༢༠༡༢ ཟླ་ ༣ ཚེས་ ༢༠ རེས་གཟའ་མིག་དམར།
༄༅། །འདི་གར་ཕྱི་ལོ་ ༢༠༡༢ ཟླ་ ༣ ཚེས་ ༢༠ ཉིན་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༣ ཚེས་ ༡༦ ཉིན་མདོ་སྨད་རྔ་པ་ཀིརྟི་དགོན་པའི་རྒྱུད་པ་གྲྭ་ཚང་གི་དགེ་འདུན་པ་བློ་བཟང་ཚུལ་ཁྲིམས་ལགས་རང་ལོ་ ༢༠ ཡིན་པ། ཁོང་གིས་རང་ལུས་མེར་སྲེག་བཏང་སྟེ་རྒྱ་གཞུང་ལ་ངོ་རྒོལ་སྐད་འབོད་གནང་ཡོད་ལ། དེ་མ་ཐག་རྒྱ་གཞུང་གི་ཉེན་རྟོག་པས་བཙན་ཁྲིད་བྱས་ཡོད་ནའང་། ཟླ་བ་འདིའི་ཕྱི་ཚེས་ ༡༩ ཉིན་རྔ་པ་ཁུལ་གྱི་ལྟེ་གནས་འབར་ཁམས་ནས་ཁོང་འདས་གྲོངས་སུ་གྱུར་ཞིང་ཉིན་དེར་རྒྱ་གཞུང་གིས་ཁོང་གི་ཕུང་པོ་འབར་ཁམས་ནས་མེར་སྲེག་བཏང་སྟེ་རུས་ཐལ་ཞིག་ནང་མིར་སྤྲད་ཡོད་པ་ཕྱི་ཚེས་ ༡༩ ཉིན་གྱི་མཚན་མོ་རྔ་པ་ཀིརྟི་དགོན་པའི་ཉེ་འགྲམ་གྱི་དུར་སའི་ནང་སྐྱེལ་དགོས་བྱུང་ཡོད་འདུག
ཕྱི་ལོ་ ༢༠༡༡ ཟླ་ ༡༠ ཚེས་ ༡༥ ཉིན་རང་ལུས་མེར་སྲེག་བཏང་སྟེ་ཕྱི་ལོ་ ༢༠༡༢ ཟླ་ ༡ ཚེས་ ༥ ཉིན་རྔ་པ་ཁུལ་གྱི་ལྟེ་གནས་འབར་ཁམས་ནས་འདས་གྲོངས་སུ་གྱུར་པའི་རྒྱལ་གཅེས་དཔའ་བོ་ནོར་བུ་དགྲ་འདུལ་དང་ཁོང་གཉིས་ཕ་མ་མིང་སྲིང་གི་སྤུན་མཆེད་ཡིན་འདུག
འདི་ཟླའི་ཕྱི་ཚེས་ ༡༦ ཉིན་བློ་བཟང་ཚུལ་ཁྲིམས་ཀྱིས་རང་ལུས་མེར་སྲེག་གིས་ངོ་རྒོལ་གནང་རྗེས་ཀྱི་ཉིན་གསུམ་རིང་རྔ་པ་མི་མང་གིས་གདུང་སེམས་མཉམ་སྐྱེ་མཚོན་ཆེད་བོད་པའི་ཟ་ཁང་དང་ཚོང་ཁང་ཡོངས་རྫོགས་སྒོ་བརྒྱབ་ནས་མྱ་ངན་གྱི་རྣམ་པ་ཤུགས་ཆེན་པོ་ཞིག་བསྟན་ཡོད། དེ་བཞིན་ཕྱི་ཚེས་ ༡༩ ཉིན་རྔ་པ་ཀིརྟི་དགོན་པའི་གྲྭ་མང་གིས་དང་བླངས་ཐོག་གཞུང་ཆེན་ཁག་སྐྱོར་སྦྱོང་གནང་སྟེ་མཚན་ཕུད་གནང་འདུག འདི་ནི་རྔ་པའི་ནང་གཅིག་པུར་བྱུང་བའི་རང་ལུས་མེ་སྲེག་གི་ལས་འགུལ་ཐེངས་བཅུ་དགུ་པ་དང་དེའི་ཁྲོད་ནས་སྐུ་སྲོག་ཤོར་བ་བཅུ་བཞི་པ་དེ་ཆགས་ཡོད་པ་བཅས། །
དགེ་འདུན་པ་བློ་བཟང་ཚུལ་ཁྲིམས་ལགས་འདས་གྲོངས་སུ་གྱུར་བ།
གསར་གནས།
འབྲེལ་གནས།
