༢༠༡༢ ཟླ་ ༤ ཚེས་ ༡༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ནུབ་ཕྱོགས་གྲོང་ཁྱེར་སན་ཌི་ཡ་གོའི་ནང་གི(UCST)ཞེས་མངའ་སྡེ་ (California(University)ཁལ་ལི་ཕོར་ནི་ཡའི་གཙུག་ལག་སློབ་གྲྭར་དགེ་ལས་སློབ་ཕྲུག་སྟོང་ཚོ་མང་པོར་ཁོར་ཡུག་སྲུང་སྐྱོབ་སྐོར་བཀའ་སློབ་སྩལ་འདུག
དེ་ཡང་ཐོག་མར་༸གོང་ས་མཆོག་དང་གཙུག་ལག་སློབ་གྲྭ་ཆེན་མོའི་དབུ་འཛིན་ཁོར་ཡུག་སློབ་ཚན་གྱི་སློབ་དཔོན་ཇེན་ནི་ (Jenny Craig Pavilion) མཆོག་ལྷན་ཚོགས་ཁང་ནང་ཆིབས་སྒྱུར་བསྐྱངས་སྐབས་ཚོགས་ཁང་ནང་བཅར་ཡོད་པའི་མི་མང་ལྔ་སྟོང་བརྒལ་བས་ཐལ་མོ་བརྡབ་སྟེ་ཕེབས་བསུ་གཟབ་རྒྱས་ཞུས་ཡོད།
དེ་ནས་གཙུག་ལག་སློབ་གྲྭ་ཆེན་མོའི་དབུ་འཛིན་མཆོག་གིས་མགོན་པོ་གང་ཉིད་མཆོག་ལ་ཕེབས་བསུའི་འཚམས་འདྲིའི་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མཆོག་གྲོང་ཁྱེར་སན་ཌིཡ་གོ་དང་ང་ཚོའི་གཙུག་ལག་སློབ་གྲྭར་ཆིབས་སྒྱུར་བཀའ་དྲིན་བསྐྱངས་པར་ང་རང་ཧ་ཅང་དགའ་པོ་བྱུང་། དེ་ནི་ང་ཚོའི་གཙུག་ལག་སློབ་གྲྭ་ཆེན་མོའི་གཟི་བརྗིད་ཀྱང་ཡིན། འདི་གར་ཕེབས་པའི་ཚང་མས་མཁྱེན་གསལ་ལྟར། ༸གོང་ས་ཏཱ་ལའི་བླ་མ་མཆོག་གིས་འཛམ་གླིང་ཞི་བདེ་དང་སྤྱི་ཁྱབ་འགན་འཁུར་གོང་སྤེལ་མཛད་དང་མཛད་མུས་ཡིན། སྐུ་ཉིད་མཆོག་གིས་ཐུགས་བརྩོན་མཛད་པ་དེ་བཞིན་ང་ཚོའི་གཙུག་ལག་སློབ་གྲྭས་མཉམ་འཁུར་ཞུ་བཞིན་ཡོད། ༸གོང་ས་ཏཱ་ལའི་བླ་མ་མཆོག་ནི་ཁོར་ཡུག་སྐོར་ལ་ཐུགས་འཚབ་མཛད་མཁན་ནོ་བེལ་ཞི་བདེའི་གཟེངས་རྟགས་བཞེས་མཁན་གཅིག་པུ་དེ་ཆགས་ཡོད་ཅེས་སོགས་ཀྱི་གསུང་བཤད་གནང་ཡོད།
དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་ཁོར་ཡུག་སྲུང་སྐྱོབ་སྐོར་བཀའ་སློབ་སྩལ་དོན། ང་ཚོ་བོད་ནང་ཡོད་སྐབས་ས་ཆ་ཡོངས་རྫོགས་གཙང་མ་ཡིན་སྟབས། ཁོར་ཡུག་སྲུང་སྐྱོབ་བྱ་རྒྱུའི་སྐོར་ཤེས་རྟོགས་ཡོང་གི་མེད། དཔེར་ན། དེ་སྔ་བོད་ནང་རྟ་དང་གཡག་སོགས་བཞོན་ནས་ས་ཐག་རིང་པོ་འགྲོ་སྐབས། རྒྱུག་ཆུ་ཆུང་ཆུང་དང་གཙང་ཆུ་དེ་དག་ཁ་སྐོམ་སྐབས་བཏུང་ཆོག་གི་རེད། འོན་ཀྱང་རྒྱ་གར་དུ་སླེབས་རྗེས་མི་ཁ་ཤས་ཀྱིས་ཆུ་བཙོག་པོ་ཡིན་སྐོར་བརྗོད་དེ་འཐུང་བཅུག་གི་མི་འདུག་པས་ཧ་སངས་བྱུང་། འོན་ཀྱང་རིམ་བཞིན་ཁོར་ཡུག་གི་ཚན་རིག་པ་དང་ཐུག་འཕྲད་བྱུང་རྗེས་ཁོར་ཡུག་ལ་སྲུང་སྐྱོབ་བྱ་རྒྱུ་དེ་གནད་འགག་ཆེན་པོ་ཡིན་པ་ཤེས་རྟོགས་བྱུང་། དེའི་ཐོག་དམིགས་བསལ་དོ་སྣང་བྱུང་ལ་དེ་ནི་ང་ཚོ་འཚོ་ཞིང་གནས་དང་མི་གནས་པའི་གནད་དོན་ཞིག་རེད་འདུག གལ་ཏེ་ང་ཚོ་གནས་སྡོད་བྱེད་སའི་ཁོར་ཡུལ་འདི་འབག་བཙོག་ཤུགས་ཆེ་བྱུང་ན། དེའི་ནང་གནས་པའི་སེམས་ལྡན་རྣམས་ལ་དོ་ཕོག་ཤུགས་ཆེ་འགྲོ་རྒྱུའི་ཉེན་ཁ་ཏན་ཏན་ཡོད། ཅེས་སོགས་ཀྱི་ལམ་སྟོན་བཀའ་སློབ་ཕེབས་ཡོད་པ་མ་ཟད། སྐབས་དེར་མང་ཚོགས་ལ་དྲི་བ་ཞུ་རྒྱུའི་གོ་སྐབས་ཀྱང་སྩལ་ཏེ་མང་ཚོགས་ཀྱི་དྲི་བར་བཀའ་ལན་སྩལ་ཡོད་པ་བཅས། །