ལ་མ་ལྟོས་པར་མུ་མཐུད་ཤར་བསྐྱོད་བྱ་རྒྱུ་ཡིན་ཞེས་ཉི་ཧོང་ནང་རྟེན་གཞི་བྱས་པའི་( Japan Institute for National Fundamentals ) བསྟི་གནས་ཁང་གིས་གོ་སྒྲིག་གནང་བའི་ཨེ་ཤི་ཡའི་ནང་རང་དབང་དང་མང་གཙོ་ཁྱབ་སྤེལ། ཉི་ཧོང་ནས་དེའི་ཐོག་གང་བྱེད་ཐུབ་ཀྱི་རེད། (Freedom in Asia and the wave of democratization. What Japan expect to do?) ཅེས་པའི་བརྗོད་གཞིའི་བགྲོ་གླེང་ཚོགས་འདུ་ཐོག་གསུང་བཤད་གནང་ཡོད།

དེ་བཞིན་བགྲོ་གླེང་ཚོགས་འདུའི་ཐོག་སྲིད་བློན་ཟུར་པ་དང༌། རྩོམ་པ་པོ། ཤེས་ཡོན་ཅན་དང༌། མཁས་དབང་སོགས་བོད་དོན་ཐོག་ཐུགས་སྣང་ཅན་གྱི་མི་སྣ་ལྔ་བརྒྱ་སྐོར་ཞིག་བཅར་ཡོད་པ་དང༌། ཚོགས་བཅར་བའི་ངོས་ནས་སེམས་ཚོར་ཆེན་པོའི་ཐོག་ནས་བོད་ཀྱི་ཛ་དྲག་གནས་སྟངས་ལ་སེམས་འཚབ་དང་གདུང་སེམས་མཉམ་སྐྱེའི་ཡོད་སྐོར་གསུངས་ཡོད། བཀའ་བློན་ཁྲི་པ་མཆོག་གི་གསུང་བཤད་ནང་། བཙན་བྱོལ་བོད་མིའི་མང་གཙོའི་འཕེལ་རིམ་སྐོར་དང༌། ད་ལྟའི་བོད་ནང་གི་ཛ་དྲག་གནས་སྟངས་སོགས་ཀྱི་སྐོར་འགྲེལ་བརྗོད་ཞིབ་ཕྲ་གནང་ཡོད། ཁོང་གིས་བོད་ནང་གི་དངོས་ཡོད་གནས་སྟངས་སྐོར་འགྲེལ་བརྗོད་གནང་སྐབས། བོད་ནང་རྒྱ་ནག་གཞུང་གིས་དྲག་གནོན་ཧ་ལས་པ་བྱེད་ཀྱི་ཡོད། བོད་མི་ཚོས་དྲག་གནོན་ལ་མ་བཟོད་པར་ངོ་རྒོལ་གཅིག་མཇུག་གཉིས་མཐུད་ཡོང་གི་ཡོད། ད་བར་བོད་མི་ ༣༣ ནས་རང་ལུས་མེར་སྲེག་བཏང་སྟེ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ངོ་རྒོལ་གནང་བ་རེད། ང་ཚོ་ཚང་མ་མི་རེད། ཚང་མས་ཚེ་སྲོག་ལ་གཅེས་འཛིན་བྱེད་ཀྱི་ཡོད། སུ་ཡིནའང་ཤི་འདོད་ཡོད་མ་རེད། གནས་སྟངས་དེ་གང་འདྲ་བྱས་ནས་ཡོང་གི་ཡོད་རེད་དམ་ཞེ་ན། རྒྱ་གཞུང་གི་ཆེས་གདུག་རྩུབ་ཅན་གྱི་སྲིད་བྱུས་ལ་འུ་ཐུག་ཐབས་ཟད་ནས་བོད་ནང་གི་དངོས་ཡོད་གནས་ཚུལ་ཁག་འཛམ་གླིང་མི་མང་གི་ཤེས་རྟོགས་ཡོང་རྒྱུའི་ཆེད་བྱ་སྤྱོད་དེ་རིགས་སྤེལ་གྱི་ཡོད། ཏུ་ནེ་ཤི་ཡའི་ནང་གཞོན་སྐྱེས་ཤིག་གིས་