༢༠༡༢ ཟླ་ ༣ ཚེས་ ༡༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༡༧ རེས་གཟའ་སྤེན་པའི་ཉིན་བོད་མིའི་སྒྲིག་འཛུགས་ཀྱིས་རྔ་པ་ནས་རྒྱ་མིའི་དམག་དཔུང་འཕྲལ་མར་ཕྱིར་འཐེན་དགོས་པའི་འབོད་སྐུལ་གྱི་གསར་འགོད་གསལ་བསྒྲགས་ཤིག་སྤེལ་ཡོད་པའི་ནང་འཁོད་དོན། བོད་བྱང་ཤར་རྔ་པའི་ཁུལ་དུ་སླར་ཡང་བོད་མི་དགེ་འདུན་པ་གཞོན་སྐྱེས་ཤིག་གིས་རང་ལུས་མེར་སྲེག་བཏང་བའི་དོན་རྐྱེན་བྱུང་བར་ཧ་བློ་ཅང་སེམས་འཚབ་ཆེན་པོ་བྱུང། ས་ཁུལ་དེ་དག་ལ་ཟླ་ཤས་རིང་ནས་དངོས་སུ་དྲིལ་བསྒྲགས་བྱས་མེད་ཀྱང་དོན་དངོས་རྒྱ་གཞུང་གི་དམག་ཁྲིམས་འོག་གནས་ཡོད། བོད་ནས་གནས་ཚུལ་ཐོན་གསལ་ལྟར་ན། རྔ་པ་ཀིརྟི་དགོན་པའི་དགེ་འདུན་པ་རང་ལོ་ ༢༠ སོན་པ་བློ་བཟང་ཚུལ་ཁྲིམས་ལགས་ཀྱིས་རྔ་པའི་གཞུང་ལམ་དུ་མར་ཐོན་ནས་རང་ལུས་མེར་སྲེག་གཏོང་བཞིན་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ངོ་རྒོལ་སྐད་འབོད་གནང་འདུག དེ་ཡང་མིག་མཐོང་ལག་ཟིན་བྱུང་བའི་གནས་ཚུལ་ལྟར་ན། དེ་མ་ཐག་རྒྱ་མིའི་ཉེན་རྟོག་མི་སྣས་དགེ་འདུན་པ་བློ་བཟང་ཚུལ་ཁྲིམས་ལགས་ས་ལ་རིལ་དགོས་པ་ཞིག་གཞུས་ཏེ་མེ་གསོད་ཐབས་བྱས་མཐར་ཆ་རྒྱུས་མེད་པའི་ས་གནས་ཤིག་ཏུ་བཙན་ཁྲིད་བྱས་འདུག གནད་དོན་དེ་བྱུང་རྗེས་རྔ༌པ་དང་ལྷག་པར་ཀིརྟི་དགོན་པའི་མཐའ་སྐོར་དུ་རྒྱ་གཞུང་གིས་དྲག་ཆས་ཉེན་རྟོག་མི་སྣ་ཕོན་ཆེ་བཀྲམ་སྟེ་དྲག་གནོན་བྱ་རྒྱུའི་གྲ་སྒྲིག་ཨང་གསར་བྱས་འདུག བོད་མི་རང་ལུས་མེར་སྲེག་བཏང་སྟེ་རྨས་སྐྱོན་ཕོག་པ་རྣམས་གང་དུ་ཡོད་མེད་དང་ཁོང་རྣམ་པའི་གནས་སྟངས་ཇི་ཡིན་ཐོག་བོད་མིའི་སྒྲིག་འཛུགས་ལ་ཧ་ཅང་སེམས་འཚབ་ཆེན་པོ་ཡོད། དེར་བརྟེན་རྨས་སྐྱོན་ཕོག་པ་རྣམས་ལ་རྒྱ་གཞུང་ནས་སྨན་བཅོས་ཚད་ལྡན་བྱ་རྒྱུའི་མཐུན་འགྱུར་ཆ་ཚང་མཁོ་སྤྲོད་ཞུ་དགོས་པའི་ཛ་དྲག༌གི་འབོད་སྐུལ་ཞུ་རྒྱུ་མ་ཟད། ད་བར་བོད་མི་རང་ལུས་མེར་སྲེག་གཏོང་མཁན་ལྔ་གང་དུ་ཡོད་མེད་དང་ཁོང་རྣམ་པའི་གནས་སྟངས་ཇི་ཡིན་ཐོག་གསལ་བཤད་བྱེད་དགོས།
ཉེ་ལམ་རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་པས་རྒྱ་ནག་དམར་པོའི་སྲིད་གཞུང་གིས་བོད་ཀྱི་དགོན་སྡེ་ཁག་ལ་ཐད་ཀར་གཞུང་གི་སྟངས་འཛིན་བྱ་རྒྱུའི་ཁྲིམས་ལུགས་གཏན་འབེབས་བྱས་པ་དེར་སྐྱོན་བརྗོད་ཤུགས་ཆེ་གནང་ཡོད་པ་མ་ཟད། སྲིད་བྱུས་དེས་ཕྱི་ལོ་ ༢༠༠༨ ནས་བོད་རིགས་གནས་སྡོད་ཀྱི་ས་ཁུལ་ཁག་ཏུ་ཞི་རྒོལ་བྱུང་རྐྱེན་བརྟན་ལྷིང་མེད་པའི་གནས་སྟངས་འོག་གནས་བཞིན་པའི་ཁར། ད་དུང་གནས་སྟངས་ཇེ་ཞན་ཇེ་སྡུག་ཏུ་གཏོང་ངེས་ཡིན་ཞེས་སོགས་འཁོད་ཡོད་འདུག་ཅེས་གསར་འགོད་གསལ་བསྒྲགས་སྤེལ་ཡོད་པ་བཅས།།