༢༠༢༢ ཟླ་ ༣ ཚེས་ ༢༩ རེས་གཟའ་ཕུར་བུ།
༄༅། །སྦི་སྦི་སི་རྒྱ་ཡིག་དྲ་གནས་ཐོག་གནས་ཚུལ་ཐོབ་གསལ་ལྟར་ན། ཨ་རིའི་གྲོས་ཚོགས་གོང་མའི་ཚོགས་མི་རྣམ་པས་རྒྱ་ནག་གཞུང་གིས་བོད་མིར་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པ་དེར་རང་ལུས་མེར་སྲེག་བཏང་སྟེ་ཞི་རྒོལ་བྱས་དང་བྱེད་མུས་ཡིན་པར་བརྟེན། དྲག་རྩུབ་ཀྱི་སྲིད་དེ་དག་མཚམས་འཇོག་དགོས་པའི་འབོད་སྐུལ་གནང་འདུག
ཕྱི་ལོ་ ༢༠༡༢ ཟླ་ ༣ ཚེས་ ༢༧ ཉིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་ནས་བོད་དོན་སྐོར་ལ་གྲོས་འཆམ་བྱུང་བའི་གནས་ཚུལ་བི་བི་སིའི་གསར་འགྱུར་བརྒྱུད་ལམ་ཐོག་བཀོད་དོན་ལྟར་ན། འདས་པའི་ལོ་གཅིག་ནང་རྒྱ་ནག་གི་དབང་བསྒྱུར་ལ་ངོ་རྒོལ་བྱས་ནས་བོད་མི ༡༩ ཡིས་རང་ལུས་མེར་སྲེག་བཏང་བར་མྱ་ངན་ཞུ་རྒྱུ་དང་། ད་དུང་རྒྱ་ནག་གི་ནུབ་རྒྱུད་ས་ཁུལ་ནས་ཕྱིར་འབུད་བཏང་བའི་བོད་ཀྱི་ཀིརྟི་དགོན་པའི་དགེ་འདུན་པ་ཚོ་གང་དུ་ཡོད་མེད་སོགས་གསལ་ཁ་དགོས་པའི་འབོད་སྐུལ་གནང་འདུག གྲོས་ཚོགས་གོང་མའི་ཕྱི་དྲིལ་ལས་དོན་ཚོགས་ཆུང་གི་ཚོགས་མིས་གསུང་དོན། རྒྱ་ནག་གིས་ཇི་སྲིད་བོད་ཀྱི་རྒྱལ་ས་ལྷ་ས་རུ་ཨ་རིའི་དོན་གཅོད་ཁང་འཛུགས་མ་བཅུག་པ་དེ་སྲིད་དུ་ཝ་ཤིང་ཊོན་ནས་རྒྱ་ནག་གི་དོན་གཅོད་ཨ་རིར་འཛུགས་རྒྱུར་ཆོག་མཆན་ཐོབ་མི་སྲིད། འདས་པའི་ལོ་གཅིག་ནང་རྒྱ་ནག་ནུབ་ཁུལ་དུ་གནས་པའི་བོད་ཀྱི་ས་ཁུལ་ཁག་ཏུ་རང་ལུས་མེར་སྲེག་གི་དོན་རྐྱེན་ཐེངས་བཅུ་གྲངས་ལྷག་པ་དང་། གཟའ་འཁོར་འདིའི་གཟའ་ཟླ་བའི་ཉིན་རྒྱ་གར་དུའང་རང་ལུས་མེར་སྲེག་གི་དོན་རྐྱེན་བྱུང་བ་རེད། དེའི་སྐབས་སུ་བོད་མི་རྒྱ་ཕྲག་མང་པོས་རྒྱ་གར་གྱི་གྲོས་ཚོགས་མདུན་ནས་རྒྱ་ནག་གིས་བོད་དབང་སྒྱུར་བྱས་པ་དང་རྒྱ་ནག་གི་འགོ་ཁྲིད་ཧུའུ་ཅིང་ཐའོ་རྒྱ་གར་དུ་ཡོང་བར་ངོ་རྒོལ་ཁྲོམ་སྐོར་བྱས་ཡོད། དེའི་སྐབས་སུ་བཙན་བྱོལ་དུ་གནས་པའི་བོད་མི་ལོ་གཞོན་ཞིག་གིས་གོ་སྒྲིག་པས་གཏམ་བཤད་བྱེད་བཞིན་པའི་སྐབས་རང་ལུས་མེར་སྲེག་བཏང་ནས་ངོ་རྒོལ་བྱས་པ་མ་ཟད། གཏམ་བཤད་བྱེད་སའི་ཕྱོགས་སུ་རྒྱུགས་རྗེས་ཁོང་ཐང་ལ་འགྱེལ་བས་མི་ཚོགས་ཀྱིས་མེ་བསད་ནས་སྨན་ཁང་དུ་བསྐྱལ་འདུག མེས་འཚིགས་པའི་བོད་མི་དེའི་བརྙན་པར་དང་པར་རིགས་དྲ་ཐོག་ཏུ་རྒྱ་ཁྱབ་ངང་འགྲེམས་སྤེལ་བྱས་དང་བྱེད་མུས་ཡིན་འདུག
གྲོས་ཆོད་དེ་བཞིན་རིང་མིན་གྲོས་ཚོགས་གོང་མའི་ནང་གླེང་རྒྱུ་དང་དེར་གྲོས་ཚོགས་གོང་མའི་རྒྱབ་སྐྱོར་ཐོབ་རྒྱུའི་རེ་བ་བྱེད་བཞིན་ཡོད་པ་བཅས། །