༢༠༡༢ ཟླ་ ༣ ཚེས་ ༢༩ རེས་གཟའ་ཕུར་བུ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་ལགས་དང་བློ་བཟང་ཡེ་ཤེས་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༣ ཚེས་ ༢༨ ཉིན་གྱི་ཕྱི་དྲོ་བོད་ནང་གི་ཆུ་ཚོད་ ༧ །༡༠ ཙམ་ལ་རྔ་པ་རྫོང་གཅའ་ཞང་རྭ་རུ་བའི་སྤེན་པ་ཚང་གི་དགེ་འདུན་པ་བློ་བཟང་ཤེས་རབ་ལགས། རང་ལོ་ ༢༠ ཡིན་ཞིང་། ཕ་མིང་ལ་བསོད་དོན་དང་མ་མིང་ལ་ཉི་མ་ཡིན་པ་ཁོང་གིས་གཅའ་ཞང་ཐོག་གི་གཞུང་ལམ་དུ་རང་ལུས་མེར་སྲེག་བཏང་སྟེ་རྒྱ་གཞུང་གི་དྲག་རྩུབ་ཅན་གྱི་སྲིད་བྱུས་ལ་ངོ་རྒོལ་སྐད་འབོད་གནང་ནས་འདས་གྲོངས་སུ་གྱུར་འདུག
ཁོང་གིས་འབོད་ཚིག་ག་རེ་སྒྲོག་ཡོད་མེད་ཤེས་རྟོགས་ཐུབ་མེད་ཀྱང་། ཁོང་འདས་གྲོངས་སུ་གྱུར་མ་ཐག་བོད་མི་ཚོས་ཁོང་གི་ཕུང་པོ་འཁྱེར་རྩིས་བྱེད་སྐབས། རྒྱ་གཞུང་གི་དྲག་ཆས་ཉེན་རྟོག་པ་སོགས་བསླེབས་ཏེ་བཙན་འཕྲོག་བྱས་འདུག་པར་མི་མང་གིས་ཕུང་པོ་ནང་མིར་སྤྲོད་དགོས་པའི་རེ་འདུན་ཡང་ཡང་བཏོན་ཡང་ཉན་འཇོག་མ་བྱས་པར་བཙན་འཁྱེར་བྱས་འདུག དགེ་འདུན་པ་བློ་བཟང་ཤེས་རབ་ལགས་རང་ལོ་ ༩ ཙམ་ནས་རྭ་རུ་བའི་དགོན་པ་དགེ་ལྡན་བསྟན་འཕེལ་གླིང་དུ་ཆོས་ཞུགས་གནང་ཡོད་ཅིང་། ལོ་སྔོན་མའི་ཕྱི་ཟླ་ ༡༠ ཙམ་ནས་རྔ་པ་ཀིརྟི་དགོན་པར་མཚན་ཉིད་སློབ་གཉེར་བྱེད་དུ་སོང་ཡོད་ཀྱང་འདི་ཟླའི་ཚེས་ ༢༦ ཉིན་ཕྱིར་ཕ་ཡུལ་དུ་ལོགས་འདུག རྭ་རུ་བའི་དགོན་པར་དེང་སྐབས་གྲྭ་པ་ ༣༡ ཡོད་འདུག ཁོང་ནི་ཁྱིམ་ཚང་དེར་མིང་སྲིང་ ༣ ཡོད་པ་ནང་ནས་འབྲིང་བ་ཡིན་འདུག དོན་རྐྱེན་དེ་བྱུང་མ་ཐག་གཅའ་ཞང་ཐོག་ཏུ་དྲག་ཆས་ཉེན་རྟོག་པ་སོགས་ཀྱིས་དམ་བསྒྲགས་ཤུགས་ཆེན་བྱས་ཡོད་ཅིང་། དེང་སྐབས་རྔ་པ་ཀིརྟི་དགོན་པའི་ལས་གནས་ཁ་གསལ་མེད་པའི་ལས་བྱེད་པ་ཡིན་ཟེར་བའི་རྒྱ་གཞུང་གི་མི་སྣ་ ༣༠༠ ལྷག་གཏན་སྡོད་བྱས་ཡོད་མ་ཟད། རྔ་པའི་སྟོད་སྨད་བར་གསུམ་དུ་དྲག་ཆས་ཉེན་རྟོག་པ་དང་། དམིགས་བསལ་ཉེན་རྟོག་པ་སོགས་ཀྱིས་དམ་བསྒྲགས་མུ་མཐུད་བྱེད་བཞིན་ཡོད་འདུག་པ་བཅས། །