༢༠༡༢ ཟླ་ ༣ ཚེས་ ༡༤ རེས་གཟའ་ལྷག་པ།
༄༅། །འདི་གར་སུད་སི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༣ ཚེས་ ༡༣ ཉིན་སུད་སི་གྲོང་ཁྱེར་ཇི་ནི་ཝའི་ནང་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་དུ་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༡༩ འཚོགས་བཞིན་པའི་སྐབས་དེར་ཨ་རི་དང་ཡུ་རོབ་སྤྱི་མཐུན་ཚོགས་པ། དབྱིན་ཡུལ། ཕ་རན་སི། ཇར་མན། ཅེཀ་སྤྱི་མཐུན་རྒྱལ་ཁབ་བཅས་ཀྱིས་བོད་ནང་གི་ད་ལྟའི་ཛ་དྲག་གནས་སྟངས་སྐོར་སེམས་འཚབ་ཀྱི་རྣམ་པ་ཤུགས་ཆེ་བཏོན་འདུག
དེ་ཡང་ཡུ་རོབ་སྤྱི་མཐུན་ཚོགས་པས་བོད་ནང་གི་བོད་མི་ཚོར་ཆོས་དད་རང་དབང་སྤྲོད་དགོས་པའི་རྒྱ་ནག་གཞུང་ལ་དགོས་འདུན་ཤུགས་ཆེ་བཏོན་པ་མ་ཟད། བོད་མི་ཆབ་སྲིད་བཙོན་པ་རྣམས་འཕྲལ་མར་གློད་བཀྲོལ་གཏོང་དགོས་པའི་དགོས་འདུན་ཡང་བཏོན་འདུག ཕྱོགས་མཚུངས་ཕ་རན་སི་སྐུ་ཚབ་འཐུས་མིས་བོད་མི་གཞོན་སྐྱེས་མང་པོས་རང་ལུས་མེར་སྲེག་བཏང་སྟེ་ངོ་རྒོལ་བྱེད་བཞིན་པར་བློ་འཚབ་ཡོད་པ་དང་བོད་མི་ཚོར་ཆོས་དད་རང་དབང་སྤྲོད་དགོས་པའི་དགོས་འདུན་བཏོན་འདུག གཞན་ཡང་དབྱིན་ཡུལ་སྐུ་ཚབ་འཐུས་མིས་བོད་མི་ཚོའི་ཆོས་དད་རང་དབང་དང་གཞི་རྩའི་འགྲོ་བ་མིའི་ཐོབ་ཐང་སོགས་ལ་བརྩི་བཀུར་ཞུས་ཏེ་དྲག་གནོན་མཚམས་འཇོག་དགོས་པའི་དགོས་འདུན་བཏོན་འདུག དེ་བཞིན་ཇར་མན་སྐུ་ཚབ་ནས་ཀྱང་ཡུ་རོབ་སྤྱི་མཐུན་ཚོགས་པའི་བོད་དོན་ལངས་ཕྱོགས་དེར་རྒྱབ་སྐྱོར་ཞུས་ཏེ་བོད་ནང་གི་གནས་སྟངས་ཐད་སེམས་ཚབ་ཡོད་སྐོར་བརྗོད་ཡོད། གཞན་ཡང་སྐབས་དེར་ཅེཀ་སྤྱི་མཐུན་རྒྱལ་ཁབ་ཀྱིས་བོད་ཀྱི་ས་ཁུལ་ཁག་ཏུ་རྒྱལ་སྤྱིའི་རྟོག་ཞིབ་ཚོགས་མི་ཆེད་གཏོང་འཇུག་དགོས་པ་དང་། དེང་སྐབས་བོད་མི་ཚོའི་ཆོས་དད་རང་དབང་ཐོོག་དམ་བསྒྲགས་ཤུགས་ཆེ་རུ་གཏོང་བཞིན་ཡོད་པ་གསལ་རྟོགས་ཡོང་བཞིན་ཡོད་སྐོར་གསུངས། དེ་བཞིན་ཨ་རིའི་སྐུ་ཚབ་འཐུས་མིས་བོད་དང་ཤིང་ཅང་སོགས་ཀྱི་ནང་རྒྱ་ནག་གཞུང་གིས་ཆོས་དད་དང་སྐད་ཡིག རིག་གཞུང་བཅས་ལ་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེ་འཕྲལ་མར་མཚམས་འཇོག་གིས་སྲིད་བྱུས་དེར་བསྐྱར་ཞིབ་དགོས་པའི་དགོས་འདུན་ཤུགས་ཆེ་བཏོན་འདུག་པ་བཅས།།
