༢༠༡༢ ཟླ་ ༣ ཚེས་ ༡༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༡༠ ཉིན་ཨུ་རུ་སུ་སྤྱི་མཐུན་རྒྱལ་ཁབ་ཀྱི་ས་ཁུལ་ཁག་གི་གྲོང་ཁྱེར་ཁག་གཅིག་གི་ནང་འདི་ལོའི་གསུམ་བཅུའི་དུས་དྲན་ཐེངས་ ༥༣ སྲུང་བརྩི་གཟབ་རྒྱས་ཞུས་ཡོད།
དེ་ཡང་ཨུ་རུ་སུའི་རྒྱལ་ས་མོ་སི་ཀོའི་ནང་དུ་(Moscow)དེ་ཉིན་གསུམ་བཅུའི་དུས་དྲན་གྱི་མཛད་སྒོའི་ཐོག་མོ་སི་ཀོར་རྟེན་གཞི་བྱས་པའི་བླ་མ་ཙོང་ཁ་པ་ནང་པའི་ཆོས་ཚོགས་ཀྱི་གཙོ་འཛིན་སྐུ་ཞབས་ཌི་མི་ཏི་རི་ཡ་ནི་ཀི་ཕོ་རོབ་ལགས་ཀྱིས་ཐོག་མར་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེར་མཇལ་དར་ཕུལ་ཏེ་མཛད་སྒོ་དང་འབྲེལ་བའི་ངོ་སྤྲོད་གསུང་བཤད་གནང་བསྟུན། བོད་མི་རིགས་ཀྱི་དོན་དུ་རང་སྲོག་དོར་བའི་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་དང་མྱ་ངན་གུས་དུས་ངག་བཅད་སྐར་མ་གཅིག་རིང་ཞུས། དེ་ནས་ཨུ་རུ་སུ་སྐུ་ཚབ་དོན་གཅོད་ངག་དབང་རབ་རྒྱས་ལགས་ཀྱིས་བོད་མིའི་འཚེ་མེད་ཞི་བའི་འཐབ་རྩོད་ཀྱི་ངོ་བོ་དང་གལ་གནད་ཆེ་ཚུལ་སྐོར་ངོ་སྤྲོད་གནང་བ་མ་ཟད། གསུམ་བཅུའི་དུས་དྲན་ཐེངས་ ༥༣ ཐོག་བཀའ་བཤག་གི་གཏམ་བཤད་ཨུ་རུའི་སྐད་ཡིག་ཐོག་ཕབ་བསྒྱུར་གནང་བ་དེ་སྒྲོགས་སྦྱང་གནང་ཡོད། གཞན་ཡང་དུས་དྲན་དང་བསྟབས་བསྟུན་ཕྱི་ལོ་ ༢༠༠༩ ལོ་ནས་བོད་བསྟན་སྲིད་མི་རིགས་ཀྱི་དོན་དུ་ད་བར་བོད་མི་ ༢༦ གིས་རང་ལུས་མེར་སྲེག་བཏང་ཡོད་པ་ཁོང་རྣམས་ལ་གུས་བཀུར་ཞུས་ཡོད། ཕྱོགས་མཚུངས་བླ་མ་ཙོང་ཁ་པ་ནང་པའི་ཆོས་ཚོགས་ཀྱི་ཆོས་དགེ་དགེ་བཤེད་བྱམས་པ་འཕྲིལ་ལས་ལགས་ཀྱིས་ནང་ཆོས་ལ་དོ་སྔང་དང་སྲུང་སྐྱོབས་བྱ་རྒྱུའི་དལ་གནད་སྐོར་སོགས་གསུང་བཤད་གནང་། མཛད་སྒོའི་སྐབས་བོད་མི་དང་ཨུ་རུ་སུ་ནང་པ་ཁག་གཅིག དེ་བཞིན་ཨུ་རུ་སུ་བོད་དོན་རྒྱབ་སྐྱོར་ཚོགས་མི་བཅས་མཉམ་ཞུགས་གནང་ཡོད། གཞན་ཡང་ཨུ་རུ་སུ་གྲོང་ཁྱེར་སན་པི་ཊར་སི་བྷག་ཏུ་ཨུ་རུ་སུ་བོད་དོན་རྒྱབ་སྐྱོར་བ་ལྕམ་སྐུ་ཨེ་ལི་ན་ཀིམ་(Elena Kim)ལགས་དང་ཌ་ནིལ་ཏེ་རན་ཏེབ་(Daniil Terentyev)ལགས། དེ་བཞིན་ཨར་ཁི་རི་སི་ཊེན་(R.Kristian)ལགས་བཅས་ཀྱིས་དབུ་ཁྲིད་དེ་ཨུ་རུ་གཞུང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཐོང་མཆེན་འབུལ་དགོས་པ་དང་། བོད་ལ་རང་དབང་དགོས་པ་སོགས་ཀྱི་སྦྱར་ཡིག་ལག་ཏུ་འཁྱེར་ཏེ་ལས་འགུལ་སྤེལ་ཡོད། ཕྱོགས་མཚུངས་ཁལ་མིཀ་སྤྱི་མཐུན་རྒྱལ་ཁབ་ཀྱི་རྒྱལ་ས་ཨེ་ལི་སི་ཏའི་(Elista)ནང་དུ་བོད་མི་དང་བོད་དོན་རྒྱབ་སྐྱོར་བ་རྣམས་ཀྱི་རྒྱལ་ས་ཁྲོམ་གཞུང་ལྟེ་བར་འདུ་འཛོམས་གནང་སྟེ་རང་ལུས་མེར་སྲེག་གཏོང་མཁན་བོད་མི་ ༢༦ པོ་འདྲ་པར་ལག་ཏུ་འཁྱེར་ཏེ་རྒྱ་མིས་མེ་མདའ་བརྒྱབ་སྟེ་བོད་མི་དམར་གསོད་བཏང་བ་རྣམས་ལ་སྨོན་ལམ་གསུང་འདོན་གནང་ཡོད། སྐབས་དེར་བོད་ཀྱི་གྲོགས་པོ་ཞེས་པའི་ཚོགས་པ་དེའི་ཚོགས་གཙོ་སྐུ་ཞབས་ལྕམ་སྐུ་ཨེན་ཏོ་ནི་ན་ཀོ་ཀུ་བ་(Antonina Kookueva)ལགས་ཀྱིས་བཀའ་ཤག་གི་གསུང་བཤད་ཨུ་རུ་སུའི་སྐད་ཡིག་ཐོག་ཕབ་བསྒྱུར་ཞུས་པ་དེ་སྒྲོགས་ལྗང་གནང་ཡོད། དེ་བཞིན་ཐུ་ཝ་དང་བྷུར་ཡ་བཅས་ཡུལ་གཉིས་ཀྱི་རྒྱལ་སའི་ནང་དུའང་བོད་མིའི་གསུམ་བཅུའི་དུས་དྲན་ཐེངས་ ༥༣ སྲུང་བརྩི་ཞུ་ཆེད་ཟས་བཅད་དང་མཆོད་འབུལ་སྨོན་ལམ་སོགས་ལས་འགུལ་འདྲ་མིན་སྤེལ་ཡོད་པ་བཅས།།