༢༠༡༢ ཟླ་ ༣ ཚེས་ ༣༠ རེས་གཟའ་པ་སངས།
༄༅། །འདི་གར་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲིས་ལགས་ཀྱིས་བཏང་གནས་ནང་འཁོད་དོན། ཨ་རི་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་ཕྱི་ལོ་ ༢༠༡༢ ཟླ་ ༣ ཚེས་ ༢༧ ཉིན་ཨ་རིའི་ཨེ་མོ་རི་གཙུག་ལག་སློབ་གྲྭ་ཆེན་མོའི་Emory Universityདགེ་སློབ་རྣམས་ལ་མིག་སྔའི་བོད་ནང་གི་ཛ་དྲག་གནས་སྟངས་སྐོར་ལ་ངོ་སྤྲོད་གསུང་བཤད་གནང་ཡོད། དེ་ཡང་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་ཨེ་མོ་རི་གཙུག་ལག་སློབ་གཉེར་ཁང་ནས། བོད་ཀྱི་བདུན་ཕྲག ཅེས་པའི་བོད་ཀྱི་ཐུན་མོང་མ་ཡིན་པའི་ཆོས་དང༌རིག་གཞུང་སྐོར་ངོ་སྤྲོད་གནང་བའི་ལས་འགུལ་དོན་སྙིང་ལྡན་པ་ཞིག་གོ་སྒྲིག་གནང་བ་དེར་གདན་ཞུས་ལྟར་མཉམ་ཞུགས་གནང་ཡོད། ཕྱི་ཚེས་ ༢༧ ཉིན་ཁུལ་དེར་ཡོད་པའི་བོད་རང་བཙན་སློབ་ཕྲུག་ཚོགས་པས། བོད་ཀྱི་བདུན་ཕྲག་ཞེས་པའི་དུས་སྟོན་དང་བསྟུན་ནས་གཙུག་ལག་སློབ་ཆེན་དུ་གསུང་བཤད་གོ་སྒྲིག་གནང་བ་ལྟར། སློབ་གྲྭ་དེའི་དགེ་སློབ་དང༌། ཉེ་འདབས་ཀྱི་མང་ཚོགས་ ༡༥༠ ཙམ་ལ་བོད་སྐོར་ངོ་སྤྲོད་གསུང་བཤད་གནང་ཡོད། སྐབས་དེར་སྐུ་ཚབ་དོན་གཅོད་ཀྱིས་གཙོ་བོ་ཕྱི་ལོ་ ༢༠༠༩ ནས་ད་བར་གཞིས་ལུས་བོད་མི་ ༣༠ ཙམ་ནས་རང་ལུས་མེར་སྲེག་བཏང་སྟེ་རྒྱ་གཞུང་གིས་བོད་ལ་འཛིན་པའི་སྲིད་བྱུས་ལ་ངོ་རྒོལ་གནང་བའི་སྐོར་དང༌། བོད་མི་དེ་དག་གིས་རང་ལུས་མེར་སྲེག་བཏང་བའི་ལམ་ནས་ངོ་རྒོལ་མ་གནང་ཐབས་མེད་བྱུང་བའི་རྒྱུ་མཚན་གཙོ་བོ་གང་ལ་ཐུག་ཡོད་སྐོར། དུས་ཚོད་ཐུང་ཐུང་ཞིག་ནང་བོད་མི་དེ་འདྲ་མང་པོས་རང་ལུས་མེར་སྲེག་བཏང་བ་ནི། མིའི་རིགས་ཀྱི་ལོ་རྒྱུས་ནང་ཧ་ཅང་མཐོང་དཀོན་པའི་སྐྱོ་གནས་ཤིག་ཡིན་པ་དང་། རང་ལུས་རང་སྲེག་གི་དོན་རྐྱེན་ནི་ད་ལྟའི་རྒྱ་ནག་གཞུང་གི་འགོ་ཁྲིད་ཚོས་སྣང་མེད་ལྟ་བུར་འཇོག་གི་ཡོད་ཀྱང༌། རྒྱལ་སྤྱིའི་སྤྱི་ཚོགས་དང༌། ལྷག་པར་གནས་ཚུལ་ཤེས་མཁན་རྒྱ་རིགས་མི་མང་གིས་གདུང་སེམས་མཉམ་སྐྱེ་གནང་གི་ཡོད། རྒྱ་ནག་གཞུང་གི་དབུས་སའི་དཔོན་རིགས་འགའ་རེས་རང་ལུས་རང་མེར་སྲེག་དོན་རྐྱེན་ནི་ྋགོང་ས་ྋསྐྱབས་མགོན་ཆེན་པོ་མཆོག་དང༌། བོད་མི་བཙན་བྱོལ་བས་བཟོས་ཚུལ་བཤད་པ་ནི་ཁུངས་ལུངས་མེད་པའི་རྫུན་གཏམ་འབའ་ཞིག་ཡིན་པ་རང་ལུས་སྲེག་གཏོང་མཁན་རྣམ་པས་རང་གི་ལུས་ལ་མེ་ལྕེ་འབར་བཞིན་དུ་སྒྲོག་པའི་འབོད་ཚིག་ནི། བོད་ལ་རང་དབང་དགོས། ྋགོང་ས་ྋསྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་བཅུག་དགོས། ཞེས་སྐད་སངས་མཐོན་པོས་སྒྲོག་བཞིན་པའི་སྐོར་སོགས་བོད་ནང་གི་མིག་སྔའི་ཛ་དྲག་གནས་སྟངས་ངོ་སྤྲོད་གནང་ཡོད་པ་མ་ཟད། དྲི་བ་ཁག་ལ་ཡང་ལན་འདེབས་གནང་ཡོད།
མཇུག་ཏུ་སྐུ་ཚབ་དོན་གཅོད་ཀྱིས་ཨེ་མོ་རི་གཙུག་ལག་སློབ་ཆེན་གྱིས་ག་དུས་ཡིན་རུང་བོད་ཀྱི་བདེན་དོན་ལ་རྒྱབ་སྐྱོར་གནང་བ་དང༌། ངའི་སེམས་ནང་ཨེ་མོ་རི་གཙུག་ལག་སློབ་ཆེན་ནི་ྋགོང་ས་ྋསྐྱབས་མགོན་ཆེན་པོ་མཆོག་གི་ཐུགས་སྣང་ཉེ་བའི་གྲོགས་པོ་ཡིན་པ་མ་ཟད༌། མགོན་པོ་གང་ཉིད་མཆོག་གི་རླབས་ཆེན་དགོངས་པར་རྒྱབ་སྐྱོར་ཞུ་མཁན་གྱི་གཙུག་ལག་སློབ་གྲྭ་ཆེན་མོ་ཡིན་པ་བསམ་གྱི་ཡོད། སླར་ཡང་ཚང་མར་འཚམས་འདྲི་དང༌། བོད་དོན་ངོ་སྤྲོད་ཞུ་རྒྱུའི་གོ་སྐབས་བཟང་པོ་བྱུང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་གསུང་བཤད་གྲུབ་རྗེས་ཨེ་མོ་རི་གཙུག་ལག་སློབ་ཆེན་གྱི་ནང་ཆོས་དང༌ཚན་རིག་གི་ཐ་སྙད་སྒྱུར་མཁན་ཡིག་སྒྱུར་སྡེ་ཚན་གྱི་ཚོགས་མི་དང་ཐུག་འཕྲད་ཀྱི་ཕན་ཚུན་ཤེས་རྟོགས་དང༌དགོངས་ཚུལ་བརྗེ་རེས་གནང་བ་མ་ཟད། སློབ་ཆེན་གྱི་བོད་རིག་པའི་སྡེ་ཚན་གྱི་འགན་འཛིན་དགེ་བཤེས་བློ་བཟང་བསྟན་འཛིན་ནལ་གྷི་སོགས་འབྲེལ་ཡོད་མི་སྣ་དང་ཐུག་འཕྲད་གནང་ཡོད་པ་བཅས།