༢༠༡༢ ཟླ་ ༣ ཚེས་ ༥ རེས་གཟའ་ཟླ་བ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ ༢༠༡༢ ཟླ ༣ ཚེས་ ༤ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ ༣ ཚེས ༤ ཉིན་གྱི་སྔ་དྲོ་བོད་ནང་གི་ཆུ་ཚོད་ ༦། ༣༠ ཙམ་ལ་རྔ་པ་ཀིརྟི་དགོན་པའི་སྒོ་ཆེན་འགྲམ་དུ་གཏན་སྡོད་བྱས་ནས་ཡོད་པའི་ཀིརྟི་དགོན་པར་དམིགས་བསལ་ལྟ་སྲུང་བྱེད་མཁན་གྱི་ཉེན་རྟོག་ལས་ཁུངས་ཀྱི་སྒོ་འགྲམ་དུ་རྔ་པ་རྫོང་གཅའ་ཞང་རྭ་རུ་བའི་ལམ་དཀར་ཚང་གི་མནའ་མ་རིན་ཆེན་ཞུ་བ། ཕ་མིང་ལ་ར་སྣ། མ་མིང་ལ་ལྷ་ཁོ། རང་ལོ་ ༣༢ ཡིན་པ། ཁོང་གིས་རང་ལུས་མེར་སྲེག་གིས་༸རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། བོད་ལ་རང་དབང་དགོས་ཞེས་རྒྱ་ནག་གཞུང་ལ་ཞུ་འབོད་གནང་སྟེ་ས་གནས་དེ་ཀ་རང་ལ་འདས་གྲོངས་སུ་གྱུར་འདུག
ཁོང་ནི་ནགས་ཚང་མའི་ར་སྣ་ཚང་ལ་ཕ་ར་སྣ་དང་མ་ལྷ་ཁོ་གཉིས་ལ་སྐྱེས་པ་དང་ལོ་འགའི་སྔོན་ནས་རྭ་རུ་བའི་ལམ་དཀར་ཚང་གི་བུ་བྷུ་ངྷ་ཟེར་བའི་མནའ་མར་སོང་ཡོད་འདུག་ལ་མི་ཚང་དེར་བཟའ་མི་ཁྱོན་བརྒྱད་ཡོད་པ་དང་། ཁོང་ལ་ཕ་མ་གཅིག་པའི་མིང་སྲིང་བརྒྱད་ཡོད་པའི་ནང་ནས་ཁོང་ཆེ་ཤོས་གཉིས་པ་དེ་ཡིན་འདུག སྐབས་ཐོག་དེར་ཁོང་གི་སྐུ་ཕུང་དགོན་པའི་ནང་ཡར་འཁྱེར་ཐུབ་པ་བྱུང་ཡོད་མོད་དེའི་རྗེས་སུ་སྐུ་ཕུང་རྒྱ་གཞུང་གིས་བཙན་འཕྲོག་བྱས་ཡོད་མེད་ཀྱི་གནས་ཚུལ་ཤེས་རྟོགས་མ་བྱུང་། ཁོང་གི་བཟའ་ཟླ་ལོ་གཅིག་གི་སྔོན་ལ་གྲོངས་ཡོད་འདུག་ལ་ཤུལ་དུ་ཕ་མ་གཉིས་ཀ་མེད་པའི་ཕྲུ་གུ་བཞི་ཡོད་པའི་ནང་ནས་ཆེ་ཤོས་ལོ་བཅུ་གསུམ་དང་ཆུང་ཤོས་དེ་ཟླ་བ་ཁ་ཤས་ལས་ཕྱིན་མེད་པའི་ཕྲུ་གུ་རྣམས་ལུས་འདུག དོན་རྐྱེན་དེ་བྱུང་མ་ཐག་རྔ་པའི་རྫོང་མཁར་དུ་སྔར་ལས་ལྷག་པའི་དམག་མི་དང་ཉེན་རྟོག་པ། དམིགས་བསལ་ཉེན་རྟོག་པ་བཅས་མང་རུ་བཏང་ནས་དམ་བསྒྲགས་དང་དྲག་གནོན་ཤུགས་ཆེ་བྱེད་བཞིན་ཡོད་འདུག ཐེངས་དེའི་རང་ལུས་མེ་སྲེག་གི་དོན་རྐྱེན་དེ་བོད་ནང་བྱུང་བའི་རང་ལུས་མེ་སྲེག་གཏོང་མཁན་བོད་མི་ ༢༤ བྱུང་ཡོད་པའི་ཁྲོད་ཨ་མདོ་རྔ་པའི་ནང་དུ་རང་ལུས་མེ་སྲེག་གཏོང་མཁན་ད་ཐེངས་ ༡༦ པ་དེ་ཆགས་ཡོད་པ་བཅས། །