༢༠༡༢ ཟླ་ ༣ ཚེས་ ༢༢ རེས་གཟའ་ཕུར་བུ།
༄༅། །སུད་སིའི་རྒྱལ་ཡོངས་གྲོས་ཚོགས་ལས་གྲུབ་པའི་བོད་དོན་རྒྱབ་སྐྱོར་ཚོགས་ཆུང་གི་འཐུས་མི་རྣམས་ནས་འབྱུང་འགྱུར་བོད་དོན་ལ་རྒྱབ་སྐྱོར་གནང་ཕྱོགས་ཐོག་ཕན་ཚུན་བསམ་ཚུལ་ཞིབ་གླེང་དང་སྣེ་ཁྲིད་གནང་མཁན་གྱི་ཚོགས་གཙོ་འོས་འདེམས་ཆེད་དམིགས་བསལ་ལྷན་ཚོགས་ཤིག་སྐོང་ཚོགས་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༣ ཚེས་ ༢༡ ཉིན་སུད་སིའི་རྒྱལ་སའི་ནང་རྟེན་གཞི་བྱས་པའི་རྒྱལ་ཡོངས་གྲོས་ཚོགས་ཁང་དུ་སུད་སིའི་ཆབ་སྲིད་ཀྱི་ཚོགས་པ་རེ་རེ་ནས་སྐུ་ཚབ་རེ་རེ་ལྷན་འཛོམས་ཐོག་སྲིད་དོན་ཚོགས་པ་ལྗང་ཁུ་ཁོངས་མི་སུད་སི་རྒྱལ་ཡོངས་གྲོས་ཚོགས་ཀྱི་འཐུས་མི་ལས་གྲུབ་པའི་བོད་དོན་རྒྱབ་སྐྱོར་ཚོགས་ཆུང་གི་ཚོགས་གཙོ་གཞོན་པ་ལྕམ་སྐུ་མ་ཡ་གྷ་རབ་མཆོག་གིས་ལྷན་ཚོགས་ཐོག་གསུང་བཤད་གནང་དོན། བོད་ཀྱི་འཐབ་རྩོད་དེ་བཞིན་ངོ་བོ་དྲང་བདེན་དང་སྤྱོད་པ་འཚེ་བ་མེད་པའི་ལམ་ལ་རྟེན་པ་ཞིག་ཡིན་སྟབས། ང་ཚོས་བདེན་པར་རྒྱབ་སྐྱོར་ཞུ་རྒྱུའི་ཆོད་སེམས་བརྟན་པོ་ཡོད། གང་ལ་ཞེ་ན། སུད་སིའི་རྒྱལ་ཡོངས་གྲོས་ཚོགས་ཀྱི་འཐུས་མི་ལས་གྲུབ་པའི་བོད་དོན་རྒྱབ་སྐྱོར་ཚོགས་ཆུང་ནང་སྲིད་དོན་ཚོགས་པ་ཚང་མས་མཉམ་ཞུགས་གནང་སྟེ་བོད་དོན་ལ་རྒྱབ་སྐྱོར་ཡོད་པའི་རྣམ་འགྱུར་གསལ་སྟོན་གནང་བ་ལྟར། བོད་དོན་ལ་རྒྱབ་སྐྱོར་གནང་ཕྱོགས་ཐོག་ཕན་ཚུན་དགོངས་ཚུལ་ལྷུག་གླེང་ཐོག་སྣེ་ཁྲིད་གནང་མཁན་ཞིག་འོས་འདེམས་བྱ་རྒྱུ་ནི་ཐེངས་འདིའི་ལྷན་ཚོགས་ཀྱི་དམིགས་ཡུལ་གཙོ་བོ་ཆགས་ཡོད། ཅེས་གསུང་བཤད་གནང་འདུག
ད་ཐེངས་ལྷན་ཚོགས་ཀྱི་གྲོས་གཞི་གཅིག་ནི་ཚོགས་གཙོ་དང་ཚོགས་གཞོན་འོས་འདེམས་བྱ་རྒྱུ་ཡིན་འདུག འོན་ཀྱང་གྲོས་གཞི་དེར་དམིགས་བསལ་འགྱུར་བ་ཕྱིན་ཏེ་ཆབ་སྲིད་ཚོགས་པ་རེ་རེ་ནས་འཐུས་མི་འོས་འདེམས་ཀྱིས་བོད་དོན་རྒྱབ་སྐྱོར་ཐོག་ཕྱར་གྲུ་མཉམ་འདེགས་གནང་རྒྱུའི་ཐག་གཅོད་བྱུང་འདུག
སྤྱིར་བཏང་སུད་སིའི་རྒྱལ་ཡོངས་གྲོས་ཚོགས་ཀྱི་འཐུས་མི་ལས་གྲུབ་པའི་བོད་དོན་རྒྱབ་སྐྱོར་ཚོགས་ཆུང་དེ་བཞིན་ཕྱི་ལོ་ ༡༩༨༨ ལོར་ཐོག་མར་དབུ་འཛུགས་གནང་འདུག་པ་བཅས། །