༢༠༡༢ ཟླ་ ༣ ཚེས་ ༢༠ རེས་གཟའ་མིག་དམར།
༄༅། །བོད་ཀྱི་ཞོ་སྟོན་ཐེངས་བཅུ་བདུན་པ་ཉིན་གྲངས་བདུན་རིང་སྲུང་བརྩི་ཞུ་རྒྱུ་ཡིན་པ་དེ་བཞིན་ཕྱི་ལོ་ ༢༠༡༢ ཟླ་ ༣ ཚེས་ ༢༠ ཉིན་རྡ་ས་བོད་ཀྱི་ཟློས་གར་ཐང་ཆེན་དུ་དབུ་འཛུགས་གནང་ཡོད།
དེ་ཉིན་སྔ་དྲོ་ཆུ་ཚོད་ ༩ ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང་། 
གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། བོད་ཀྱི་ཟློས་གར་ཚོགས་པའི་འབྲེལ་ཡོད་སྐུ་མགྲོན་རྣམ་པ། ས་གནས་ཁག་གི་ལྷ་མོའི་འཁྲབ་སྟོན་པ་རྣམ་པ། སློབ་ཕྲུག་དང་སེར་སྐྱ་མི་མང་བཅས་བརྒྱ་ཕྲག་བརྒལ་བ་ལྷན་འཛོམས་ཐོག་བོད་ཀྱི་ལྷ་མོའི་སྲོལ་འབྱེད་གྲུབ་ཐོབ་ཐང་སྟོང་རྒྱལ་པོའི་སྐུ་བརྙན་དོ་རྭའི་ནང་གདན་འདྲེན་ཞུས་གྲུབ་བསྟུན་བོད་ནང་དགེ་འདུན་པ་བཀྲ་བྷེ་ལགས་ཀྱིས་གཙོས་བོད་རྒྱལ་ཁབ་དང་མི་རིགས་ཆེད་རང་ལུས་མེར་སྲེག་གཏོང་མཁན་དང་། བཙན་འོག་ཏུ་སྡུག་སྦྱོང་མྱོང་བཞིན་པ། དེ་བཞིན་རང་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེའི་མཚོན་སླད་མྱ་ངན་གུས་འདུད་དང་ངག་བཅད་སྐར་གཅིག་གནང་སྟེ་བདེན་ཚིག་སྨོན་ལམ་གསུང་འདོན་གནང་། དེ་རྗེས་བོད་ཀྱི་ཟློས་གར་འགན་འཛིན་དང་འཕྲོད་བསྟེན་དྲུང་ཆེ་གཅིག་ལྕོགས་ཤོ་ཟུར་བསོད་ནམས་ཆོས་འཕེལ་ལགས་ཀྱིས་དུས་ཆེན་ངོ་སྤྲོད་དང་འབྲེལ་བའི་ལས་བསྡོམས་སྒྲོགས་སྦྱང་ནང་དོན། དེང་སྐབས་བོད་ནང་ཛ་དྲག་གནས་སྟངས་ཡོད་ཀྱང་།
བོད་ཀྱི་རིག་གཞུང་ལྷ་མོའི་སྒྱུ་རྩལ་སོགས་རྒྱུད་འཛིན་ཁྱབ་སྤེལ་བྱ་རྒྱུ་ནི་གདུང་སེམས་མཉམ་སྐྱེའི་ལས་དོན་གལ་ཆེ་ཞིག་ཡིན་པར་བརྟེན། འགྲོ་སོང་ལ་འཛེམས་མེད་ཀྱི་ཞོ་སྟོན་ལས་རིམ་དབུ་འཛུགས་གནང་ཡོད་སྐོར་ཀྱི་གསུང་བཤད་གནང་ཡོད། དེ་ནས་བོད་ཀྱི་ཟློས་གར་ཚོགས་པས་དབུས་ས་གནས་ཁག་གི་ལྷ་མོའི་ཚོགས་པ་ཁག་ནས་སྐར་མ་ ༤༥ རེར་ལྷ་གཞུང་གཟིགས་ཕུད་ཞུས་རྗེས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་མཆོག་གིས་གསུང་བཤད་གནང་དོན། བོད་ཀྱི་ལྷ་མོའི་འཁྲབ་སྟོན་གྱི་སྒྱུ་རྩལ་འདི་ནི་ནང་ཆོས་དང་འབྲེལ་བ་དམ་ཟབ་ཡོད་པ་མ་ཟད། སྒྱུ་རྩལ་ལམ་ནས་མིའི་བཟང་སྤྱོད་གོང་འཕེལ་གཏོང་རྒྱུའི་བརྗོད་བྱ་གཙོ་བོར་སྟོན་སྐོར་གསུང་བཤད་གནང་རྗེས་མུ་མཐུད་ལྷ་གཞུང་འཁྲབ་སྟོན་རྗེས་བཀྲ་ཤིས་མཆོད་མཚམས་ཀྱི་ལམ་ནས་གཟིགས་མོ་གྲོལ།
ད་ཐེངས་ཉིན་བདུན་རིང་གི་ཞོ་སྟོན་དུས་དྲན་གྱི་ལྷ་མོའི་འཁྲབ་སྟོན་དེ་བོད་ཀྱི་ཟློས་གར་ཐང་ཆེན་དུ་འཁྲབ་སྟོན་ཞུ་རྒྱུའི་ནང་། ཕྱི་ཚེས་ ༢༡ ཉིན་ཀ་སྦུག་ལྷ་མོའི་ཚོགས་པ་ནས་ལྷ་གཞུང་པདྨ་འོད་འབར་འཁྲབ་སྟོན་ཞུ་རྒྱུ་དང་། ཕྱི་ཚེས་ ༢༢ ཉིན་བལ་ཡུལ་ལྷ་མོའི་ཚོགས་པ་ནས་ལྷ་གཞུང་དྲི་མེད་ཀུན་ལྡན་འཁྲབ་སྟོན་ཞུ་རྒྱུ། ཕྱི་ཚེས་ ༢༣ ཉིན་ཨོ་རི་ས་ལྷ་མོའི་ཚོགས་པ་ནས་ལྷ་གཞུང་འགྲོ་བ་བཟང་མོ་འཁྲབ་སྟོན་ཞུ་རྒྱུ། ཕྱི་ཚེས་ ༢༤ ཉིན་སྦེལ་ཀོབ་ལྷ་མོའི་ཚོགས་པ་ནས་ལྷ་གཞུང་གཟུགས་ཀྱི་ཉི་མ་འཁྲབ་སྟོན་ཞུ་རྒྱུ། ཕྱི་ཚེས་ ༢༥ ཉིན་མོན་གྷོ་ལྷ་མོའི་ཚོགས་པ་ནས་ལྷ་གཞུང་ནོར་བཟང་འཁྲབ་སྟོན་ཞུ་རྒྱུ། ཕྱི་ཚེས་ ༢༦ ཉིན་བོད་ཀྱི་ཟློས་གར་ཚོགས་པ་ནས་ལྷ་གཞུང་སྣང་ས་འོད་འབུམ་འཁྲབ་སྟོན་ཞུ་རྒྱུ་ཡིན་འདུག་པ་བཅས།།
