༢༠༡༢ ཟླ་ ༣ ཚེས་ ༡༣ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༡༣ ཉིན་འཕྲོད་བསྟེན་དྲུང་ཆེའི་ལས་ཁུངས་སུ་ཤོ་ཟུར་བསོད་ནམས་ཆོས་འཕེལ་ལགས་བཀའ་ཤག་གིས་བཀོད་ཁྱབ་དགོངས་དོན་ལྟར་འཕྲོད་བསྟེན་ལས་ཁུངས་ཀྱི་དྲུང་ཆེ་ཕ་ཟུར་དབང་ཕྱུག་ལགས་འཕོས་ཚབ་བསོད་ནམས་ཆོས་འཕེལ་ལགས་གསར་དུ་བསྐོ་གཞག་གནང་བ་བཞིན་རྩིས་སྤྲོད་རྩིས་ལེན་གྱི་མཛད་སྒོ་སྟབས་བདེ་ཞིག་ཚོགས་ཡོད།
དེ་ཉིན་ཕྱི་དྲོ་ཆུ་ཚོད་ ༣།༣༠ ཐོག་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་། སྤྲོད་དཔང་ནང་སྲིད་དྲུང་ཆེ་དངོས་གྲུབ་རྡོ་རྗེ་ལགས་དབུ་བཞུགས་ཐོག་དྲུང་ཆེ་གསར་རྙིང་གཉིས་ཀྱི་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེར་སྐུ་ཕྱག་དང་མཇལ་དར་ཕུལ་གྲུབ་བསྟུན་ཞབས་སྟེགས་རྩིས་སྤྲོད་རྗེས་དྲུང་ཆེ་གསར་རྙིང་ཕན་ཚུན་མཇལ་དར་སྒྲོན་རེས་གནང་། དེ་ནས་ཚོགས་ཁང་དུ་འཕྲོད་བསྟེན་བཀའ་བློན་མཆོག་དང་། སྤྲོད་དཔང་། དྲུང་ཆེ་གསར་རྙིང་། དྲུང་འཕར། བདེ་ལེགས་སྨན་ཁང་གི་འགན་འཛིན། སྨན་རྩིས་ཁང་གི་འགན་འཛིན་དང་དྲུང་ཆེ། སྨན་པའི་ལྷན་ཚོགས་ཀྱི་ཚོགས་གཙོ། དེ་བཞིན་འཕྲོད་བསྟེན་ལས་བྱེད་ཡོངས་ཚང་འཛོམས་ཐོག་དྲུང་ཆེ་རྙིང་པས་ལས་ཐམ་དང་ཡིག་དངོས་གལ་ཆེ་ཁག་ཕུལ་རྗེས་བཀའ་བློན་མཆོག་དང་སྤྲོད་དཔང་གི་དབུས་འབྲེལ་ཡོད་སྐུ་མགྲོན་དང་ལས་བྱེད་ཡོངས་ཀྱི་འཚམས་འདྲིའི་མཇལ་དར་ཕུལ་གྲུབ་བསྟུན་དྲུང་ཆེ་གསར་རྙིང་གིས་གསུང་བཤད་དང་བཀའ་བློན་མཆོག་གི་མཇུག་བསྡོམས་གནང་ཡོད་པ་བཅས་སུ།།