༢༠༡༢ ཟླ་ ༤ ཚེས་ ༢༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༢༡ ཉིན་གྱི་ཕྱེད་ཡོལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ནུབ་ཕྱོགས་མངའ་སྡེ་ལོང་བྷི་ཆིའི་(Long Beach)ཁུལ་དུ་དཀའ་རྙོག་གི་དུས་སྐབས་སུ་ཞི་བདེ་སྐྲུན་ཐབས།(Peace in Troubled Times.)ཞེས་པའི་བརྗོད་གཞིའི་ཐོག་མི་དམངས་སྟོང་ཚོ་མང་པོར་བཀའ་སློབ་སྩལ་དོན། འཛམ་གླིང་འདིའི་ནང་གི་མི་རྣམས་ནས་མྱངས་དང་མྱོང་བཞིན་པའི་དཀའ་རྙོག་དེ་དག་འབྱུང་ཁུངས་གཙོ་བོ་ནི།  མིའི་ཀུན་སྤྱོད་ལ་ཐུག་ཡོད།  དེང་སྐབས་འཛམ་གླིང་འདིའི་སྟེང་མིས་གདོང་ལེན་དང་ཁ་གཏད་གཅོག་དགོས་པའི་དཀའ་རྙོག་ཁག་གི་གཞི་རྩ་ནི་མི་རང་ཉིད་ཀྱིས་བཟོས་ཡོད། དུས་རབས་ཉི་ཤུ་པ་ཙམ་མ་ཟད། དུས་རབས་ཉེར་གཅིག་ནང་ལ་ཡང་མི་ཁག་གཅིག་གིས་འཚེ་བའི་བྱ་སྤྱོད་སྣ་ཚོགས་དངོས་སུ་བརྩམས་ཡོད། དཔེར་ན། མིའི་སྤྱི་ཚོགས་དང་གྲོང་ཁྱེར་ཁག་ནང་། ཐ་ན་སློབ་གྲྭའི་ནང་དུ་སྐབས་རེ་བསམ་ཡུལ་ལས་འདས་པའི་འཚེ་བའི་བྱ་སྤྱོད་རྩོམ་གྱི་ཡོད། དེ་བཞིན་མི་དང་མི་བར་གྱི་དབུལ་ཕྱུག་དང་རུལ་སུངས་མེད་པ་བཟོ་རྒྱུའི་ཚབ་ཏུ་གནད་དོན་དེ་དག་མཐོང་བཞིན་དུ་སྣང་ཆུང་གཏོང་གི་ཡོད་པ་མ་ཟད། ཁོར་ཡུག་སྲུང་སྐྱོབ་ལ་ཡང་སྣང་ཆུང་གཏོང་གི་ཡོད།  དེར་བརྟེན་ང་ཚོས་ངེས་པར་གནད་དོན་དེ་དག་ཐོག་དོ་སྣང་ཆེར་བསྐྱེད་ཀྱིས་མ་འོངས་པའི་འཛམ་གླིང་དེ་བཞིན་ཞི་བདེར་གནས་ཆེད་དུས་རབས་གཉེར་གཅིག་དེ་བཞིན་ཞི་བདེའི་དུས་རབས་ཀྱི་ངོ་བོར་འགྱུར་རྒྱུའི་ཆེད་ང་ཚོ་མི་རེ་ངོ་རེས་འགན་ཁུར་ལེན་དགོས་ཞེས་སོགས་ཀྱི་བཀའ་སློབ་སྩལ་ཡོད།