༢༠༡༢ ཟླ་ ༣་ཚེས་ ༡༧ རེས་གཟའ་སྤེན་པ།
༄༅། །ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་མར་ཁོ་རུ་བྷིན་མཆོག་གིས་གྲོས་ཚོགས་གོང་མའི་ལྷན་ཚོགས་ཐོག་བོད་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༣ ཚེས་ ༡༥ ཉིན་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་མར་ཁོ་རུ་བྷིན་མཆོག་གིས་གྲོས་ཚོགས་གོང་མའི་ལྷན་ཚོགས་ཐོག་བོད་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་གནང་བའི་སྐབས་གསུང་དོན། འཛམ་གླིང་འདིའི་ནང་འགྲོ་བ་མིའི་ཐོབ་ཐང་མེད་པའི་གནས་སྟངས་ཛ་དྲག་ཏུ་འགྲོ་བཞིན་ཡོད། དེང་སྐབས་སི་རི་ཡར་ཆ་བཞག་ན། གཞུང་གིས་དྲག་པོའི་གོ་མཚོན་བེད་སྤྱོད་བཏང་སྟེ་མི་མང་དམར་གསོད་བཏང་བ་སོགས་ཀྱི་བྱ་སྤྱོད་ངན་པ་སྤེལ་ཏེ་རྒྱལ་ཁབ་དེའི་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་ཀྱང་རྒྱ་ནག་དང་ཨུ་རུ་སུ་ལྟ་བུས་འགྲོ་བ་མིའི་ཐོབ་ཐང་ཐོག་ལ་འགན་ཁུར་རྩ་བ་ནས་ལེན་གྱི་མེད། རྒྱ་ནག་ནི་དེ་སྔ་དང་མི་འདྲ་བར་དཔལ་འབྱོར་ཡར་རྒྱས་ཤུགས་ཆེན་པོ་ཡོད་པར་བསྔགས་བརྗོད་ཞུ་བཞིན་ཡོད། འོན་ཀྱང་འགྲོ་བ་མིའི་ཐོབ་ཐང་ཐོག་ལ་ཡར་རྒྱས་རྩ་བ་ནས་ཕྱིན་མེད་པ་མ་ཟད། རྒྱལ་སྤྱིའི་ནང་རྒྱ་ནག་གི་ཤུགས་རྐྱེན་སྤེལ་ཐབས་བྱེད་བཞིན་ཡོད་ཀྱང་རྒྱལ་སྤྱིའི་ནང་རྒྱ་ནག་གིས་ཨ་རིའི་ཚབ་རྩ་བ་ནས་བྱེད་ཐུབ་ཀྱི་མ་རེད། འགྲོ་བ་མིའི་ཐོབ་ཐང་མེད་པའི་དཔེ་མཚོན་ལེགས་ཤོས་དེ་བོད་རེད། ཞི་བདེར་དགའ་བའི་བོད་མི་ཚོས་རང་ཉིད་འཚོ་གནས་དང་རང་གི་རིག་གཞུང་མི་ཉམས་རྒྱུན་འཛིན་བྱ་རྒྱུའི་ཆེད་རྒྱ་ནག་གི་རྩ་ཁྲིམས་འོག་མིང་དོན་མཚུངས་པའི་གནས་བབ་ཐོབ་ཐབས་ཀྱི་འབད་བརྩོན་བྱེད་བཞིན་ཡོད་ཀྱང་། རྒྱ་ནག་གཞུང་ཕྱོགས་ནས་འཆར་གཞི་དང་གོ་རིམ་ལྡན་པའི་ཐོག་ནས་བོད་ཀྱི་རིག་གཞུང་རྩ་མེད་བཟོ་ཐབས་བྱས་པ་མ་ཟད། བོད་མིར་ཏང་གི་བསམ་བློ་སློབ་གསོ་སྤེལ་བ། བོད་མི་གང་བྱུང་འཛིན་བཟུང་དང་སྨྲ་བརྗོད་རང་དབང་ཕྲོགས་པ་སོགས་བྱེད་བཞིན་ཡོད། དེ་བཞིན་ཕྱི་ཚེས་ ༡༤ ཉིན་སླར་ཡང་བོད་མི་ཞིག་གིས་རྒྱ་ནག་གཞུང་ལ་ངོ་རྒོལ་གྱི་རང་ལུས་མེར་སྲེག་བཏང་བའི་དོན་རྐྱེན་བྱུང་ཡོད། དེར་བརྟེན་རྒྱ་ནག་གཞུང་གིས་བོད་མིའི་ཐོག་དྲག་གནོན་གྱི་སྲིད་བྱུས་ལག་བསྟར་བྱས་དང་བྱེད་མུས་ཡིན་པ་དེ་དག་ངེས་པར་དུ་མཚམས་འཇོག་བྱེད་དགོས་ཞེས་གསུངས་ཡོད་པ་བཅས། །