༢༠༡༢ ཟླ་ ༤ ཚེས་ ༢༧ རེས་གཟའ་པ་སངས།
༄༅། །ཕྱི་ལོ ༢༠༡༢ ཟླ་ ༤ ཚེས་ ༢༦ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཆི་ཁ་གོར་རྟེན་གཞི་བྱས་པའི་ལོ་ཡོ་ལ་གཙུག་ལག་སློབ་གྲྭའི་ཡི་ཤུའི་མཆོད་ཁང་དུ་ཆི་ཁ་གོ་དང་མེ་ཌི་སོན། བྷུ་ལུ་མིན་ཊོན། མིན་ནེ་པོ་ལི་སི་སོགས་ནས་ཁྱོན་བོད་མི་གྲངས་ ༥༠༠ ཙམ་འདུ་འཛོམས་བྱུང་བའི་ཐོག་ཆིབས་སྒྱུར་བསྐྱངས་ཏེ་ལམ་སྟོན་བཀའ་སློབ་སྩལ་ཡོད། དེ་ཡང་མགོན་པོ་གང་ཉིད་མཆོག་ཁུལ་དེར་༸ཞབས་སོར་འཁོད་མཚམས་གཙུག་ལག་སློབ་གྲྭའི་འབྲེལ་ཡོད་ལས་བྱེད་རྣམས་དང་བོད་ཀྱི་ཐེབས་རྩའི་འགན་འཛིན། དེ་བཞིན་ཆི་ཁ་གོ་བོད་རིགས་མཐུན་ཚོགས་ཀྱི་ཚོགས་གཙོ་སོགས་ཀྱིས་མཇལ་དར་སྒྲོན་འབུལ་དང་ལྷན་མཇལ་ཁ་ཞུས་ཡོད་པ་མ་ཟད། བོད་ཕྲུག་ཕོ་མོ་གཉིས་ཀྱིས་༸གོང་ས་མཆོག་ལ་གྲོ་སོ་ཕྱེ་མར་འདེགས་འབུལ་ཞུས་པ་དང་སྦྲགས། བོད་ཕྲུག་ན་གཞོན་ཕོ་མོ་ཁག་གཅིག་གིས་གླུ་དབྱངས་ལམ་ནས་མགོན་པོ་གང་ཉིད་མཆོག་ལ་ཕེབས་བསུ་གཟབ་རྒྱས་ཞུས་ཡོད། དེ་རྗེས་༸གོང་ས་མཆོག་གིས་བོད་མིའི་ཐུན་མིན་རིག་གཞུང་གལ་གནད་ཆེ་ཚུལ་སྐོར་བཀའ་སློབ་སྩལ་གྲུབ་བསྟུན། མགོན་པོ་གང་ཉིད་མཆོག་གཙུག་ལག་སློབ་གྲྭའི་ཇན་ཊལ་Gentile Arena ཞེས་པའི་ས་གནས་སུ་ཆིབས་སྒྱུར་བསྐྱངས་ཏེ་བོད་ཀྱི་ཐེབས་རྩས་གོ་སྒྲིག་འོག་ཆོས་ལུགས་མཐུན་སྒྲིལ་དང་འཚེ་མེད་ཞི་བའི་ཐོག་མང་ཚོགས་ལ་བཀའ་སློབ་སྩལ་ཡོད། ཐོག་མར་ཨི་ལེ་ནོ་ཡེ་སིའི་མངའ་ཁུལ་གྱི་སློབ་གྲྭ་ཁག་གསུམ་ནས། འཚེ་བ་མེད་པའི་ལམ་ནས་ཁྱིམ་ཚང་དང་སྤྱི་ཚོགས། རྒྱལ་སྤྱིའི་ནང་འཚེ་བ་ཇི་ལྟར་འགོག་ནུས། ཞེས་པའི་བརྗོད་གཞིའི་ཐོག་རྩོམ་ཡིག་གི་བྱ་དགའ་ཐོབ་པའི་སློབ་ཕྲུག་གསུམ་གྱིས་རེ་རེ་བཞིན་རྩོམ་ཡིག་སྙན་སྒྲོན་ཞུས། དེ་རྗེས་གློག་བརྙན་འཁྲབ་སྟོན་པ་དང་སྤྱི་ཚོགས་ཞབས་ཞུ་བ་སྐུ་ཞབས་ཤིན་པན་ལགས་ཀྱིས་མང་ཚོགས་ལ་༸གོང་ས་མཆོག་ངོ་སྤྲོད་ཞུས་རྗེས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། སློབ་ཕྲུག་ཚོའི་རྩོམ་ཡིག་ཧ་ཅང་ཡག་པོ་བྱུང་འདུག