རང་ལུས་མེར་སྲེག་བཏང་བའི་དོན་རྐྱེན་དེར་རྒྱལ་སྤྱིའི་ཐོག་ཛ་དྲག་ཆེན་པོའི་ཐོག་ནས་རྒྱབ་སྐྱོར་གནང་ཡོད། དེར་ང་ཚོས་བསྔགས་བརྗོད་ཞུ་ཡི་ཡོད། ཡིན་ནའང་བོད་ཀྱི་གནད་དོན་དེ་ག་རེ་ཆགས་པ་རེད། བོད་ནང་བོད་མི་རང་ལུས་མེར་སྲེག་གཏོང་མཁན་ཚོའི་ཚེ་སྲོག་ཡང་དེ་མཚུངས་ཀྱི་རྩ་ཆེན་པོ་ཡིན། བོད་ནང་གི་བོད་མི་ཚོས་འདས་པའི་ལོ་དྲུག་ཅུའི་རིང་སོ་སོའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་རྒྱུའི་གོ་སྐབས་མ་བྱུང་བར་བརྟེན། ༸གོང་ས་མཆོག་བོད་ལ་གདན་འདྲེན་ཞུ་རྒྱུ་དེ་ཁོང་རྣམ་པའི་མངོན་འདོད་དང་པོ་དེ་རེད། དེ་ནས་བོད་ལ་རང་དབང་དང༌། ཆོས་དད་རང་མོས། སྐད་ཡིག་རང་དབང་སོགས་ཀྱི་དགོས་འདུན་འདོན་གྱི་ཡོད། བོད་མི་ ༣༣ ནས་རང་ལུས་མེར་སྲེག་གཏོང་དགོས་ཐུག་པའི་རྒྱུ་མཚན་ཡང་དེ་ཡིན། ཁོང་རྣམ་པས་སུ་ལའང་གནོད་འཚེ་བྱས་མེད། གནས་ཚུལ་དེ་ཚོ་བློ་ཕམ་པོ་དང༌། ཡིད་སྐྱོ་བོ་ཞིག་རེད། ང་རང་ད་ལམ་འདི་གར་ཁོང་རྣམ་པའི་རེ་འདུན་དེ་ཚོ་འཛམ་གླིང་མི་མང་ལ་ཞུ་རྒྱུའི་ཆེད་དུ་བཅར་བ་ཡིན་ཞེས་གསུང༌། ཡང་ཚོགས་བཅར་བའི་འདྲི་བར་ལན་འདེབས་གནང་སྐབས་དབུ་མའི་ལམ་ནི་བོད་ཀྱི་དཀའ་རྙོག་སེལ་བའི་སྲིད་བྱུས་རེད། གྲོས་མོལ་ནི་ཐབས་ལམ་ཞིག་ཡིན་ཞེས་གསུང༌། དེ་བཞིན་༸རྒྱལ་བའི་ཡང་སྲིད་སྐོར་དང༌། བོད་རྒྱ་འབྲེལ་མོལ་གྱི་གནས་སྟངས་སོགས་ཀྱི་འདྲི་བར་ལན་འདེབས་ཀྱང་གནང་ཡོད།

དེ་ཉིན་སྔ་དྲོ་བཀའ་ཁྲི་མཆོག་གིས་རྒྱལ་ས་ཊོཀ་ཁྱོའི་ནང་རྟེན་གཞི་བྱས་པའི་ཕྱི་སྡོད་རྒྱ་རིག་གསར་འགོད་པ་ Over Seas Chinese Media ཁག་དང་ཟུར་དུ་མཇལ་འཕྲད་གནང་ནས་བོད་ནང་གི་གནས་སྟངས་དང༌། བཙན་བྱོལ་བོད་མིའི་མང་གཙོའི་འཕེལ་རིམ་སྐོར་སོགས་འགྲེལ་བརྗོད་དང་སྦྲགས་གསར་འགོད་པའི་འདྲི་བར་ལན་འདེབས་གནང་ཡོད། བཀའ་བློན་ཁྲི་པ་མཆོག་ Japan Institute for National Fundamentals ཞེས་པའི་བསྟི་གནས་ཁང་ནས་གདན་ཞུས་ལྟར་ཆེད་ཕེབས་གནང་ཡོད་པ་བཅས།