ཁྱེད་རང་ཚོ་དུས་རབས་ ༢༡ མི་ཆགས་ཡོད། མ་འོངས་པ་ཇི་འདྲ་ཞིག་ཡོང་མིན་སུས་ཀྱང་བརྗོད་མི་ཐུབ། འོན་ཀྱང་མ་འོངས་པ་གང་འདྲ་ཞིག་བྱུང་མིན་ད་ལྟའི་བྱེད་ཕྱོགས་ལ་རག་ལུས་ཡོད། དེར་བརྟེན་གཞོན་སྐྱེས་ཚོས་མ་འོངས་པའི་འཆར་སྣང་དང་དམིགས་ཡུལ་རྣམས་བསྒྲུབ་རྒྱུར་གྲ་སྒྲིག་དགོས། ང་ཚོས་དངོས་ཡོད་གནས་ཚུལ་ཤེས་ཆེད་ཕྱོགས་ཡོངས་ནས་ལྟ་ཐུབ་པ་དགོས། འཚེ་བ་མེད་པ་བརྗོད་སྐབས་འཚེ་བའི་བྱེད་ལས་མེད་པ་ཙམ་གྱིས་གོ་དོན་མིན་པར་དེ་ནི་ཀུན་སློང་ལ་རག་ལུས་ཡོད། གཞན་ལ་ཕན་སེམས་གྱི་ཀུན་ནས་བླངས་པའི་བྱམས་བརྩེའི་བྱེད་ལས་དེ་ཡང་འཚེ་བ་མེད་པའི་བྱེད་ལས་ཤིག་ཡིན།
ཆོས་ལུགས་བྱེ་བྲག་པ་གཅིག་གི་ལངས་ཕྱོགས་བཟུང་སྟེ་ནང་གི་བཟང་པོའི་རིན་ཐང་གོང་མཐོར་གཏོང་ཐབས་བྱས་ཚེ་ཚང་མས་ཡིད་ཆེས་བྱ་རྒྱུའི་ཐུན་མོང་གི་ཆོས་ལུགས་ཤིག་མེད་པར་བརྟེན། ཐབས་ལམ་དེ་ཀུན་ལ་ཁྱབ་ཐུབ་ཐབས་མེད་ཅེས་སོགས་ཀྱི་བཀའ་སློབ་སྩལ་ཡོད་པ་མ་ཟད། སྐབས་དེར་མགོན་པོ་གང་ཉིད་མཆོག་གིས་ལྗགས་རྩོམ་མཛད་པའི་ཆོས་ལུགས་ཀྱི་ས་མཚམས་ལས་འདས་པའི་འཇིག་རྟེན་ཀུན་ལ་སྨན་པའི་བཟང་སྤྱོད། ཅེས་པ་ལུང་འདྲེན་མཛད་དེ་ཆོས་ལུགས་ལ་མ་རྟེན་པའི་ཐབས་ལམ་ཐོག་ནས་ནང་གི་བཟང་པོའི་རིན་ཐང་གོང་མཐོར་གཏོང་ཐབས་སྐོར་བཀའ་སློབ་སྩལ་བ་མ་ཟད། གནད་དོན་དེའི་ཐོག་རྒྱ་གར་དང་ཨ་རི་སོགས་ཀྱི་གཙུག་ལག་སློབ་གྲྭ་ཁག་གཅིག་གི་ནང་དེང་སྐབས་ཐབས་ལམ་དེའི་སྐོར་ཉམས་ཞིབ་བྱེད་བཞིན་ཡོད་སྐོར་བཀའ་སྩལ།
དེ་རྗེས་ཆིབས་སྒྱུར་དང་འབྲེལ་བའི་རྩིས་ཁྲ་སྙན་སྒྲོན་ཞུས་རྗེས་མང་ཚོགས་ཀྱི་དྲི་བར་བཀའ་ལན་སྩལ་ཡོད།
ཉིན་གུང་ལྗགས་སྨིན་གྲུབ་མཚམས་ཕྱེད་ཡོལ་གཙུག་ལག་སློབ་གྲྭས་གོ་སྒྲིག་འོག་ཆོས་ལུགས་མཐུན་སྒྲིལ་སྐོར་བཀའ་སློབ་སྩལ་ཡོད་པ་བཅས།།
